ຝຣັ່ງຮັກສາຄວາມປອດໄພເຂັ້ມເລືອກຕັ້ງມື້ນີ້
ຕຳຫລວດກວ່າ 50.000 ຄົນ ຖືກສົ່ງໄປປະຈຳການຕາມໜ່ວຍເລືອກຕັ້ງ 70.000 ແຫ່ງທົ່ວປະເທດ ໂດຍມີທະຫານ 7.000 ຄົນ ລາດຕະເວນເພີ່ມອີກ. ໜ່ວຍເລືອກຕັ້ງເປີດນັບແຕ່ເວລາ 08:00-20:00 ວັນທີ 23 ເມສາ ຕາມເວລາຝຣັ່ງ ກົງກັບເວລາ 13:00 ໂມງ ວັນທີ 23 ເມສາ ຫາ 01:00 ໂມງ ວັນທີ 24 ເມສາ ຕາມເວລາຢູ່ລາວ, ມີຜູ້ມີສິດເລືອກຕັ້ງເກືອບ 47 ລ້ານຄົນ ຈາກປະຊາກອນທັງໝົດເກືອບ 65 ລ້ານຄົນ. ຂະນະທີ່ທົ່ວໂລກເຝົ້າເບິ່ງການເລືອກຕັ້ງເທື່ອນີ້ຢ່າງໃກ້ຊິດວ່າ: ກະແສປະຊານິຍົມຍັງແຂງແຮງ ຫລື ເລີ່ມເຊື່ອມລົງ, ພາຍຫລັງໄດ້ເຫັນຝ່າຍສະໜັບສະໜູນການແຍກສະຫະລາຊະອານາຈັກອອກຈາກສະຫະພາບເອີຣົບຊະນະການລົງປະຊາມະຕິໃນເດືອນມິຖຸນາປີກ່ອນ ແລະ ອາເມລິກາໄດ້ຜູ້ນຳຝ່າຍຂວາ ຄືທ່ານ ໂດນັນ ທຣຳ.
ຜູ້ສະໝັກຊີງຕຳແໜ່ງປະທານາທິບໍດີທັງ 11 ຄົນ ມີຜູ້ສຳຄັນພຽງ 4 ຄົນ ໄດ້ແກ່ທ່ານນາງ ມາຣີນ ເລີ ເປນ ອາຍຸ 48 ປີ ຫົວໜ້າພັກເນເຊິນນໍຟຣອນ, ທ່ານ ເອັມມານູເອລ ມາຄຣົງ ອາຍຸ 39 ປີ ຫົວໜ້າພັກອອງມາດ, ທ່ານ ຟຣັງຊົວ ຟີຍົງ ອະດີດນາຍົກລັດຖະມົນຕີ ອາຍຸ 63 ປີ ຕົວແທນພັກເຣປູບລິແກງ ແລະ ທ່ານ ໝອງ ລຸກ ເມລອງຊົງ ອາຍຸ 65 ປີ ຫົວໜ້າກຸ່ມອັນຊັບມິສຊີບຟຣານ ໂດຍທ່ານນາງ ເລີ ເປນ ແລະ ທ່ານ ມາຄຣົງ ເປັນຜູ້ຖືກຄາດວ່າຈະໄດ້ເຂົ້າໄປຊີງໄຊໃນຮອບ 2 ວັນທີ 7 ພຶດສະພາ. ການຫາສຽງໃນຫລາຍເດືອນຜ່ານມາເຕັມແຕ່ເລື່ອງລາວທີ່ເຮັດໃຫ້ຊາວຝຣັ່ງ 20-30% ເຜີຍວ່າອາດບໍ່ໄປໃຊ້ສິດເລືອກຕັ້ງ ແລະ 30% ຍັງບໍ່ຕັດສິນໃຈວ່າຈະເລືອກໃຜ.
