ປີໃໝ່ນີ້ ນະຄອນຫລວງວຽງຈັນຕັ້ງເປົ້າດຶງດູດນັກທ່ອງທ່ຽວໃຫ້ໄດ້ກ່ວາ 10 ພັນຄົນ.

ທ່ານ ຫົວໜ້າ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ໃຫ້ຮູ້ວ່າ: ໃນໂອກາດບຸນປີໃໝ່ລາວ ນີ້, ຄາດວ່າຈະມີນັກທ່ອງທ່ຽວເຂົ້າມາທ່ຽວຫລິ້ນຫລາຍກ່ວາ ສິບພັນຄົນ, ໂດຍໄດ້ຈັດຫລາຍກິດຈະກຳ ເພື່ອສະເຫລີມສະຫລອງບຸນປີໃໝ່ໃຫ້ມີຄວາມເບີກບານມ່ວນຊື່ນ, ຮັກສາໄດ້ຮີດຄອງປະເພນີ ແລະ ສ້າງຄວາມປະທັບໃຈແກ່ນັກທ່ອງທ່ຽວ.

ຫົວໜ້າພະແນກດັ່ງກ່າວໃຫ້ຮູ້ວ່າ: ບຸນປີໃໝ່ລາວແມ່ນມີຄວາມສຳຄັນ ແລະ ເປັນຮີດຄອງປະເພນີທີ່ປະຕິບັດກັນມາແຕ່ດົນນານ, ສະນັ້ນ ໃນໂອກາດ ປີທ່ອງທ່ຽວລາວ ຈຶ່ງໄດ້ຈັດກິດຈະກຳຫລີ້ນບຸນປີໃໝ່ເປັນຕົ້ນແມ່ນຫາດຊາຍດອນຈັນທີ່ເປີດໃຫ້ມວນຊົນໄດ້ລົງຫລີ້ນນໍ້າ ແລະ ການແຫ່ນາງສັງຂານ ແລະ ພຣະພຸດທະຮູບມິ່ງບ້ານມິ່ງເມືອງ, ຊອ່ງຄາດວ່າຈະມີນັກທ່ອງທ່ຽວມາທ່ຽວຊົມເປັນຈຳນວນຫລາຍ.

ສຳລັບກິດຈະກໍາຕ່າງໆ ເນື່ອງໃນໂອກາດບຸນປີໃໝ່ລາວ ພສ 2561 ຄສ 2018 ທີ່ນະຄອນຫຼວງວຽງຈັນ
1. ງານແຫ່ພະພຸດທະຮູບມິ່ງບ້ານມິ່ງເມືອງ
– ວັນເສົາທີ 14 ເມສາ 2018, ເວລາ 13:00 ເຕົ້າໂຮມຂະບວນຢູ່ຕໍ່ໜ້າວັດອິນແປງ.
– ເວລາ 13: 40 ນາທີ ທໍາພິທີທາງສາດສະໜາ, ສູດໄຊຍັນໂຕ.
– ເວລາ 13: 55 – 14:10 ທໍາພິທີຂອບໄຂ່ວ ແລະ ອັນເຊີນພະພຸດທະຮູບມິ່ງບ້ານຂວັນເມືອງຂຶນລົດແຫ່.
– ເວລາ 14: 10-14:20 ຄະນະຈັດຕັ້ງພິທີ ຮຽນເຊີນການນໍາ ແລະ ສະເໜີແຂກທີ່ຖືກເຊີນເຂົ້າສູ່ຂະບວນແຫ່.
– ເວລາ 14:20 -16:00 ຂະບວນແຫ່ ດໍາເນີນໄປຕາມເສັ້ນທາງເສດຖາທິລາດ ໄປຫານໍ້າພຸ ລ້ຽວອອກເສັນທາງຟ້າງຸ່ມ ໄປຫາວົງວຽນປາກປ່າສັກ ແລ້ວກັບມາຫາໄຟແດງວັດອິນແປງ ຈົນເຖິງເວລາ 16:00 ເປັນອັນຈົບພິທີແຫ່. ຈາກນັ້ນ, ເຊີນການນໍາ ແລະ ແຂກທີ່ມີກຽດລົງທ່ຽວຊົມບໍລິເວນງານ ທີ່ຫາດຊາຍດອນຈັນ.
2. ງານຫົວສົງພຣະ 9 ວັດ
– ວັນອາທິດ ທີ 15 ເມສາ 2018, ເວລາ 8:00 ຢູ່ວັດຕ່າງໆ.
– ງານຕັກບາດປີໃໝ່ລາວ.
– ວັນຈັນທີ 16 ເມສາ 2018, ເວລາ 7:00 ຢູ່ວັດອົງຕື້ ສໍາລັບແຂກທີ່ຖືກເຊີນ, ຄະນະຮັບຜິດຊອບຈັດງານ ແລະ ຢູ່ຕາມວັດຕ່າງໆຕາມເງື່ອນໄຂ ບັນດາທ່ານການນໍາທີ່ບໍ່ໄດ້ເຂົ້າຮ່ວມຢູ່ວັດອົງຕື້.
– ງານຕົບພະທາດຊາຍ.
– ວັນຈັນທີ 16 ເມສາ 2018. ເວລາ 14:00 ຫາ 18:00 ແຂ່ງຂັນຕົບພະທາດຊາຍທີ່ຫາດຊາຍດອນຈັນ ເຂັດບ້ານວັດຈັນ.
– ງານກິລາຊາຍຫາດ.
– ວັນສຸກ ທີ 12 ເມສາ ຫາ 16 ເມສາ 2018, ເວລາ 15:00 ເປີດງານແຂ່ງຂັນເປັນທາງການ.
– ເວລາ 8:00 ຫາ 17:00 ຂອງທຸກໆວັນຈັດການແຂ່ງຂັນກິລາປະເພດຕ່າງໆທີ່ຫາດຊາຍດອນຈັນ.
– ເຂດບ້ານວັດຈັນ ມີກິລາບານເຕະ, ບານສົ່ງ, ກະຕໍ້(ຍິງ-ຊາຍ).
ໝາຍເຫດ: ທຸກກິດຈະກໍາມວນຊົນສາທົ່ວໄປ ແລະ ນັກທ່ອງທ່ຽວສາມາດເຂົ້າຮ່ວມໄດ້.