ລາວ ແລະ ສາກົນຮ່ວມຫາລືຊ່ອງທາງແກ້ໄຂສິ່ງທ້າທາຍດ້ານການຄ້າ-ການລົງທຶນ.  

ໃນວັນທີ 28 ມີນານີ້, ກະຊວງອຸດສາຫະກຳ ແລະ ການຄ້າ ແລະ ສະຫະພາບເອີຣົບປະຈໍາລາວ ໄດ້ຈັດກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນຄັ້ງທີ XII ເພື່ອປຶກສາຫາລືຊ່ອງທາງແກ້ໄຂສິ່ງທ້າທາຍຕ່າງໆດ້ານການຄ້າ-ການລົງທຶນ, ພາຍຫລັງເຫັນວ່າສາກົນໄດ້ຈັດອັນດັບຄວາມສະດວກໃນການດໍາເນີນທຸລະກິດຢູ່ລາວໃນລະດັບທີ່ສູງສົມຄວນ ໂດຍການເປັນປະທານຂອງລັດຖະມົນຕີກະຊວງອຸດສາຫະກໍາ ແລະ ການຄ້າ ທ່ານນາງ ເຂັມມະນີ ພົນເສນາ ແລະ ທ່ານ ລີໂອ ຟາເບີ ເອກອັກຄະລັດຖະທູດສະຫະພາບເອີຣົບ ຕາງໜ້າໃຫ້ບັນດາອົງການທີ່ໃຫ້ທຶນໂຄງການເຊື່ອມໂຍງສາກົນດ້ານ ການຄ້າປະຈຳລາວ, ພ້ອມດ້ວຍພາກສ່ວນກ່ຽວຂ້ອງຕ່າງໆເຂົ້າຮ່ວມ.
ກອງປະຊຸມຄັ້ງນີ້, ໄດ້ປຶກສາຫາລືບັນຫາສໍາຄັນຕ່າງໆທີ່ສົ່ງຜົນກະທົບຕໍ່ການດຳເນີນທຸລະກິດ ແລະ ການຕັດສິນໃຈໃນການລົງທຶນໃນ ສປປ ລາວ ເປັນຕົ້ນການສຶກສາກ່ຽວກັບຄ່າຂົນສົ່ງໃນລາວ, ຄວາມຄືບໜ້າຂອງການຈັດຕັ້ງປະຕິບັດກົດໝາຍສົ່ງເສີມການລົງທຶນສະບັບປັບປຸງ ແລະ ຄຳສັ່ງຂອງນາຍົກລັດຖະມົນຕີວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດ ແລະ ໂຄງການພັດທະນາການຄ້າ ແລະ ຄວາມສາມາດໃນການແຂ່ງຂັນຂອງ ສປປ ລາວ ໄລຍະໃໝ່ ໂດຍເນັ້ນໃສ່ບັນດາຂໍ້ຫຍຸ້ງຍາກທີ່ສົ່ງຜົນກະທົບຕໍ່ຄວາມສາມາດໃນການແຂ່ງຂັນທຸລະກິດລາວ ລວມເຖິງຄ່າຂົນສົ່ງທີ່ມີຄ່າສູງ ແລະ ຄວາມຄືບໜ້າໃນນະໂຍບາຍຂອງລັດ ແລະ ມາດຕະການເພື່ອປັບປຸງສະພາບແວດລ້ອມທຸລະກິດ ແລະ ວິທີແກ້ໄຂສິ່ງທ້າທາຍຕ່າງໆ.

ທ່ານລັດຖະມົນຕີ ກ່າວວ່າ: ການສ້າງຄວາມພ້ອມດ້ານຕ່າງໆເພື່ອໃຫ້ປະເທດເຮົາສາມາດເຊື່ອມໂຍງກັບສາກົນ ແລະ ເຂົ້າຮ່ວມເສດຖະກິດໂລກນັ້ນ ແມ່ນສ່ວນສໍາຄັນໜຶ່ງໃນການຫລຸດຜ່ອນຄວາມທຸກຍາກຂອງປະຊາຊົນ ແລະ ເປົ້າໝາຍຫລຸດພົ້ນອອກຈາກສະພາບປະເທດດ້ອຍພັດທະນາປາກົດຜົນເປັນຈິງ ໃນປີ 2020.
ທ່ານ ລີໂອ ຟາບຽງ ກ່າວວ່າ: ການປຶກສາຫາລືທີ່ເນັ້ນໃສ່ຫົວຂໍ້ຕົ້ນທຶນການຂົນສົ່ງ ແລະ ການຈັດອັນດັບຄວາມຍາກງ່າຍໃນການດຳເນີນທຸລະກິດໃນ ສປປ ລາວ ຂອງກຸ່ມທະນາຄານໂລກໃນຄັ້ງນີ້ ໄດ້ສະແດງໃຫ້ເຫັນວ່າລັດຖະບານມີຄວາມພະຍາຍາມທີ່ຈະເລັ່ງແກ້ໄຂຂອດຫຍຸ້ງຍາກຕ່າງໆຕໍ່ການດໍາເນີນທຸລະກິດ ແລະ ການຄ້າໃຫ້ໝົດໄປ.

