ນັກກິລາດອກປີກໄກ່ເຍົາວະຊົນທີມຊາດລາວ ເຮັດໄດ້ດີທີ່ສຸດພຽງຮອບ Main Draw

ໃນການແຂ່ງຂັນດອກປີກໄກ່ລະດັບສາກົນຊິງແຊ້ມເຍົາວະຊົນ ອາຍຸບໍ່ເກີນ 19 ປີ ລາຍການ Pembangunan Jaya Raya Yonex Sunrise Junior Grand Prix 2018 ທີ່ເມືອງຈາກາຕາ ປະເທດອິນໂດເນເຊຍ ໃນລະຫວ່າງວັນທີ 2-8 ເມສາ 2018 ນີ້ ໂດຍຜົນການແຂ່ງຂັນ ປະເພດຊາຍດ່ຽວ ທ້າວ ເກດຕິຍະ ແກ້ວໄຊ ເສຍໃຫ້ກັບ Aldy Furnando ຈາກເຈົ້າພາບອິນໂດເນເຊຍ ດ້ວຍຄະແນນ 2-0 ເກມ (21-15, 21-12), ສ່ວນປະເພດຄູ່ປະສົມ ທ້າວ ເກດຕິຍະ ແກ້ວໄຊ ແລະ ນາງ ມີ່ມີ່ ສີຊົມຊື່ນ ເສຍໃຫ້ກັບຄູ່ມືວາງອັນດັບ 10 ຈາກເຈົ້າພາບອິນໂດເນເຊຍ ດ້ວຍຄະແນນ 2-0 ເກມ (21-10, 21-11) ແລະ ປິດທ້າວດ້ວຍປະເພດຍິງດ່ຽວ ນາງ ມີ່ມີ່ ສີຊົມຊື່ນ ເສຍໃຫ້ກັບ Lakshmi Priyanka ຈາກປະເທດອິນເດຍ ດ້ວຍຄະແນນ 2-0 ເກມ (21-12, 21-16).