ໂດນັນ ທຣຳ ເຕືອນຣັດເຊຍ ກຽມຮັບລູກສອນໄຟໃນຊີຣີ
ປະທານາທິບໍດີ ໂດນັນ ທຣຳ ເຕືອນຣັດເຊຍ “ກຽມຄວາມພ້ອມ” ຮັບມືລູກສອນໄຟທີ່ຈະມຸ່ງໂຈມຕີຊີຣີ “ໃນອີກບໍ່ດົນ”, ຫລັງລັດຖະບານມົດສະກູປະກາດຈະສະກັດຈະຫລວດທຸກລູກຂອງອາເມລິກາ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 11 ເມສາວ່າ: ປະທານາທິບໍດີ ໂດນັນ ທຣຳ ສະແດງຂໍ້ຄວາມວ່າ: ໃນເມື່ອຣັດເຊຍປະກາດວ່າຈະຍິງສະກັດລູກສອນໄຟທຸກລູກທີ່ລອຍເຂົ້າສູ່ຊີຣີ ຂໍໃຫ້ກຽມພ້ອມໄວ້ ເພາະສຸດຍອດລູກສອນໄຟອັດສະລິຍະກຳລັງຈະມາໃນອີກບໍ່ດົນ !” ແລະ ກ່າວວ່າ: ລັດຖະບານມົດສະກູບໍ່ຄວນເປັນມິດກັບລັດຖະບານທີ່ໃຊ້ແກັສພິດຂ້າປະຊາຊົນ. ສະຖານະການທີ່ເກີດຂຶ້ນກຳລັງສົ່ງຜົນໃຫ້ການພົວພັນໃນລະດັບທະວີພາຄີຫລຸດຕໍ່າລົງສູ່ລະດັບທີ່ບໍ່ເຄີຍເກີດຂຶ້ນມາກ່ອນ ເຊິ່ງຮ້າຍແຮງກວ່າສະໄໝສົງຄາມເຢັນ.
ຂໍ້ຄວາມດັ່ງກ່າວຂອງທ່ານ ທຣຳ ເກີດຂຶ້ນພາຍຫລັງທ່ານນາງ ມາເຣຍ ຊາຄາໂຣວາ ໂຄສົກກະຊວງການຕ່າງປະເທດຣັດເຊຍ ກ່າວວ່າ: ລູກສອນໄຟທີ່ວ່າກັນວ່າ “ອັດສະລິຍະ” ຄວນມຸ່ງເປົ້າໂຈມຕີຖານທີ່ໝັ້ນຂອງກຸ່ມກໍ່ການຮ້າຍ ບໍ່ແມ່ນຖານປະຕິບັດການຂອງລັດຖະບານທີ່ມີຄວາມຖືກຕ້ອງຕາມກົດໝາຍ. ຂະນະທີ່ທ່ານ ອາເລັກຊານເດີ ຊາຊິບກິນ ເອກອັກຄະລັດຖະທູດຣັດເຊຍປະຈຳນະຄອນຫລວງເບຣຸດ ຂອງລີບັງ ເຊິ່ງຢູ່ທາງຕາເວັນຕົກຂອງຊີຣີ ແລະ ໃກ້ກັບນະຄອນຫລວງດາມັດກັດ ກ່າວວ່າ: ກອງທັບຣັດເຊຍໃນຊີຣີຈະຍິງສະກັດລູກສອນໄຟທຸກລູກຂອງອາເມລິກາທີ່ມຸ່ງເປົ້າເຂົ້າສູ່ຊີຣີ.
