ຕໍາຫລວດອຸດົມໄຊຈັບຂະບວນການຄ້າຢາເສບຕິດລາຍໃຫຍ່
ກອງບັນຊາການ ປກສ ເມືອງນາໝໍ້ແຂວງອຸດົມໄຊ ລາຍງານໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີວ່າຈະມີການລັກລອບຂົນສົ່ງຢາເສບຕິດຈໍານວນຫລາຍໃນເຂດເສັ້ນທາງເມືອງນາໝໍ້, ຈຶ່ງໄດ້ຈັດກໍາລັງລົງຕິດຕາມ, ພ້ອມທັງຕັ້ງຈຸດກວດກາຕາມສາຍທາງຫລັກ ແລະ ພົບເຫັນເປົ້າໝາຍເປັນຊາຍຄົນໜຶ່ງຂັບລົດຈັກບໍ່ມີປ້າຍທະບຽນ, ເຈົ້າໜ້າທີ່ຈຶ່ງໄດ້ສະກັດໃຫ້ຢຸດເພື່ອກວດກາ ແລະ ພົບເຫັນຢາເສບຕິດປະເພດຢາຝິ່ນ 17 ຫໍ່ລວມມີນ້ຳໜັກ 23 ກິໂລ, ຊຸກເຊື່ອງໄວ້ໃນແກັດເຈ້ຍມັດຕິດທ້າຍລົດ, ຈຶ່ງໄດ້ຈັບຕົວຜູ້ກ່ຽວມາສືບສວນ-ສອບສວນ, ໂດຍຊື່ວ່າທ້າວ ຄຳ ອາຍຸ 40 ປີຢູ່ບ້ານຊຽງຍືນ ເມືອງສິງແຂວງຫລວງນ້ຳທາ ແລະ ໄດ້ຮັບສາລະພາບວ່າ: ຝິ່ນດັ່ງກ່າວເປັນຂອງຕົນແທ້, ໂດຍໄດ້ຊື້ມາຈາກຂະບວນການດຽວກັນ ເພື່ອໄປສົ່ງໃຫ້ຜູ້ສັ່ງຊື້ຢູ່ເມືອງນາໝໍ້ ແຕ່ຖືກເຈົ້າໜ້າທີ່ຈັບຕົວກ່ອນ, ປັດຈຸບັນເຈົ້າໜ້າທີ່ພວມເລັ່ງຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດໍາເນີນຄະດີຕາມລະບຽບກົດໝາຍ.
