ຄົນຂັບລົດຕຸກໆຢູ່ອັງກໍ ພໍສອນເຮົາຫຍັງໄດ້ແດ່ ?

ເມື່ອບໍ່ດົນຜ່ານມາຜູ້ຂຽນໄດ້ມີໂອກາດໄປຢ້ຽມຢາມ ອັງກໍວັດ ສະຖານທີ່ທ່ອງທ່ຽວ ທີ່ເປັນຫນຶ່ງ 7 ມະຫັດສະຈັນຂອງໂລກ, ແຕ່ມີສິ່ງໜຶ່ງທີ່ສະດຸດໃຈຫຼາຍກໍຄື “ຄົນຂັບລົດຕຸກໆ” ທີ່ເອົາຄ່າບໍລິການສົມເຫດສົມຜົນ, ມີຄວາມສາມາດ ແລະເປັນມິດ!

ຄົນຂັບລົດຕຸກໆຢູ່ອັງກໍວັດ ສະຖານທີ່ທ່ອງທ່ຽວທີ່ສຳຄັນທີ່ສຸດ ຢູ່ແຂວງ ຊຽມລຽບ ປະເທດກຳປູເຈຍ ມີຢ່າງຄັບຄາໜ້າແໜ້ນ ແຕ່ປານນັ້ນເຂົາກໍມີລູກຄ້າບໍ່ອັ້ນ ມັນເປັນເລື່ອງທີ່ໜ້າສຶກສາແທ້ໆ! ແນ່ນອນລະ ການທີ່ມີນັກທ່ອງທ່ຽວປານ ປາງບຸນທາດຫຼວງເກືອບທຸກມື້ ທີ່ສະຖານທ່ອງທ່ຽວແຫ່ງນີ້ ແມ່ນໂອກາດທີ່ສຳຄັນ ຂອງຄົນຂັບລົດຕຸກໆຢູ່ເມືອງດັ່ງກ່າວ, ແຕ່ລະສະຖານທີ່ ອ້ອມແອ້ມຕົວເມືອງ ໂດຍສະເພາະຕໍ່ໜ້າແຕ່ລະໂຮງແຮມ ນັ້ນ ແມ່ນເຕັມແຕ່ ລົດຕຸກໆ ທີ່ຄອຍໃຫ້ບໍລິການແກ່ນັກທ່ອງທ່ຽວ ແລະແຂກຄົນ ທຸກເວລາ.

ຜູ້ຂຽນ ແລະໝູ່ອີກ 2 ຄົນໄດ້ໃຊ້ບໍລິການລົດຕຸກໆ ເພື່ອໄປທ່ອງທ່ຽວ ອັງກໍວັດ! ພວກເຮົາໄດ້ຈ່າຍ 15 ໂດລາ ຫຼື ປະມານ 125, 000 ກີບ ເພື່ອທ່ອງທ່ຽວໝົດມື້ (ມີອັງກໍວັດ, ອັງກໍທົມ ແລະອື່ນໆ ທີ່ໃຊ້ເວລາຫຼາຍຊົ່ວໂມງເພື່ອເລາະທ່ຽວ) ໂດຍລາຄານີ້ເທົ່າກັບລາຄາລົດແທັກຊີ ຈາກສະໜາມບິນວັດໄຕ ຫາ ບ່ອນຜູ້ຂຽນພັກເຊົາ ໂດຍໃຊ້ເວລາບໍ່ຮອດ 40 ນາທີ, ເບິ່ງຄືວ່າບໍ່ສົມເຫດສົມຜົນປານໃດ ຈະເອົາແທັກຊີ ທຽບກັບຕຸກໆ ແຕ່ ຮັບປະກັນວ່າ ແທັກຊີ ກັບລົດຕຸກໆ (ພາສາກຳປູເຈຍ ຮຽກວ່າ “ລະມອກ”) ຢູ່ກຳປູເຈຍນັ້ນ ໃກ້ຄຽງກັນແທ້ໆ!

ສິ່ງທີ່ໜ້າສົນໃຈຫຼາຍກໍຄື ຜູ້ຂັບຄົນຕຸກໆ ຜູ້ທີ່ໄດ້ໃຊ້ບໍລິການນີ້ ອະທິບາຍເລື່ອງລາວຕ່າງໆຂອງສະຖານທີ່ທ່ອງທ່ຽວ ແຕ່ລະບ່ອນ ເປັນພາສາອັງກິດ ໄດ້ຢ່າງຄ່ອງແຄ່ວ ແລະມີການລຳດັບເຫດການ ທາງປະຫວັດສາດ ເຊິ່ງກົງກັບຕຳລາທີ່ຜູ້ຂຽນ ໄດ້ອ່ານເປັນຢ່າງດີ ແລະຍັງໃຫ້ເວລາ ໃນການແວ່ຊົມສະຖານທີ່ຕ່າງໆ ຢ່າງໃຈກວ້າງຂວາງ ປານກັບວ່າ ໄດ້ທັງຜູ້ຂັດລົດ ໄດ້ທັງຜູ້ນຳທ່ຽວ ວ່າຊັ້ນສາ!​

