ຣັດເຊຍຮຽກປະຊຸມສຸກເສີນສະພາ ຄວາມໝັ້ນຄົງ ກໍລະນີທຳຮ້າຍອະດີດສາຍລັບ
ຣັດເຊຍຮຽກປະຊຸມສຸກເສີນສະພາຄວາມໝັ້ນຄົງແຫ່ງສະຫະປະຊາຊາດໃນວັນທີ 5 ເມສາ, ພາຍຫລັງບໍ່ສາມາດຂໍເຂົ້າຮ່ວມໃນການພິສູດກັບອັງກິດ ກໍລະນີເຫດທຳຮ້າຍອະດີດສາຍລັບຊາວຣັດເຊຍ.
ທັງນີ້, ອັງກິດລະບຸວ່າ: ຣັດເຊຍອາດຈະຢູ່ເບື້ອງຫລັງເຫດທຳຮ້າຍທ່ານ ເຊີເກ ສກຣີປາລ ອະດີດສາຍລັບສອງໜ້າຊາວຣັດເຊຍ ແລະ ຢູເລຍ ລູກສາວ ໃນວັນທີ 4 ມີນາຜ່ານມາ, ແຕ່ຣັດເຊຍຢືນຢັນປະຕິເສດວ່າບໍ່ໄດ້ມີສ່ວນກ່ຽວຂ້ອງ. ຂະນະທີ່ອັງກິດອ້າງວ່າ: ສານພິດທີ່ໃຊ້ເປັນສານພິດແບບທີ່ໃຊ້ໃນກອງທັບ ແລະ ພັດທະນາໂດຍສະຫະພາບໂຊວຽດ ສົ່ງຜົນໃຫ້ການພົວພັນລະຫວ່າງທັງສອງປະເທດຕົກຕໍ່າ ໂດຍມີການຂັບໄລ່ນັກການທູດກວ່າ 150 ຄົນ.
ຣັດເຊຍຮຽກປະຊຸມອົງການຫ້າມອາວຸດເຄມີ ຫລື OPCW ໃນວັນທີ 4 ເມສາ ເພື່ອຮຽກຮ້ອງໃຫ້ມີການພິສູດເລື່ອງນີ້ຮ່ວມກັນກັບອັງກິດ, ແຕ່ບໍ່ສາມາດໄດ້ຮັບຄະແນນສຽງສະໜັບສະໜູນ 2 ໃນ 3 ອັງກິດບໍ່ເຫັນພ້ອມກັບແນວຄິດດັ່ງກ່າວ. ເຖິງຢ່າງໃດກໍຕາມ ຣັດເຊຍໄດ້ຮຽກປະຊຸມສະພາຄວາມໝັ້ນຄົງທີ່ນະຄອນນິວຢອກ ໂດຍຈະເນັ້ນໃສ່ຈົດໝາຍຂອງນາຍົກລັດຖະມົນຕີ ເທເຣຊາ ເມ ຂອງອັງກິດ ທີ່ກ່າວຫາວ່າຣັດເຊຍພະຍາຍາມລອບສັງຫານອະດີດສາຍລັບ.
