ຫລັກການເລືອກຊື້ເກີບມືສອງຢ່າງກຸ້ມຄ່າກຸ້ມລາຄາ
ຫລາຍຄົນທີ່ມີລົດສະນິຍົມຄວາມມັກໃນເກີບມືສອງ ເພາະມີລາຄາຖືກ ຫລື ບາງຍີ່ຫໍ້ຊອກຊື້ມືໜຶ່ງບໍ່ໄດ້ ຫລື ຕ້ອງນຳເຂົ້າຈາກຕ່າງປະເທດ ລວມເຖິງຮູບຊົງ, ສີກໍຍັງບໍ່ເປັນທີ່ພໍໃຈ. ດັ່ງນັ້ນ ກ່ອນທີ່ເຮົາຈະຕັດສິນໃຈຈ່າຍເງິນຊື້ເກີບມືສອງກໍຕ້ອງມີວິທີເລືອກ ແລະ ກວດເຊັກສະພາບເກີບມືສອງກັນກ່ອນວ່າສະພາບແບບໃດ ຄວນຊື້ ຫລື ບໍ່ຄວນຊື້ ມື້ນີ້ພວກເຮົາມີຄຳແນະນຳດີໆມາຝາກ.
– ເກີບມືສອງຍີ່ຫໍ້ດັງໆນັ້ນຫາກເຮົາຈະເບິ່ງວ່າຄູ່ໃດເປັນຂອງແທ້ ຫລື ຂອງທຽມ ກໍຕ້ອງໃຊ້ປະສົບການລ້ວນໆ ຫລື ງ່າຍທີ່ສຸດແມ່ນຊອກຫາຂໍ້ມູນໃນອິນເຕີເນັດ, ເບິ່ງສະພາບພາຍນອກ, ຮູບຊົງເກີບຕ້ອງຍັງດີຢູ່, ບໍ່ແມ່ນບິດບ້ຽວ ຫລື ຍໍ່ຈົນໃສ່ບໍ່ໄດ້.
– ພື້ນເກີບ ເບິ່ງວ່າແມ່ນພື້ນເກີບເກົ່າ ຫລື ປ່ຽນພື້ນໃໝ່ ຖ້າຊື້ໃນເນັດຕ້ອງຂໍເບິ່ງຮູບຫລາຍມຸມ ເພາະບາງເທື່ອເກີບມືສອງເບິ່ງຜ່ານໆພາຍນອກອາດຈະງາມ, ແຕ່ພື້ນເກີບທາງໃນອາດເປື່ອຍຈົນບໍ່ເປັນຕາເອົາ, ຄິດໄລ່ຄ່າສ້ອມແປງ ຫລື ປ່ຽນພື້ນໃໝ່ແລ້ວບາງເທື່ອຊື້ຄູ່ໃໝ່ຍັງຖືກກ່ວາ.
– ເກີບມືສອງທີ່ຜ່ານການສ້ອມແປງມາແລ້ວ ເຊັ່ນ : ຕິດກາວ, ຍຳ້ກາວໃໝ່ ຕ້ອງເບິ່ງຄາບກາວນຳວ່າກາວເປື້ອນ ຫລື ເສື່ອມສະພາບແລ້ວຫລືບໍ່.
– ປ້າຍໂລໂກ້ ເກີບມືສອງມີຍີ່ຫໍ້ແທ້ບໍ່ແທ້ຕ້ອງສັງເກດປ້າຍເປັນອັນດັບທຳອິດ, ຜະລິດຈາກປະເທດໃດ, ໂຕອັກສອນເທິງປ້າຍຜິດພ້ຽນຫລືບໍ່.
ໄດ້ເກີບມືສອງຖືກໃຈ ແລະ ມີໄວ້ໃນຄອບຄອງແລ້ວ ກ່ອນຈະໃສ່ຄວນເອົາມາເຮັດຄວາມສະອາດ ຖ້າເປັນເກີບຜ້າກໍຄວນຊັກ ແລະ ຕາກແດດເພື່ອຫລຸດກິ່ນອັບຊຸ່ມ ແຕ່ບໍ່ຄວນຕາກແດດກ້າໆ ເພາະຈະເຮັດໃຫ້ຄາບກາວຫລຸດລອກໄດ້. ສ່ວນເກີບໜັງໃຫ້ໃຊ້ນຳ້ຢາຜັດຖູເພື່ອໃຫ້ໜັງເຫລື້ອມງາມຂຶ້ນ.