ຜູ້ຂຽນໄດ້ມີໂອກາດເດີນທາງໄປເຮັດວຽກ ຢູ່ກຳປູເຈຍຂ້ອນຂ້າງດຸ ເລີຍມີຄວາມສົງໄສວ່າ ເປັນຫຍັງ ຜູ້ຂັບລົດຕຸກໆ, ຂັບລົດແທັກຊີ ຢູ່ກຳປູເຈຍ ສ່ວນຫຼວງຫຼາຍຈຶ່ງ ສາມາດສື່ສານ ພາສາອັງກິດໄດ້ດີແທ້! ເລີຍໄດ້ສອບຖາມເຂົາເຈົ້າ ຈຳນວນນຶ່ງ ແລ້ວໄດ້ຄຳຕອບວ່າ “ມັນມີການແຂ່ງຂັນລູກຄ້າ ໃຜໄດ້ພາສາອັງກິດຈະໄດ້ປຽບກວ່າ ເພາະລູກຄ້າມັກ ເລີຍເປັນແຮງກະຕຸ້ນໃຫ້ແຕ່ລະຄົນຢາກເວົ້າພາສາອັງກິດໄດ້, ເພາະສະນັ້ນ ບາງຜ່ອງກໍໄປຈ້າງຮຽນ ແຕ່ສ່ວນຫຼາຍ ຊື້ຕຳລາມາອ່ານເອງ ແລະແອບເວົ້າກັບແຂກຄົນເລື້ອຍໆ”.

ແຕ່ໜ້າເຫັນໃຈ ຄົນຕ່າງປະເທດມາລາວ ຈຳນວນນຶ່ງເວົ້າສູ່ຟັງ (ຜູ້ຂຽນກໍເຄີຍຖືກຄືກັນ) ວ່າ “ການບໍລິການລົດຕຸກໆຢູ່ລາວທີ່ໄດ້ພົບເຫັນສ່ວນຫຼາຍ ຄືກັນກັບວ່າ “ເສືອນອນກິນ”, ເມື່ອມີລູກຄ້າມາ ກໍເວົ້າລາຄາແພງໆ” ມີເທື່ອໜຶ່ງ ມີໝູ່ຜູ້ຂຽນເວົ້າວ່າ “ເຂົາໄດ້ໄຖ່ຖາມການບໍລິການລົດຕຸກໆຈາກ ແຖວວັດອິນແປງ ມາຫາ ເຂດວັດໜອງດ້ວງໃຕ້ ໄລຍະທາງໜ້າຈະບໍ່ຮອດ 4 ຫຼັກ ແລ້ວເວົ້າວ່າ ຈະເອົາ 70 ພັນກີບ ເຂົາເລີຍໄດ້ຕັດສິນໃຈຍ່າງເອົາສາ”.

ເມື່ອພວກເຮົາ ສື່ສານກໍຍັງຍາກ ປາກກໍບໍ່ມ່ວນຫູ ລາຄາບໍລິການກໍສູງພຽງເມກ ແລ້ວຊິເອົາຫຍັງມາດຶງດູດນັກທ່ອງທ່ຽວຄືເຂົາ! ການມາທ່ອງທ່ຽວ ຂອງຄົນຕ່າງປະເທດນັ້ນ ການບໍລິການ ການຂົນສົ່ງ ທີ່ມີລາຄາອັນສົມເຫດສົມຜົນ, ການບໍລິການ ແລະການສື່ສານທີ່ດີນັ້ນ ເປັນປັດໄຈສຳຄັນຍິ່ງ, ຖ້າດີແທ້ຜູ້ຂັບລົດຕຸກໆ, ຜູ້ຂັບລົດແຕກຊີ ມີຄວາມຮູ້ທາງປະຫວັດສາດ ຂອງແຫຼ່ງທ່ອງທ່ຽວສະຖານທີ່ຕ່າງໆ ໃນຕົວເມືອງກໍດີຫຼາຍເນາະ!  ສິ່ງທັງໝົດນັ້ນ ຄົນຂັບລົດຕຸກໆ ຢູ່ກຳປູເຈຍ ໄດ້ກະຕຸ້ນໃຫ້ເຮົາຕ້ອງຮີບຟ້າວປັບປຸງຕົນເອງແລ້ວລະ!