ຣັດເຊຍຂັບໄລ່ນັກການທູດອາເມລິກາ 60 ຄົນ-ປິດສະຖານກົງສຸນ
ລັດຖະມົນຕີຕ່າງປະເທດຣັດເຊຍເປີດເຜີຍລັດຖະບານມົດສະກູຈະຂັບໄລ່ນັກການທູດອາເມລິກາ 60 ຄົນອອກນອກປະເທດ ແລະ ປິດສະຖານກົງສຸນອາເມລິກາໃນເມືອງເຊນປິເຕີສເບິກ ອັນເປັນມາດຕະການຕອບໂຕ້ອັນເນື່ອງມາຈາກພົບສານພິດຮ້າຍແຮງໃນສາຍລັບທີ່ອັງກິດ.
ສຳນັກຂ່າວຕ່າງປະເທດລາຍງານຈາກນະຄອນຫລວງມົດສະກູ ປະເທດຣັດເຊຍ ໃນວັນທີ 30 ມີນາວ່າ: ທ່ານ ເຊີເກ ລາຟຣອຟ ລັດຖະມົນຕີຕ່າງປະເທດຣັດເຊຍ ຖະແຫລງວ່າ: ລັດຖະບານມົດສະກູຈະສັ່ງຂັບໄລ່ນັກການທູດອາເມລິກາ 60 ຄົນອອກນອກປະເທດ ແລະ ປິດສະຖານກົງສຸນອາເມລິກາໃນເມືອງເຊນປີເຕີສເບິກ ໂດຍເອກອັກຄະລາຊະທູດອາເມລິກາປະຈຳນະຄອນຫລວງມົດສະກູໄດ້ຮັບຮູ້ເລື່ອງມາດຕະການຕອບໂຕ້ນີ້ແລ້ວ ອັນເນື່ອງມາຈາກລັດຖະບານຣັດເຊຍຖືກກ່າວຫາວ່າຢູ່ເບື້ອງຫລັງການໃຊ້ສານພິດຮ້າຍແຮງກັບທ່ານ ເຊີເກ ສຕຣີພັລ ອາຍຸ 66 ປີສາຍລັບຂອງຣັດເຊຍ ແລະ ລູກສາວ ຢູ່ເມືອງຊາລິສບິວຣີ ທາງຕາເວັນຕົກສຽງໃຕ້ຂອງອັງກິດ ໃນວັນທີ 4 ມີນາຜ່ານມາ ເຊິ່ງລາຍງານຫລ້າສຸດຈາກໂຮງໝໍທີ່ຮັບປິ່ນປົວພົບວ່າ: ນາງ ຢູເລຍ ອາການພົ້ນຂີດອັນຕະລາຍແລ້ວ, ມີສະຕິ ແລະ ສາມາດເວົ້າໄດ້ແລ້ວ.
