ສສ ຫວຽດນາມ ຊ່ວຍຍົກສູງຄຸນະພາບບຸກຄະລາກອນດ້ານໝາຍ ແລະ ຍຸຕິທໍາລາວ
ກະຊວງຍຸຕິທໍາ ສສ ຫວຽດນາມ, ໄດ້ໃຫ້ການຊ່ວຍເຫຼືອລ້າ ເພື່ອສ້າງ ແລະ ຍົກສູງຄຸນະພາບບຸກຄະລາກອນດ້ານກົດໝາຍ ແລະ ຍຸຕິທໍາສະຖາບັນຍຸຕິທໍາແຫ່ງຊາດລາວ ໃນໂຄງການ “ຊ່ວຍໜູນສະຖາບັນຍຸຕິທໍາແຫ່ງຊາດລາວ” ລວມມີມູນຄ່າ 13 ຕື້ກວ່າກີບ, ຊຶ່ງພິທີເປີດໂຄງການດັ່ງກ່າວໄດ້ມີຂຶ້ນໃນວັນທີ 27 ມີນານີ້, ທີ່ສະຖາບັນແຫ່ງນີ້ ຕັ້ງຢູ່ບ້ານ ນ້ອຍຊຽງດາ, ເມືອງ ໄຊເສດຖາ ນະຄອນຫຼວງວຽງຈັນ, ໂດຍເປັນປະທານຮ່ວມຂອງທ່ານ ໄຊສີ ສັນຕິວົງ ລັດຖະມົນຕີ ກະຊວງຍຸຕິທໍາ ແລະ ທ່ານ ເຈິ່ນຕຽນຢຸງ ຮອງລັດຖະມົນຕີ ກະຊວງຍຸຕິທໍາ ສສ ຫວຽດນາມ. ເພື່ອເພີ່ມທະວີການພົບພັນຮ່ວມມືລະຫວ່າງ ສະຖາບັນຍຸຕິທໍາແຫ່ງຊາດ, ກະຊວງຍຸຕິທໍາ ແລະ ບັນດາພະນັກງານທີ່ເຮັດວຽກໃນຂົງເຂດຍຸຕິທໍາລາວ-ຫວຽດນາມ ນັບມື້ແໜ້ນແຟ້ນ ແລະ ມີປະສິດທິຜົນສູງຂຶ້ນ, ໂດຍສະເພາະແມ່ນການຊ່ວຍເຫຼືອຍົກລະດັບພະນັກງານຂົງເຂດວຽກງານຍຸຕິທໍາ, ນິຕິກໍາ, ຊຶ່ງລວມມີທັງການເຈລະຈາ, ເຊັນສັນຍາສາກົນ, ປະຕິບັດຄໍາຕັດສິນຂອງສານ; ຢັ້ງຢືນທະບຽນສານ; ໄກ່ເກ່ຍຂໍ້ຂັດແຍ່ງທາງດ້ານເສດຖະກິດ, ກໍາມະການ; ໂຄສະນາອົບຮົມກົດໝາຍ; ຜູ້ພິພາກສາ, ພະນັກງານໄອຍະການ, ທະນາຍຄວາມ ແລະ ໃນຂົງເຂດອື່ນໆ, ຊຶ່ງ 2 ຝ່າຍຈະຮ່ວມກັນກໍານົດໃນຂະບວນການປະຕິບັດໂຄງການ.
ສໍາລັບໂຄງການນີ້, ແມ່ນໂຄງການທໍາອິດຢູ່ໃນຂົງເຂດກົດໝາຍ ແລະ ຍຸຕິທໍາ ທີ່ລັດຖະບານ ສສ ຫວຽດນາມ ໄດ້ໃຫ້ການຊ່ວຍເຫຼືອລ້າແກ່ລາວ, ຊຶ່ງລວມມີມູນຄ່າປະມານ 13 ຕື້ກວ່າກີບ (37.363.324.500 ດົ່ງ) ແລະ ຈະສິ້ນສຸດໃນປີ 2020.
