ນະຄອນຫລວງ ຢູໄນເຕັດ ຫວັງຕິດ 1 ໃນ 5 ການແຂ່ງຂັນບານເຕະ ສາຍ ກ 2018
ນາງ ພີຈີກາ ບຸນກວ້າງ ປະທານ ສະໂມສອນ ນະຄອນຫລວງ ຢູໄນເຕັດ ໃຫ້ຮູ້ວ່າ: ສຳລັບການເຂົ້າຮ່ວມການແຂ່ງຂັນບານເຕະ ສາຍ ກ ໃນປີ 2018 ຄວາມຄາດຫວັງຕິດ 1-5 ເຊິ່ງແຕ່ລະທີມລ້ວນແລ້ວມີການກຽມທີມທີ່ດີ ແລະ ມີປະສົບການສູງ ແຕ່ພວກເຮົາຫມັ້ນໃຈໃນນັກກິລາພວກເຮົາ ເຊິ່ງທີມກໍໄດ້ມີການອຸ່ນເຄື່ອງກຽມທີມເປັນຢ່າງດີ ໄດ້ມີການອຸ່ນເຄື່ອງກັບບັນດາທີມຊັ້ນນຳ ເປບຊີ ລາວພຣີເມຍລີກ .
ສຳລັບການອຸ່ນເຄື່ອງກັບທີມ ຊົນບູຣີ ເອັຟຊີ ທີມຊັ້ນນຳຈາກໄທນັ້ນ ແມ່ນຕ້ອງເລື່ອນການແຂ່ງຂັນອອກໄປ ແຕ່ຈະມີການອຸ່ນເຄື່ອງພາຍໃນ ເຊິ່ງຈະເດີນທາງໄປແຂ່ງຂັນກັບທີມ ເມືອງວັງວຽງ ວັນທີ 7-9 ເມສາ 2018. ນະຄອນຫລວງ ຢູໄນເຕັດ ມີຄິວອຸ່ນເຄື່ອງ 2 ນັດ ໃນວັນທີ 6 ເມສາ 2018 ເວລາ 16:00 ໂມງ ນະຄອນຫລວງ ຢູໄນເຕັດ ພົບ ປກສ, ເວລາ 18:00 ນະຄອນຫລວງ ຢູໄນເຕັດ ພົບ ເຄພີເອັສ ເອັຟຊີ ແຂ່ງຂັນຢູ່ສະຫນາມກິລາເຈົ້າອານຸວົງ.
ການແຂ່ງຂັນບານເຕະ ສາຍ ກ (DIVISION 1) ໂດຍຄາດຄະເນວ່າຈະເປີດການແຂ່ງຂັນພາຍໃນທ້າຍເດືອນ ເມສາ ນີ້. ມາຮອດປັດຈຸບັນໄດ້ 12 ທີມແລ້ວແຈ້ງເຈດຈຳນົງເຂົ້າຮ່ວມຢ່າງເປັນທາງການໃນລາຍການແຂ່ງຂັນບານເຕະ ສາຍ ກ ເຊິ່ງປະກອບມີ: ກອງທັບ ເອັຟຊີ (ແຊ້ມເກົ່າ), ນະຄອນຫລວງ ຢູໄນເຕັດ (ອັນດັບ 3), ວິທະຍາໄລ ລາວ-ທ໋ອບ, ໂຮງຮຽນ ບຸນເກີດສຶກສາ ເອັຟຊີ, ຄີພີເອັສ ເອັຟຊີ, ເອັສຣາ, ແບລາວ ອະຄາເດມີ (Bears Laos Academy), ເມືອງຫາດ ຢູໄນເຕັດ, LOB STADIUM, TRINITY FC, ທີມຈາກຕ່າງແຂວງ, ສະຫວັນ ຢູໄນເຕັດ ແລະ ແຂວງວຽງຈັນ.