ແນວໃດກໍຕາມ, ທ່ານລັດຖະມົນຕີກະຊວງແຜນການ ແລະ ການລົງທຶນ ສຸພັນ ແກ້ວມີໄຊ ໄດ້ເປີດເຜີຍໃນກອງປະຊຸມເປີດກວ້າງລັດຖະບານເມື່ອບໍ່ດົນມານີ້ວ່າ: ການປັບປຸງຄວາມສະດວກໃນການດໍາເນີນທຸລະກິດຂອງພາກເອກະຊົນຕາມກົນໄກການລົງທຶນຜ່ານປະຕູດຽວທີ່ໄດ້ກໍານົດໃນກົດໝາຍສົ່ງເສີມການລົງທຶນ ສະບັບປັບປຸງປີ 2016 ເຫັນວ່າໄດ້ສ້າງຄວາມຈະແຈ້ງຕໍ່ຂອດຂັ້ນການອະນຸຍາດລົງທຶນແລ້ວ, ແຕ່ໃນພາກປະຕິບັດເຫັນວ່າສະພາບລວມຂອງການອະນຸຍາດລົງທຶນ ແລະ ການດໍາເນີນພາຍຫລັງໄດ້ຮັບອະນຸຍາດຍັງມີຄວາມຫຍຸ້ງຍາກ, ມີຫລາຍຂອດຂັ້ນ ແລະ ບໍ່ເອື້ອອໍານວຍເທົ່າທີ່ຄວນ. ຕໍ່ສະພາບດັ່ງກ່າວ ທະນາຄານໂລກໄດ້ສໍາຫລວດຂະແໜງການກ່ຽວຂ້ອງ ແລະ ປະເມີນຈັດອັນດັບຂອງຄວາມສະດວກໃນການດໍາເນີນທຸລະກິດຢູ່ປະເທດເຮົາໃນທຸກໆປີເຫັນວ່າໃນປີ 2014 ຢູ່ອັນດັບ 134, ປີ 2016 ຫຍັບຂຶ້ນອັນດັບ 139 ແລະ ໃນປີ 2017 ຢູ່ອັນດັບ 141 ໃນຈໍານວນ 190 ປະເທດໃນໂລກ. ຈາກບັນຫາທີ່ໜ້າເປັນຫວ່ງດັ່ງກ່າວ ລັດຖະບານຈຶ່ງໄດ້ອອກຄໍາສັ່ງເລກທີ 02/ນຍ, ລົງວັນທີ 1/2/2018 ວ່າດ້ວຍການປັບປຸງບັນດາລະບຽບການ ແລະ ກົນໄກການປະສານງານໃນການດໍາເນີນທຸລະກິດຢູ່ ສປປ ລາວ ໂດຍເນັ້ນໃຫ້ຂະແໜງການກ່ຽວຂ້ອງຮີບຮ້ອນແກ້ໄຂອັນດັບຂອງຕົວຊີ້ວັດສໍາຄັນຄື: ການຂໍອະນຸຍາດປຸກສ້າງ, ການຂຶ້ນທະບຽນຊັບສິນ, ການເຂົ້າເຖິງສິນເຊື່ອ, ການບັງຄັບໃຊ້ສັນຍາ, ການຄ້າຂ້າມແດນ, ການເສຍອາກອນ, ການຕິດຕັ້ງໄຟຟ້າ, ການເລີ່ມຕົ້ນທຸລະກິດ, ການປົກປ້ອງຜູ້ລົງທຶນຂະໜາດນ້ອຍ ແລະ ການຢັ້ງຢືນການລົ້ມລະລາຍ ເຊິ່ງມາຮອດປັດຈຸບັນ, ກະຊວງແຜນການ ແລະ ການລົງທຶນ ກໍາລັງກະກຽມແຜນດໍາເນີນງານ ເພື່ອປະສານກັບຂະແໜງການຕ່າງໆໃນການແກ້ໄຂບັນຫາຂອດຫຍຸ້ງຍາກໃນແຕ່ລະບາດກ້າວ.