ຄຳມ່ວນ ອະນຸຍາດໃຫ້ບໍລິສັດເອກະຊົນສຶກສາ-ສຳຫຼວດແຫຼ່ງທ່ອງທ່ຽວ 4 ແຫ່ງ ໃນເມືອງຫີນບູນ
ບໍລິສັດ ອິນທຣາໂຄໂປເຣຊັນ ຈຳກັດ ໄດ້ຮັບການອະນຸຍາດໃຫ້ສຶກສາ-ສຳຫຼວດຄວາມເປັນໄປໄດ້ໃນການພັດທະນາແຫຼ່ງທ່ອງທ່ຽວຂຸນກອງແລງ, ຂຸນແຂ້, ຂຸນປະກັນ ແລະ ຕາດຄອນແກ້ວ ເມືອງຫີນບູນ ແຂວງຄຳມ່ວນ ຕາມຂໍ້ຕົກລົງຂອງເຈົ້າແຂວງ ສະບັບເລກທີ 600/ຈຂ.ຄມ ເຊິ່ງໄດ້ລົງນາມໃນບົດບັນທຶກຄວາມເຂົ້າໃຈ (MOU) ລະຫວ່າງອົງການປົກຄອງແຂວງ ເຊິ່ງຕາງໜ້າໂດຍພະແນກແຜນການ ແລະ ການລົງທຶນ ກັບບໍລິສັດ ອິນທຣາໂຄໂປເລຊັນ ຈຳກັດຜູ້ດຽວ.
ແຂວງຄຳມ່ວນຕ້ອງການທີ່ຈະພັດທະນາສະຖານທີ່ທ່ອງທ່ຽວຂຸນກອງ ແລງ, ຂຸນແຂ້, ຂຸນປະກັນ ແລະ ຕາດຄອນແກ້ວ ເພື່ອຜົນປະໂຫຍດທາງດ້ານເສດຖະກິດ-ສັງຄົມຂອງແຂວງ ເຊິ່ງໂຄງການພັດທະນາສະຖານທີ່ທ່ອງທ່ຽວດັ່ງກ່າວແມ່ນສາມາດຕອບສະໜອງໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ. ຝ່າຍບໍລິສັດ ອິນທຣາໂຄໂປເລຊັນ ເປັນບໍລິສັດພາຍໃນທີ່ມີຊ່ຽວ ຊານດ້ານການທ່ອງທ່ຽວ ແລະ ມີຄວາມຮັບຜິດຊອບການລົງທຶນດ້ວຍຕົນເອງ ເພື່ອເປັນພື້ນຖານໃນການອະນຸຍາດສຶກສາ-ສຳຫຼວດຄວາມອາດສາມາດເປັນໄປໄດ້ໃນການພັດທະນາສະຖານທີ່ທ່ອງທ່ຽວດັ່ງກ່າວໃຫ້ສອດຄ່ອງກັບກົດໝາຍວ່າດ້ວຍການສົ່ງເສີມການລົງທຶນຢູ່ ສປປ ລາວ ເຊິ່ງຕາມເນື້ອໃນຂອງບົດບັນທຶກດັ່ງກ່າວ ຝ່າຍອົງການປົກຄອງແຂວງໄດ້ມອບສິດໃຫ້ຝ່າຍບໍລິສັດແຕ່ພຽງຜູ້ດຽວເພື່ອສຳຫຼວດ ແລະ ສ້າງບົດວິພາກເສດຖະກິດ-ເຕັກນິກ ຕາມເງື່ອນໄຂທີ່ໄດ້ລະບຸໄວ້ໃນສັນຍາພັດທະນາໂຄງການ ແລະ ສັນຍາສຳປະທານທີ່ໄດ້ກຳນົດຂັ້ນຕອນ, ເງື່ອນໄຂ ແລະ ຈະໄດ້ເຈລະຈາກັນພາຍຫຼັງຜົນສຳຫຼວດໂຄງການ, ບົດບັນທຶກແມ່ນມີຜົນບັງຄັບໃຊ້ນັບແຕ່ທັງສອງຝ່າຍໄດ້ລົງລາຍເຊັນຮ່ວມກັນ ໃນໄລຍະເວລາ 18 ເດືອນ ແລະ ສາມາດຍື່ນຄຳຮ້ອງຂໍຕໍ່ຢ່າງໜ້ອຍ 60 ວັນ ກ່ອນວັນໝົດອາຍຸຂອງບົດບັນທຶກ, ການອະນຸຍາດໃຫ້ຕໍ່ອາຍຸຕ້ອງມີຜົນຂອງການສຳຫຼວດທີ່ຜ່ານມາຢັ້ງຢືນ ແລະ ໃຫ້ເຫດຜົນເປັນລາຍລັກອັກສອນ ພ້ອມເຊັນຮັບຮູ້ທັງສອງຝ່າຍ. ສ່ວນການສຶກສາຄວາມເປັນໄປໄດ້ຂອງຝ່າຍບໍລິສັດແມ່ນຕ້ອງໄດ້ມາດຕະຖານເຕັກນິກທີ່ຂະແໜງການກ່ຽວຂ້ອງກຳນົດອອກ, ການສຶກສາປະເມີນຜົນກະທົບຕໍ່ສິ່ງແວດລ້ອມ ແລະ ຜົນກະທົບຕໍ່ສັງຄົມແມ່ນໃຫ້ສອດຄ່ອງກັບກົດໝາຍສິ່ງແວດລ້ອມ ແລະ ເສຍຄ່າທົດແທນຜົນເສຍຫາຍຜົນລະປູກ ແລະ ຊັບສິນຂອງປະຊາຊົນ, ສຳລັບທຶນການສຶກສາ-ສຳຫຼວດຄວາມເປັນໄປໄດ້ແມ່ນຂອງບໍລິສັດ 100% ແລະ ຕ້ອງໄດ້ລົງມືສຳຫຼວດພາຍໃນ 60 ວັນ ພາຍຫຼັງໄດ້ເຊັນ MOU ເປັນຕົ້ນໄປ.
ພິທີລົງນາມເຊັນບົດບັນທຶກດັ່ງກ່າວໄດ້ມີຂຶ້ນໃນວັນທີ 27 ມີນາ 2018 ທີ່ພະແນກແຜນການ ແລະ ການລົງທຶນແຂວງ ລະຫວ່າງທ່ານ ພູຊະນະ ໄຊໂກສີ ຮອງຫົວໜ້າພະແນກແຜນການ ແລະ ການລົງທຶນ ແລະ ທ່ານ ພັນທະຈິດ ອິນທິລາດ ປະທານບໍລິສັດ ອິນທຣາໂຄໂປເລຊັນ ຈຳກັດ ເຊິ່ງມີຄະນະນຳເມືອງຫີນບູນ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວເຂົ້າຮ່ວມເປັນສັກຂີພິຍານນໍາດ້ວຍ.
