ວິກິດເຫລົ້າເຖື່ອນຢູ່ອິນໂດເນເຊຍ ຂ້າຊີວິດເກີນ 100 ຄົນແລ້ວ
ທາງການອິນໂດເນເຊຍຍັງບໍ່ສາມາດຄວບຄຸມວິກິດເຫລົ້າເຖື່ອນໃນປະເທດໄດ້ ໂດຍຈຳນວນຜູ້ເສຍຊີວິດເພີ່ມເປັນເກີນ 100 ຄົນແລ້ວ ພາຍໃນໄລຍະເວລາບໍ່ຮອດ 1 ເດືອນ.
ສຳນັກຂ່າວຕ່າງປະເທດລາຍງານຈາກນະຄອນຫລວງຈາກາຕາ ປະເທດອິນໂດເນເຊຍ ໃນວັນທີ 12 ເມສາວ່າ: ສຳນັກງານຕຳຫລວດແຫ່ງຊາດຂອງອິນໂດເນເຊຍລາຍງານວ່າ: ຈຳນວນຜູ້ເສຍຊີວິດຈາກການບໍລິໂພກເຫລົ້າເຖື່ອນໃນປະເທດນັບແຕ່ຕົ້ນເດືອນນີ້ ເພີ່ມເປັນຫລາຍກວ່າ 100 ຄົນແລ້ວ ໂດຍພື້ນທີ່ພົບຜູ້ເສຍຊີວິດ ແລະ ຜູ້ປ່ວຍຫລາຍທີ່ສຸດຢູ່ບໍລິເວນເບື້ອງຕາເວັນຕົກຂອງເກາະຊະວາ ເຊິ່ງເປັນບໍລິເວນທີ່ມີປະຊາຊົນອາໄສຢູ່ເປັນຈຳນວນຫລາຍ. ນອກຈາກນີ້ ຍັງມີແຂວງກາລີມັນຕັນໃຕ້ ເກາະບໍນຽວ ແລະ ແຂວງປາປົວ ທີ່ຢູ່ທາງຕາເວັນອອກຂອງປະເທດ. ຂະນະທີ່ຢູ່ນະຄອນຫລວງຈາກາຕາພົບຜູ້ເສຍຊີວິດຢ່າງໜ້ອຍ 31 ຄົນ ແລະ ເມືອງບັນດຸງ ເຊິ່ງເປັນເມືອງໃຫຍ່ອັນດັບ 3 ຂອງປະເທດ ປະກາດສະຖານະການສຸກເສີນຈາກບັນຫາເຫລົ້າເຖື່ອນ ໃນຕົ້ນອາທິດນີ້.
ທັງນີ້, ອິນໂດເນເຊຍ ເຊິ່ງເປັນປະເທດມຸດສະລິມຂະໜາດໃຫຍ່ທີ່ສຸດຂອງໂລກ ບັງຄັບໃຊ້ກົດໝາຍຫ້າມຈຳໜ່າຍເຄື່ອງດື່ມແອລກໍຮໍໃນຮ້ານຄ້ານັບແຕ່ປີ 2015 ເປັນຕົ້ນມາ ໂດຍອະນຸຍາດໃຫ້ພຽງຫ້າງສັບພະສິນຄ້າຂະໜາດໃຫຍ່, ໂຮງແຮມ, ພັດຕາຄານ ແລະ ສະຖານບັນເທີງຍາມລາຕີ.
