ປະທານຄະນະກວດກາສູນກາງພັກຕີລາຄາສູງຕໍ່ການຮັກສາສະຖຽນລະພາບເງິນຕາແຫ່ງຊາດຂອງທະນາຄານ

ໃນໂອກາດເຂົ້າຮ່ວມກອງປະຊຸມເປີດກ້ວາງຄະນະບໍລິຫານງານພັກທະນາຄານແຫ່ງ ສປປ ລາວ (ທຫລ) ຄັ້ງທີ 6 ສະໄໝທີ III ຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງໃນວັນທີ 30 ມີນານີ້. ສະຫາຍເລຂາຄະນະພັກ ທຫລ ໄດ້ລາຍງານສະພາບການເຄື່ອນໄຫວຊີ້ນໍາ ນໍາພາຮອບດ້ານຂອງຄະນະບໍລິຫານງານພັກ ທຫລ ໃນປີ 2017 ຜ່ານມາ ໃຫ້ສະຫາຍຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ຮັບຊາບ ໂດຍສະເພາະໃນ ໜຶ່ງປີຜ່ານມານີ້ ພາຍໃຕ້ການ ຊີ້ນໍາ ນໍາພາຂອງຄະນະພັກ ທຫລ ສາມາດຍາດໄດ້ຜົນສໍາເລັດໃນຫຼາຍດ້ານ ເປັນຕົ້ນ ຍັງສືບຕໍ່ຮັກສາ ສະຖຽນລະພາບເງິນຕາແຫ່ງຊາດ ໄດ້ໃນລະ ດັບດີສົມຄວນ; ອັດຕາເງິນເຟີ້ຢູ່ໃນລະດັບໜຶ່ງຕົວເລກ ຕໍ່າກ່ວາອັດຕາການຂະຫຍາຍ ຕົວຂອງເສດຖະກິດ, ປະລິມານເງິນ (M2) ຂະຫຍາຍຕົວໃນ ລະດັບຕໍ່າກ່ວາແຜນການ, ອັດຕາແລກປ່ຽນມີຄວາມສະຫງົບໂດຍ ພື້ນຖານ, ຄັງສໍາຮອງເງິນຕາຕ່າງປະເທດກຸ້ມການນໍາເຂົ້າຕາມແຜນກໍານົດ; ການ ຄຸ້ມຄອງທະນາຄານ ແລະ ສະຖາບັນການເງິນ ກໍມີ ທ່ວງທ່າດີຂຶ້ນ; ສໍາລັບວຽກງານຂໍ້ມູນຕ້ານການຟອກເງິນ ແລະ ການສະໜອງທຶນ ໃຫ້ແກ່ການ ກໍ່ການຮ້າຍ ໄດ້ຮັບຜົນຄືບໜ້າເປັນກ້າວໆ ບັນຫາພົ້ນເດັ່ນກໍແມ່ນຜົນສໍາເລັດຂອງ ສປປ ລາວທີ່ໄດ້ຖືກຖອນອອກຈາກບັນຊີຕິດຕາມ (ບັນຊີສີເທົາ ເຂັ້ມ) ຂອງອົງການຕ້ານການຟອກເງິນສາກົນມາຢູ່ບັນຊີປົກກະຕິໃນກາງປີ 2017; ວຽກງານຄຸ້ມຄອງຫຼັກຊັບ ແລະ ຕະຫຼາດຫຼັກຊັບກໍມີບາດກ້າວ ຂະຫຍາຍຕົວດີສົມຄວນ.

