ທີມຊາດແລ່ນ-ລານລາວຍາດໄດ້ 1 ຫລຽນຄໍາ 1 ຫລຽນເງິນ 1 ຫລຽນທອງ ສິງກະໂປໂອເພັນ

ສະຫະພັນແລ່ນ-ລານແຫ່ງຊາດລາວ ໄດ້ສົ່ງນັກກິລາແລ່ນ-ລານ ທີມຊາດລາວ 5 ຄົນເຂົ້າຮ່ວມລາຍການ ສິງກະໂປ ໂອເພັນ ຄັ້ງທີ 80 ທີ່ປະເທດສິງກະໂປ ຈັດຂຶ້ນລະຫວ່າງວັນທີ 11-12 ເມສາຜ່ານມານີ້ ໂດຍເຂົ້າຮ່ວມຊີງໄຊ 9 ລາຍການ, ຜ່ານການແຂ່ງຂັນນັກກິລາແລ່ນ-ລານທີມຊາດລາວສາມາດຍາດໄດ້ 1 ຫລຽນຄໍາ, 1 ຫລຽນເງິນ, 1 ຫລຽນທອງ.

ສໍາລັບຫລຽນຄໍາໄດ້ຈາກລາຍການ 800 ແມັດຍິງ, ຫລຽນເງິນໄດ້ຈາກລາຍການ 1.500 ແມັດຍິງ ຈາກນາງ ລົດແກ້ວ ອິນທະກຸມມານ; ຂະນະທີ່ 1 ຫລຽນທອງ ໄດ້ຈາກທີມຊາຍ ແລ່ນ 4×100 ແມັດ ຈາກທ້າວ ສີພາສຸກ ບົດວິໄລທອງ, ທ້າວ ສົມສະໜຸກ ບົດວິໄລທອງ, ທ້າວ ອັກສອນສາດ ລາດຊະວົງ ແລະ ທ້າວ ອານຸສອນ ໄຊສາ ກາຍເປັນຫລຽນທອງປະຫວັດສາດຫລຽນທຳອິດ 4×100 ແມັດຊາຍ ໃນລາຍການນີ້.

ການແຂ່ງຂັນແລ່ນ-ລານ ສິງກະໂປ ໂອເພັນ ຈັດຂຶ້ນເປັນປີທີ 80 ໃນປີ 2018 ມີນັກກິລາເຂົ້າຮ່ວມຫລາຍພັນຄົນ ຈາກຫລາຍປະເທດໃນທົ່ວໂລກ ຊີງ 30 ກວ່າລາຍການ.