ລັດຖະມົນຕີປ້ອງກັນປະເທດລົງຊຸກຍູ້ວຽກງານກໍ່ສ້າງຮາກຖານ-ການເມືອງແຂວງໄຊສົມບູນ
ເມື່ອອາທິດຜ່ານມານີ້, ທ່ານລັດຖະມົນຕີກະຊວງປ້ອງກັນປະເທດ ພົນໂທ ຈັນສະໝອນ ຈັນຍາລາດ, ພ້ອມຄະນະ, ໄດ້ລົງເຄື່ອນໄຫວຊີ້ນໍາວຽກງານກໍ່ສ້າງ ຮາກຖານ-ການເມືອງ ແລະ ພັດທະນາແຂວງໄຊສົມບູນ ແລະ ໄດ້ຮັບຟັງລາຍງານຈາກທ່ານພັນໂທ ຈັນທີ ວັນດາວົງ ຫົວໜ້າການເມືອງກອງບັນຊາການທະຫານແຂວງໄຊສົມບູນວ່າ: ໃນໄລຍະຜ່ານມາ, ໄດ້ສຸມໃສ່ວຽກງານກໍ່ສ້າງຮາກຖານການເມືອງ, ເພື່ອສ້າງຄວາມສາມັກຄີປອງດອງ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ, ໄປຄຽງຄູ່ກັບວຽກງານປ້ອງກັນຊາດ-ປ້ອງກັນຄວາມສະຫງົບ, ໂດຍສະເພາະສຸມໃສ່ປັບປຸງລະບົບການຈັດຕັ້ງ, ການປົກຄອງແຕ່ຂັ້ນແຂວງລົງຮອດຂັ້ນບ້ານໃຫ້ມີຄວາມໜັກແໜ້ນເຂັ້ມແຂງ, ປັບປຸງແບບແຜນວິທີເຮັດວຽກຂອງສະມາຊິກພັກ-ພະນັກງານໃຫ້ຖືກຕ້ອງຕາມລະບຽບຫລັກການ ແລະ ແບ່ງການຄຸ້ມຄອງຢ່າງຈະແຈ້ງ ເພື່ອເຮັດໃຫ້ແຂວງໄຊສົມບູນນັບມື້ມີການການພັດທະນາດີຂຶ້ນເປັນກ້າວໆ.
ໃນໂອກາດນີ້, ທ່ານລັດຖະມົນຕີກະຊວງປ້ອງກັນປະເທດ ໄດ້ຊີ້ນໍາໃຫ້ຄະນະຮັບຜິດຊອບໃນຂະແໜງການກ່ຽວຂ້ອງຕ່າງໆເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ປະຊາຊົນເພື່ອເຂົ້າໃຈເລິກຕໍ່ແນວທາງນະໂຍບາຍຂອງພັກ, ຕ້ານ ແລະ ສະກັດກັ້ນໜໍ່ແໜງປາກົດການຫຍໍ້ທໍ້ຕ່າງໆໃນສັງຄົມ, ສືບຕໍ່ພັດທະນາເສດຖະກິດ-ສັງຄົມ ໃຫ້ໄດ້ຮັບການພັດທະນາ, ເອົາໃຈໃສ່ວຽກງານກໍ່ສ້າງຮາກຖານ-ການເມືອງ ແລະ ພັດທະນາຊົນນະບົດຕາມ 4 ເນື້ອໃນ 4 ຄາດໝາຍ, ປັບປຸງກຳລັງປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມໜັກແໜ້ນເຂັ້ມແຂງ, ປັບປຸງລະບົບການເມືອງພື້ນຖານໂຄງລ່າງເສດຖະກິດ-ສັງຄົມ, ສ້າງຄວາມໝັ້ນຄົງປະຊາທິປະໄຕ, ເພີ່ມທະວີຄວາມສາມັກຄີທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນ ແນໃສ່ສ້າງແຂວງໄຊສົມບູນໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ.
