ພຽງແຕ່ທ່ານອົດນອນ ພູມຕ້ານທານຮ່າງກາຍກໍອ່ອນແອ

ການອົດນອນເຮັດໃຫ້ລະບົບພູມຕ້ານທານຂອງຮ່າງກາຍຫລຸດລົງ ໂດຍການອົດນອນຈະເຮັດໃຫ້ລະບົບພູມຕ້ານທານຂອງຮ່າງກາຍເຮັດວຽກໜັກຂຶ້ນ ເຊິ່ງເລືອດຈະມີເມັດເລືອດຂາວເພີ່ມຂຶ້ນ ແລະ ເມັດເລືອດຂາວເຫລົ່ານີ້ຈະສະຫລາຍໂຕໃນເວລາຕໍ່ມາ ຈຶ່ງເຮັດໃຫ້ຄວາມສາມາດຂອງຮ່າງກາຍໃນການຕ້ານທານຕໍ່ເຊື້ອແບັກທີເຣຍ ແລະ ເຊື້ອໄວຣັສເສຍໄປ.

ລະບົບຈັດເກັບຄວາມຊົງຈຳ  ຫລື ລະບົບປະສາດຈະມີປະສິດທິພາບຫລຸດລົງ ໂດຍອະໄວຍະວະທີ່ສຳຄັນແມ່ນຮິບໂປແຄມປັສ ຫລື (Hippocampus) ຈະເຮັດໜ້າທີ່ຖ່າຍໂອນຂໍ້ມູນທີ່ຮຽນຮູ້ໃນແຕ່ລະມື້ເຂົ້າສູ່ຄວາມຊົງຈຳໄລຍະຍາວ ເຊິ່ງອະໄວຍະວະນີ້ຈະເຮັດວຽກຕອນທີ່ເຮົານອນຫລັບເທົ່ານັ້ນ ແລະ ຈະເຮັດວຽກໄດ້ດີຫາກຮ່າງກາຍໄດ້ຮັບການພັກຜ່ອນຢ່າງພຽງພໍ.

ອາລົມເຄັ່ງຄຽດ ແລະ ປ່ຽນແປງໄດ້ງ່າຍໂດຍບໍ່ມີເຫດຜົນ, ມີອາການງ່ວງນອນ ຫລື ຮູ້ສຶກບໍ່ສົດຊື່ນໝົດມື້.

ລະບົບການຍ່ອຍອາຫານຜິດປົກກະຕິ ໂດຍຮ່າງກາຍຈະຕ້ອງໃຊ້ເວລາຫລາຍຂຶ້ນເຖິງ 40% ເພື່ອຈັດການກັບລະດັບນຳ້ຕານໃນເລືອດຫລັງກິນອາຫານປະເພດຄາໂບໄຮເດຣດ ແລະ ການມີລະດັບນຳ້ຕານໃນເລືອດສູງດົນໆຈະເຮັດໃຫ້ເຖົ້າໄວ.

ຫາກເຮົາອົດນອນດົນ 1 ອາທິດ ຫລື ນອນມື້ລະ 4 ຊົ່ວໂມງໂດຍປະມານ ຮ່າງກາຍຈະຜະລິດຮໍໂມນທີ່ຈຳເປັນໃນການຄວບຄຸມປະລິມານກ້າມຊີ້ນ ແລະ ໄຂມັນໜ້ອຍລົງ ເຮັດໃຫ້ຮ່າງກາຍສະສົມໄຂມັນຫລາຍຂຶ້ນ.

ຫາກຄົນເຮົານອນບໍ່ເຖິງມື້ລະ 8 ຊົ່ວໂມງ ຮ່າງກາຍກໍຈະຜະລິດສານເລບຕິນ (Leptin) ໜ້ອຍລົງ ເຊິ່ງເລບຕິນມີບົດບາດໃນການຄວບຄຸມຄວາມຢາກອາຫານ ສະນັ້ນຍິ່ງເຮົາອົດນອນ ເລບຕິນກໍຈະຖືກຜະລິດອອກມາໜ້ອຍລົງ ເຮັດໃຫ້ເຮົາມີຄວາມຢາກອາຫານເພີ່ມຂຶ້ນ ເຊັ່ນ : ຢາກກິນເຂົ້າໜົມຫວານ ແລະ ອາຫານມັນໆ ເຊິ່ງເປັນອຸປະສັກຕໍ່ການຄວບຄຸມ ແລະ ຫລຸດນຳ້ໜັກໄດ້.

ສູນເສຍໂອກາດທີ່ຮ່າງກາຍຈະຫລັ່ງໂກ໊ດຮໍໂມນ (Growth hormone) ໃນຂະນະຫລັບ ເຊິ່ງໂກ໊ດຮໍໂມນຈະຊ່ວຍໃຫ້ທ່ານເບິ່ງອ່ອນກ່ວາອາຍຸ ໂດຍການສ້າງຄວາມດຸ່ນດ່ຽງລະບົບການເຜົາຜານອາຫານ ແລະ ຊ່ວຍຟື້ນຟູແຊນຕ່າງ ດັ່ງນັ້ນ ຫາກຂາດຮໍໂມນຊະນິດນີ້ ຜິວໜັງກໍຈະຍານ ແລະ ຫ່ຽວໄວໄດ້.

ໃນດ້ານຂອງຜິວໜັງ ສານເມລາໂທນີນເປັນສານທີ່ມີບົດບາດສຳຄັນໃນການປົກປ້ອງແຊນຜິວໜັງຈາກສານອະນຸມູນອິດສະລະຕ່າງໆ ແລະ ສານເມລາໂທນິນຈະຖືກສ້າງຫລາຍທີ່ສຸດໃນຕອນກາງຄືນຂະນະທີ່ເຮົານອນຫລັບ ຖ້າເຮົາອົດນອນ ຫລື ນອນໜ້ອຍກໍຈະເຮັດໃຫ້ມີການສ້າງສານນີ້ຫລຸດລົງ ສົ່ງຜົນໃຫ້ເກີດການອັກເສບ ຫລື ພູມແພ້ຂອງຜິວໜັງໄດ້ງ່າຍ.