ການາ, ເກນຢາ ແລະ ມາລາວີ ຈະເປັນຕົວແບບທົດລອງວັກແຊງມາລາເຣຍຕົວທຳອິດຂອງໂລກປີໜ້າ
ລອນດອນ 24 ເມສາ: ອົງການອະນາໄມໂລກ ຖະແຫລງໃນວັນທີ 24 ເມສານີ້ວ່າ: ຈະມີໂຄງການຕົວແບບທົດລອງວັກແຊງມາລາເຣຍຕົວທຳອິດຂອງໂລກນັບແຕ່ປີ 2018 ຢ່າງກວ້າງຂວາງຢູ່ການາ, ເກນຢາ ແລະ ມາລາວີ ສຳລັບກຸ່ມເດັກນ້ອຍໃນພື້ນທີ່ທີ່ມີຄວາມສ່ຽງສູງ.
ຖະແຫລງການອົງການອະນາໄມໂລກລະບຸວ່າ: ວັກແຊງມາລາເຣຍທີ່ເອີ້ນວ່າ ອາຣ໌ທີເອສ ເອສ ຫລື ມອສກີຣິກ ໄດ້ຮັບການພັດທະນາຈາກບໍລິສັດແກລັກໂຊສມິດຄາຍ (GSK) ຜູ້ຜະລິດຢາຂອງອັງກິດ ເພື່ອປ້ອງກັນເດັກນ້ອຍຈາກເຊື້ອມາລາເຣຍທີ່ລະບາດຢູ່ອາຟຣິກາ ຕາມໂຄງການຈະມີເດັກນ້ອຍຈຳນວນ 360.000 ຄົນທີ່ຈະໄດ້ຮັບວັກແຊງລະຫວ່າງປີ 2018-2029 ໂດຍກຳນົດສັກວັກແຊງເປັນ 4 ໄລຍະ ຖືເປັນວັກແຊງປ້ອງກັນພະຍາດມາລາເຣຍຕົວທຳອິດທີ່ໄດ້ຮັບການອະນຸມັດຮັບຮອງແລ້ວ. ອົງການອະນາໄມໂລກຄາດວ່າ: ວັກແຊງຕົວໃໝ່ຈະສາມາດປ້ອງກັນພະຍາດມາລາເຣຍ ເຊິ່ງຂ້າຊີວິດປະຊາຊົນ 429.000 ຄົນທົ່ວໂລກໃນປີ 2015 ໂດຍ 92% ຂອງກຸ່ມຜູ້ເສຍຊີວິດຢູ່ພາກພື້ນອາຟຣິກາ ແລະ 2 ໃນ 3 ຂອງຈຳນວນດັ່ງກ່າວເປັນເດັກນ້ອຍອາຍຸບໍ່ຮອດ 5 ປີ. ອົງການອະນາໄມໂລກລະບຸວ່າ: ມາລາວີ, ເກນຢາ ແລະ ການາ ໄດ້ຮັບເລືອກໃຫ້ເປັນຕົວແບບໂຄງການທົດລອງວັກແຊງປ້ອງກັນເຊື້ອມາລາເຣຍ ເນື່ອງຈາກປັດໄຈຫລາຍຢ່າງເຊັ່ນ: ມີອັດຕາຜູ້ຕິດເຊື້ອມາລາເຣຍສູງ.
