ໄຊສົມບັດເຕັກໂນໂລຊີ ບ່ອນພັດທະນາອາຊີບອອກສູ່ຕະຫລາດ
ວິທະຍາໄລໄຊສົມບັດເຕັກໂນໂລຊີ, ກຳລັງມີບົດບາດສຳຄັນໃນການພັດທະນາອາຊີບແຮງງານຂອງຊາວໜຸ່ມແຂວງສະຫວັນນະເຂດໃນຂົງເຂດອາຊີວະສຶກສາ, ຫລັງຈາກຮຽນຈົບ ກໍສາມາດນຳໄປປະກອບອາຊີບຂອງຕົນເອງໄດ້, ຂະນະທີ່ຕະຫລາດແຮງງານໃນແຂວງສະຫວັນນະເຂດກໍມີຄວາມຕ້ອງການສູງ ເມື່ອທຽບກັບການສະໜອງທີ່ຍັງບໍ່ໄດ້ຮອດ 10% ຂອງຄວາມຕ້ອງການ, ຈຳເປັນຕ້ອງໄດ້ເລັ່ງພັດທະນາທັງດ້ານຫລັກສູດອາຊີວະ, ລວມທັງອາຄານຮຽນ, ຫ້ອງຮຽນ ເພື່ຶອຮອງຮັບນັກສຶກສາໃຫ້ໄດ້ຫລາຍຂື້ນ ເພື່ອປະກອບສ່ວນຊ່ວຍພັດທະນາຊັບພະຍາກອນມະນຸດໄດ້ຕາມຄວາມຮຽກຮ້ອງຕ້ອງການຂອງສັງຄົມ.
ທ່ານ ສຸກສະຫວັນ ໄຊສົມບັດ ປະທານວິທະຍາໄລໄຊສົມບັດ ໃຫ້ຮູ້ວ່າ: ເປັນເວລາ 12 ປີ, ທີ່ພວກເຮົາໄດ້ສ້າງຕັ້ງວິທະຍາໄລນີ້ຂື້ນມາ ເພື່ອພັດທະນາຊັບພະຍາກອນມະນຸດໃນຂະແໜງການດ້ານຫລັກສູດອາຊີວະສຶກສາ, ເຊິ່ງມາຮອດປັດຈຸບັນປະກອບມີວິຊາຊ່າງໄຟຟ້າ, ກົນຈັກ, ລົດຍົນ, ເຄຫາ, ກໍ່ສ້າງ, ບໍລິຫານທຸລະກິດ, ບໍລິຫານຈັດການ ແລະ ວິທະຍາສາດເທັກໂນໂລຊີສາລະສົນເທດ, ໄອທີຄອມພິວເຕີ, ພາສາຕ່າງປະເທດ ແລະວິຊາທີ່ຕິດພັນຂະແໜງການອື່ນໆ, ເຊິ່ງຈະຊ່ວຍໃຫ້ເຂົາເຈົ້ານຳໄປປະກອບອາຊີບເປັນຂອງຕົນໄດ້ຫລັງຈາກຮຽນຈົບ ແລະ ຜູ້ທີ່ຮຽນຈົບຜ່ານມາກໍມີຫລາຍຄົນໄດ້ປະກອບທຸລະກິດເປັນຂອງຕົນເອງ, ເຂົ້າເຮັດວຽກນຳລັດ, ເຂົ້າເຮັດວຽກໃນເຂດເສດຖະກິດພິເສດ ສະຫວັນ-ເຊໂນເປັນຈຳນວນຫລາຍພັນຄົນ.
ຫລາຍປີຜ່ານມາຈົນເຖິງປະຈຸບັນ, ວິທະຍາໄລພວກເຮົາກໍໄດ້ຮ່ວມມືກັບພາກລັດຄືກະຊວງສຶກສາທິການ ແລະ ກິລາ ເພື່ອປະຕິບັດໂຄງການສ້າງຄວາມເຂັ້ມແຂງດ້ານອາຊີວະສຶກສາ ທີ່ໄດ້ຮັບທຶນສະໜັບສະໜູນຈາກທະນາຄານພັດທະນາອາຊີ ເປີດໂອກາດໃຫ້ຊາວໜຸ່ມຜູ້ດ້ອຍໂອກາດ, ຄົນທຸກຍາກໃນເຂດຊົນນະບົດເຂົ້າມາຮຽນໂດຍບໍ່ໄດ້ເສຍຄ່າ, ພ້ອມທັງຮັບເບ້ຍລ້ຽງແລ້ວຫລາຍກວ່າ 400 ຄົນ, ໃນ 3 ລຸ້ນທີ່ຮຽນຈົບ ແລະ ກຳລັງສືບຕໍ່ແລະ ນອກນີ້ກໍແມ່ນໂຄງການວິນລາກໍໄດ້ຮັບການຈັດຕັ້ງປະຕິບັດແບບດຽວກັນ. ໃນຂະນະທີ່ມີນັກສຶກສາລະບົບ 12+3 ກໍເຂົ້າມາຮຽນຫລາຍໃນສົກ 2017-2018 ນີ້, ລວມແລ້ວທົ່ວວິທະຍາໄລມີນັກສຶກສາເກືອບພັນຄົນ ແລະ ກຽມປ່ອຍສູ່ຕະຫລາດແຮງງານຈຳນວນໜຶ່ງ.
ແນວໃດກໍຕາມ, ວິທະຍາໄລຂອງພວກເຮົາບໍ່ໄດ້ເນັ້ນແຕ່ດ້ານປະລິມານ, ແຕ່ດ້ານຄຸນນະພາບກໍຖືເປັນໝາກຫົວໃຈ, ຍ້ອນເລັງເຫັນໄດ້ຄວາມສຳຄັນຂອງການພັດທະນາຊັບພະຍາກອນມະນຸດ ກໍຄຶການພັດທະນາຄຸນນະພາບການສຶກສາ, ສ້າງຊັບພະຍາກອນມະນຸດໃຫ້ມີຄວາມຮູ້ຄວາມສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງຕະຫລາດແຮງງານທີ່ຫັນກຳລັງຫັນໄປສູ່ອຸດສາຫະກຳ ແລະ ທັນສະໄໝເທື່ອລະກ້າວ.
