ລາວຈະຖືເອົາການຜະລິດກະສິກຳສະອາດເປັນປາຍແຫລມ
ກອງປະຊຸມປຶກສາຫາລືການຜະລິດກະສິກຳສະອາດຕິດພັນກັບຂະແໜງປູກຝັ່ງທີ່ຈັດຂຶ້ນແຕ່ວັນທີ 20-21 ເມສາຜ່ານມາທີ່ນະຄອນຫລວງວຽງຈັນ, ໄດ້ມີການປືກສາຫາລື ແລະ ຮັບຮອງຫລາຍບັນຫາສໍາຄັນໃນການຈັດຕັ້ງປະຕິບັດວຽກງານພັດທະນາກະສິກຳສະອາດ ເປັນຕົ້ນ: ຮັບຮອງລະບົບການຜະລິດກະສິກຳສະອາດຢູ່ພາຍໃນປະເທດມີ 2 ລະບົບຄື: ລະບົບກະສິກໍາອິນຊີ ແລະ ລະບົບກະສິກຳທີ່ດີ, ໄດ້ຕົກລົງເຫັນດີໃຫ້ມີການສ້າງນິຕິກຳ ແລະ ນະໂຍບາຍກ່ຽວກັບການຜະລິດກະສິກຳສະອາດ, ຜະລິດເປັນສິນຄ້າ, ເອົາໃຈໃສ່ພັດທະນາລະບົບກວດກາ ແລະ ຢັ້ງຢືນກະສິກຳສະອາດໃຫ້ໄດ້ຕາມມາດຕະຖານສາກົນ.
ທ່ານລັດຖະມົນຕີກະຊວງກະສິກຳ ແລະ ປ່າໄມ້ ລຽນ ທີແກ້ວ ກ່າວວ່າ:ການຜະລິດກະສິກຳສະອາດເປັນວຽກງານທີ່ມີຄວາມຫຍຸ້ງຍາກທ້າທາຍຫລາຍດ້ານ, ດັ່ງນັ້ນການພັດທະນາວຽກງານດັ່ງກ່າວຕ້ອງເຮັດຢ່າງມີຈຸດສຸມຈຶ່ງຈະສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ແລະ ສອດຄ່ອງກັບນະໂຍບາຍຂອງພັກ ແລະ ລັດຖະບານຕາມທິດສະອາດ, ສີຂຽວ ແລະ ຍືນຍົງ, ຂະນະດຽວກັນຫລາຍປະເທດພາສີນຳເຂົ້າໄດ້ຖືກຍົກເລີກ ແລະ ໄດ້ສ້າງລະບຽບການຂອງຕົນຂຶ້ນມາ ເພື່ອກີດກັນຜົນຜະລິດກະສິກຳທີ່ນຳເຂົ້າປະເທດຕົນ ເພື່ອປົກປ້ອງຜູ້ບໍລິໂພກພາຍໃນປະເທດ ເປັນຕົ້ນ: ມາດຕະຖານສາກົນດ້ານຄວາມປອດໄພຂອງອາຫານ, ດ້ານສຸຂະອະນາໄມພືດ, ມາດຕະຖານກະສິກຳອິນຊີ ແລະ ມາດຕະຖານກະສິກຳທີ່ດີ, ສະນັ້ນເພື່ອກຽມຄວາມພ້ອມຕໍ່ສະພາບດັ່ງກ່າວ ແລະ ທັງເປັນການຈັດຕັ້ງຜັນຂະຫຍາຍແນວທາງນະໂຍບາຍການຜະລິດກະສິກຳສະອາດຂອງລັດຖະບານ ກໍຄືກະຊວງກະສິກຳ ແລະ ປ່າໄມ້, ຈຶ່ງມີຄວາມຈຳເປັນທີ່ຕ້ອງໄດ້ຮີບຮ້ອນສ້າງນິຕິກຳເພື່ອຄຸ້ມຄອງສິນຄ້າກະສິກຳເພື່ອສົ່ງອອກ ບົນພື້ນຖານໃນຂອບການຜະລິດກະສິກຳທີ່ດີຂອງອາຊຽນ, ຂະນະດຽວກັນກໍເຫັນວ່າປະເທດເຮົາມີຄວາມຈຳເປັນຕ້ອງໄດ້ປົກປ້ອງຜົນຜະລິດກະສິກຳທີ່ຈະນຳເຂົ້າປະເທດ, ໂດຍສະເພາະຕ້ອງໄດ້ຮັບການຢັ້ງຢືນມາດຕະຖານກະສິກຳທີ່ດີຈາກປະເທດຕົ້ນທາງຢ່າງຖືກຕ້ອງ.
