ອາເມລິກາອ້າງ ສປປ ເກົາຫລີ ຢືນຢັນພ້ອມປົດນິວເຄຼຍ
ເດິ ວໍຊິງຕັນ ໂພສ ລາຍງານໂດຍອ້າງແຫລ່ງຂ່າວວ່າ: ສປປ ເກົາຫລີ ຢືນຢັນຄວາມພ້ອມຫາລືກັບອາເມລິກາໃນການປົດອາວຸດນິວເຄຼຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ສ.ເກົາຫລີ ໃນວັນທີ 9 ເມສາ ໂດຍອ້າງຈາກລາຍງານຂອງໜັງສືພິມ ເດິ ວໍຊິງຕັນ ໂພສ ສະບັບວັນທີ 8 ເມສາ ເຊິ່ງສຳພາດແຫລ່ງຂ່າວໃນລັດຖະບານຂອງປະທານາທິບໍດີ ໂດນັນ ທຣຳ ວ່າ: ທ່ານ ກິມ ຈອງອິນ ຜູ້ນຳສູງສຸດຂອງ ສປປ ເກົາຫລີ ມີຄວາມພ້ອມຫາລືກັບລັດຖະບານວໍຊິງຕັນ ໃນບັນຫາກ່ຽວກັບການປົດອາວຸດນິວເຄຼຍຢູ່ແຫລມເກົາຫລີ.
ນອກຈາກນີ້, ນັບແຕ່ທ່ານ ຊອງ ອາວີຍອງ ທີ່ປຶກສາດ້ານຄວາມໝັ້ນຄົງແຫ່ງຊາດຂອງລັດຖະບານ ສ.ເກົາຫລີ ກ່າວເຖິງການພົບກັນລະຫວ່າງຜູ້ນຳອາເມລິກາກັບຜູ້ນຳສູງສຸດຂອງ ສປປ ເກົາຫລີ ພາຍໃນເດືອນພຶດສະພານີ້, ເຈົ້າໜ້າທີ່ລະດັບສູງຂອງລັດຖະບານວໍຊິງຕັນ ແລະ ລັດຖະບານພຽງຢາງພົບຫາລືເປັນການລັບມາແລ້ວຫລາຍຄັ້ງ ເຊິ່ງລວມທັງກອງປະຊຸມຮ່ວມກັນ ໂດຍມີປະເທດທີສາມເຮັດໜ້າທີ່ເປັນຜູ້ປະສານງານ. ເຖິງຢ່າງໃດກໍຕາມ ຍັງບໍ່ມີລັດຖະບານຂອງປະເທດໃດທີ່ກ່ຽວຂ້ອງສະແດງທ່າທີຕໍ່ລາຍງານດັ່ງກ່າວ.
