ກະຕໍ້ຝຶກຊ້ອມກຽມພ້ອມເຂົ້າຮ່ວມ ກິລານັກຮຽນອາຊຽນຄັ້ງທີ 10

ສະຫະພັນກະຕໍ້ແຫ່ງຊາດລາວ ຝຶກຊ້ອມນັກກິລາກະຕໍ້ທີມຊາດລາວ ເພື່ອກຽມຄວາມພ້ອມນັກກິລາເຂົ້າຮ່ວມການແຂ່ງຂັນກິລານັກຮຽນອາຊຽນຄັ້ງທີ 10 ທີ່ປະເທດມາເລເຊຍ ເປັນເຈົ້າພາບ ເຊິ່ງຈະຈັດຂຶ້ນລະຫວ່າງກາງເດືອນກໍລະກົດນີ້.

ທ່ານ ອານຸສອນ ເຄນຕິສັກ ຮອງປະທານສະຫະພັນກະຕໍ້ແຫ່ງຊາດລາວ ໃຫ້ສໍາພາດວ່າ: ພາຍຫລັງສໍາເລັດການເຂົ້າຮ່ວມງານມະຫາເກມຄັ້ງທີ 29 ທີ່ປະເທດມາເລເຊຍ ທີ່ຈັດຂຶ້ນລະຫວ່າງທ້າຍເດືອນກໍລະກົດ 2017 ຜ່ານມານີ້ ເຊິ່ງພວກເຮົາໄດ້ສົ່ງນັກກິລາເຂົ້າຮ່ວມແຂ່ງຂັນດັ່ງກ່າວກໍສາມາດສ້າງຜົນງານໂດດເດັ່ນ, ຫລັງຈາກນັ້ນ ພວກເຮົາກໍສົ່ງນັກກິລາເຂົ້າຝຶກຊ້ອມກັບຫລາຍໆປະເທດ ເພື່ອເຮັດໃຫ້ນັກກິລາໄດ້ມີການເຄື່ອນໄຫວຕະຫລອດເວລາ ໂດຍສະເພາະໄດ້ສົ່ງນັກກິລາທີ່ເປັນເປົ້າໝາຍຂອງພວກເຮົາຝຶກຊ້ອມກັບປະເທດເພື່ອນບ້ານເປັນເວລາຫລາຍມື້ພໍສົມຄວນ. ນອກຈາກນັ້ນ ພວກເຮົາຍັງໄດ້ໃຫ້ນັກກິລາບາງຄົນທີ່ເງື່ອນໄຂໄດ້ເຄື່ອນໄຫວຢູ່ບັນດາປະເທດເພື່ອນບ້ານທີ່ຈັດຂຶ້ນ ທັງນີ້ກໍເພື່ອກຽມຄວາມພ້ອມເຂົ້າຮ່ວມແຂ່ງຂັນກິລານັກຮຽນອາຊຽນຄັ້ງທີ 10 ທີ່ປະເທດມາເລເຊຍ ທີ່ຈະຈັດຂຶ້ນລະຫວ່າງວັນທີ 19-27 ກໍລະກົດ 2018 ນີ້ ເຊິ່ງພວກເຮົາຈະສົ່ງນັກກິລາທີມຊາດຊາຍເຂົ້າຮ່ວມ 3 ລາຍການຄື: ທີມຊຸດ, ທີມດ່ຽວ, ທີມຄູ່. ສໍາລັບການຝຶກຊ້ອມປັດຈຸບັນພວກເຮົາໄດ້ມີເດີ່ນຝຶກຊ້ອມຢູ່ 2 ຈຸດຄື: ເດີ່ນກິລາໃນຮົ່ມບູຢອງ ບ້ານດົງໂດກ ເມືອງໄຊທານີ ນະຄອນຫລວງວຽງຈັນ ແລະ ເດີ່ນໂຮງຮຽນມັດທະຍົມສົມບູນເຈົ້າອານຸວົງ ເມືອງຈັນທະບູລີ ນະຄອນຫລວງວຽງຈັນ ເຊິ່ງເລີ່ມຊ້ອມເວລາ 17:00-19:00 ໂມງຂອງທຸກໆມື້.