ໃນຕະຫຼອດ 3 ມື້ຂອງກອງປະຊຸມ, ບັນດາສະຫາຍຜູ້ແທນຂອງກອງປະຊຸມ ຍັງໄດ້ພ້ອມກັນຄົ້ນຄ້ວາເຊື່ອມຊຶມ ແລະ ກໍາແໜ້ນບັນດາ ບັນຫາຕ່າງໆໃນຜ່ານມາ ແລະ ຕໍ່ໜ້າ, ໃນນີ້ ຍັງມີການປະກອບຄໍາຄິດຄໍາເຫັນໃສ່ບົດສະຫຼູບການເຄື່ອນໄຫວຊີ້ນໍາ ນໍາພາຮອບດ້ານຂອງຄະນະພັກ ທຫລ ດ້ວຍບັນຍາກາດສ້າງສັນທີ່ສ່ອງແສງໃຫ້ເຫັນໝາກຜົນແຫ່ງການເຄື່ອນໄຫວຊີ້ນໍາ ແລະ ນໍາພາຂອງຄະນະບໍລິຫານງານພັກ ທຫລ ໃນໜຶ່ງປີ 2017 ຜ່ານມາ, ພ້ອມທັງ ຜ່ານທິດທາງແຜນການຈັດຕັ້ງປະຕິບັດໃນຕໍ່ໜ້າ; ພ້ອມນັ້ນ ທີ່ປະຊຸມຍັງໄດ້ຮັບຟັງການລາຍງານການຈັດຕັ້ງປະຕິບັດ ວຽກງານສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ (SME); ແນວທາງການປັບປຸງຖານະການເງິນ ຂອງທະນາຄານທຸລະກິດລັດ ຈໍານວນໜຶ່ງ; ລາຍງານການຄຸ້ມຄອງສະຖາບັນການເງິນ; ຄົ້ນຄ້ວາການປັບປຸງນະໂຍບາຍອັດຕາແລກປ່ຽນ ແລະ ການຄຸ້ມຄອງເງິນຕາຕ່າງປະເທດ ແລະ ຮັບຟັງການເຜີຍແຜ່ ເຊື່ອມຊຶມບັນດາ ມະຕິ ຄໍາສັ່ງທີ່ສໍາຄັນຈໍານວນໜຶ່ງຂອງພັກ ແລະ ລັດ.

ສະຫາຍ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ໄດ້ຕີລາຄາສູງຕໍ່ການຊີ້ນໍາ-ນໍາພາຂອງບັນດາສະຫາຍຄະນະພັກ ທຫລ ໃນປີ 2017 ຜ່ານມາ ໂດຍສະເພາະຍັງສືບຕໍ່ໃນການຮັກສາສະຖຽນລະພາບເງິນຕາແຫ່ງຊາດ  ໂດຍລວມມີຄວາມໝັ້ນທ່ຽງ; ອັດຕາແລກ ປ່ຽນມີການເໜັງຕີງບາງໄລຍະ ແຕ່ກໍສາມາດຄວບຄຸມໄດ້ ແລະ ປະຕິບັດຕາມຂອບທີ່ກໍານົດໄວ້, ປະລິມານເງິນ (M2) ຂະຫຍາຍຕົວໃນລະດັບຕົວ ທີ່ກໍານົດໄວ້, ຊຸກຍູ້ສົ່ງເສີມທະນາຄານທຸລະກິດ ປະກອບສ່ວນສະໜອງສິນເຊື່ອຊຸກຍູ້ ສົ່ງເສີມວິສາຫະກິດຂະໜາດກາງ ແລະ ຂະໜາດນ້ອຍ ປະ ກອບສ່ວນສ້າງຄວາມເຂັ້ມແຂງໃຫ້ແກ່ພື້ນຖານເສດຖະກິດແຫ່ງຊາດ ຕິດພັນກັບການແກ້ໄຂຄວາມທຸກຍາກ ແລະ ວຽກງານ 3 ສ້າງ; ຄຽງຄູ່ກັນ ນັ້ນ ສະຫາຍຮອງນາຍົກລັດຖະມົນຕີ, ຍັງໄດ້ເນັ້ນໃຫ້ຜູ້ແທນກອງປະຊຸມ ຕ້ອງສືບຕໍ່ເສີມຂະຫຍາຍມູນເຊື້ອອັນດີ ເດັ່ນເຂົ້າໃນການຈັດຕັ້ງປະຕິບັດໜ້າທີ່ການເມືອງຂອງຕົນ ແລະ  ແກ້ໄຂຈຸດອ່ອນ ຂໍ້ຄົງຄ້າງໃຫ້ດີຂຶ້ນເປັນກ້າວໆ.