ລາວ ແລະ ທະນາຄານພັດທະນາອາຊີສະຫລອງການຮ່ວມມືຄົບຮອບ 50 ປີ
ພິທີສະເຫລີມສະຫລອງການຮ່ວມມືຄົບຮອບ 50 ປີລະຫວ່າງ ສປປ ລາວ ແລະ ທະນາຄານພັດທະນາອາຊີ (ADB) ໄດ້ຈັດຂຶ້ນໃນທ້າຍອາທິດຜ່ານມາທີ່ນະຄອນຫລວງວຽງຈັນ, ໂດຍມີທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ເຈມ ນິວເຈິນ ຫົວໜ້າກົມອາຊີຕາເວັນອອກສ່ຽງໃຕ້ທະນາຄານພັດທະນາອາຊີ, ມີບັນດາທູຕານຸທູດປະຈຳລາວ, ພ້ອມດ້ວຍອົງການຈັດຕັ້ງສາກົນ ແລະ ແຂກຖືກເຊີນເຂົ້າຮ່ວມເປັນຈໍານວນຫລາຍ.
ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໃຫ້ຮູ້ວ່າ: ສປປ ລາວ ແລະ ທະນາຄານພັດທະນາອາຊີ ໄດ້ມີການຮ່ວມມືກັນນັບແຕ່ປີ 1967 ເປັນຕົ້ນມາ, ເຊິ່ງທະນາຄານດັ່ງກ່າວໄດ້ໃຫ້ທຶນຊ່ວຍເຫລືອເພື່ອການພັດທະນາແກ່ລາວໃນຫລາຍດ້ານເຊັ່ນ: ກະສິກຳ, ພັດທະນາພື້ນຖານໂຄງລ່າງ, ການສຶກສາ, ພັດທະນາດ້ານພະລັງງານໄຟຟ້າ ແລະ ອື່ນໆ ເພື່ອຊຸກຍູ້ການຂະຫຍາຍຕົວທາງດ້ານເສດຖະກິດ ແລະ ຫລຸດຜ່ອນຄວາມທຸກຍາກໃນລາວ, ປັດຈຸບັນການພົວພັນຮ່ວມມືສອງຝ່າຍຍິ່ງນັບມື້ເພີ່ມຂຶ້ນຢ່າງຕໍ່ເນື່ອງ ແລະ ໄດ້ຂະຫຍາຍກວ້າງອອກກວ່າເກົ່າໂດຍກວມເອົາການພັດທະນາຊົນນະບົດ, ການພັດທະນາສັງຄົມ, ສິ່ງແວດລ້ອມ, ການເງິນ ແລະ ການເຊື່ອມໂຍງພາກພື້ນ ແລະ ສາກົນ.
ທ່ານຜູ້ຕາງໜ້າທະນາຄານພັດທະນາອາຊີໄດ້ຢືນຢັນຕື່ມວ່າ: ເອດີບີ ຈະສືບຕໍ່ຊ່ວຍເຫລືອລາວໃຫ້ບັນລຸເປົ້າໝາຍການພັດທະນາວາງໄວ້ ເພື່ອຊ່ວຍໃຫ້ປະເທດຫລຸດພົ້ນອອກຈາກຄວາມດ້ອຍພັດທະນາໃນປີ 2020 ປະກົດຜົນເປັນຈິງ.
