ມອບ-ຮັບສະໜາມແຂ່ງຂັນຍິງປືນອາວຸດເບົາອາຊຽນຂອງຂວັນຈາກກອງທັບປະຊາຊົນຈີນ
ໃນວັນທີ 10 ເມສານີ້ ຢູ່ທີ່ສະໜາມຍິງປືນອາຊຽນ, ໄດ້ມີພິທີມອບ-ຮັບໂຄງການຊ່ວຍເຫລືອ ກໍ່ສ້າງສະໜາມແຂ່ງຂັນຍິງປືນອາວຸດເບົາອາຊຽນ ຂອງກອງທັບປະຊາຊົນລາວ ໂດຍການເຂົ້າຮ່ວມຂອງທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ ເຂົ້າຮ່ວມນໍາດ້ວຍ.
ໂຄງການກໍ່ສ້າງສະໜາມແຂ່ງຂັນຍິງປືນອາວຸດເບົາອາຊຽນຂອງກອງທັບປະຊາຊົນລາວ ໂດຍໄດ້ຮັບການຊ່ວຍເຫລືອຈາກກອງທັບປົດປ່ອຍປະຊາຊົນຈີນ ມີເນື້ອທີ່ກວ້າງ 860 ຕາແມັດ, ປະກອບມີ ເຂດຍິງປືນ ແລະ ເຂດອຸປະກອນປະກອບ ຊຶ່ງໄດ້ໃຊ້ເວລາການກໍ່ສ້າງ 15 ເດືອນ.
ທ່ານ ເອກອັກຄະລັດຖະທູດ ກ່າວວ່າ: ໂຄງການກໍ່ສ້າງສະໜາມຍິງປືນດັ່ງກ່າວແມ່ນການຕົກລົງສໍາຄັນລະຫວ່າງການນໍາພັກ-ລັດສອງປະເທດ ຈີນ-ລາວ ແລະ ຜົນສໍາເລັດຂອງໂຄງການນີ້ ໄດ້ສະແດງໃຫ້ເຫັນເຖິງການພົວພັນຮ່ວມມືລະຫວ່າງສອງກອງທັບ ສປປ ລາວ ແລະ ສປ ຈີນ ນັບມື້ກ້າວສູ່ລວງເລິກ ທັງເປັນສັນຍາລັກໃໝ່ຂອງການຮ່ວມມືມິດຕະພາບ ລະຫວ່າງສອງຝ່າຍ ແລະ ເປັນຂອງຂວັນຈາກກອງທັບປົດປ່ອຍປະຊາຊົນຈີນ ໃຫ້ກອງທັບປະຊາຊົນລາວ ໃນໂອກາດ ສະເຫລີມສະຫລອງວັນສ້າງຕັ້ງສາຍພົວພັນການທູດ ຈີນ-ລາວ ຄົບຮອບ 57 ປີ ແລະ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ໃນປີ 2019 ທີ່ຈະມາເຖິງ.
ໃນໂອກາດນີ້, ທ່ານ ພົນໂທ ສຸວອນ ເລືອງບຸນມີ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ກ່າວວ່າ: ການສ້າງສະໜາມຍິງປືນດັ່ງກ່າວ ແມ່ນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງຊາດ, ສອງກອງທັບ ລາວ-ຈີນ ແລະ ທັງເປັນການຍົກລະດັບຄຸນະພາບໃນການຝຶກແອບນັກຍິງປືນກອງທັບປະຊາຊົນລາວໃຫ້ມີຄຸນນະພາບສູງທຽບເທົ່າກັບສາກົນ ແລະ ພາກພື້ນ.
