ປ່ຽນເພື່ອຄຸນນະພາບຊີວິດທີ່ດີຂຶ້ນ
March 28, 2018 - 1:27 PM
- ຟັງ ຫລື ອ່ານຫຍັງທີ່ສ້າງແຮງບັນດານໃຈໃຫ້ທ່ານ : ທຳມະຊາດແລ້ວຄົນເຮົາມັກລ້ວນແຕ່ເລືອກຄວາມບັນເທີງ ຫລື ຂ່າວຕ່າງໆເປັນຫລັກ ແລະ ຫລາຍໆເທື່ອທີ່ສິ່ງເຫລົ່ານັ້ນບໍ່ໄດ້ເຮັດໃຫ້ຮູ້ສຶກດີ, ແຕ່ເຮັດໃຫ້ເຄັ່ງຄຽດຕື່ມອີກ ທາງທີ່ດີທ່ານຄວນລອງຫາເວລາຟັງເພງ, ອ່ານໜັງສື ຫລື ເບິ່ງຫຍັງທີ່ສ້າງແຮງບັນດານໃຈໃຫ້ກັບຕົນເອງ.
- ເຮັດໃຫ້ຮ່າງກາຍຂອງທ່ານແຂງແກ່ນຫລາຍຂຶ້ນ : ຮ່າງກາຍຂອງທ່ານມີການປ່ຽນແປງທຸກໆມື້ ມັນຢູ່ບ່ອນວ່າຈະປ່ຽນແປງໄປໃນທາງທີ່ດີຂຶ້ນ ຫລື ອ່ອນແອລົງ ເມື່ອເປັນແນວນີ້ແລ້ວຄົງຈະດີກ່ວາ ຖ້າທ່ານເບິ່ງແຍງດູແລຮ່າງກາຍຂອງທ່ານໃຫ້ແຂງແຮງຢູ່ສະເໝີ, ຫາເວລາໃນການອອກກຳລັງກາຍຢູ່ສະເໝີ, ກິນອາຫານດີໆ ເພື່ອໃຫ້ທ່ານຮູ້ສຶກດີໆກັບຮ່າງກາຍຂອງທ່ານເອງໄດ້ຕະຫລອດເວລາ.
- ສຳຫລວດແຜນອະນາຄົດຂອງຕົນເອງ : ເວລາທີ່ທ່ານເຮັດຫຍັງໂດຍບໍ່ມີຈຸດໝາຍນັ້ນ ທ່ານຈະຮູ້ສຶກໂດດດ່ຽວ ແລະ ໃຊ້ຊີວິດໄປວັນໆ, ແຕ່ເມື່ອໃດກໍຕາມທີ່ທ່ານຮູ້ໂຕເອງວ່າທ່ານກຳລັງຈະກ້າວໄປສູ່ເປົ້າໝາຍຫຍັງ ທຸກຢ່າງທີ່ທ່ານເຮັດໃນແຕ່ລະມື້ກໍຈະສາມາດບອກໄດ້ວ່າສິ່ງເຫລົ່ານັ້ນໄປສອດຄ່ອງກັບເປົ້າໝາຍທີ່ທ່ານໄດ້ວາງໄວ້ບ່ອນໃດ ແລະ ເຖິງວ່າມັນຈະເປັນສິ່ງນ້ອຍໆສຳລັບບາງຄົນ ແຕ່ສຳລັບທ່ານເອງແລ້ວທ່ານຈະຮູ້ດີວ່າມັນມີຄ່າ. ການທົບທວນແຜນອະນາຄົດຂອງທ່ານຢູ່ເປັນ ປະຈຳກໍເປັນສິ່ງທີ່ເຮັດໃຫ້ທ່ານຮູ້ສຶກດີກັບໂຕເອງໄດ້ ເພາະມັນເຮັດໃຫ້ທ່ານເຫັນວ່າທ່ານນັ້ນຢູ່ຈຸດໃດຂອງເສັ້ນທາງແລ້ວ.
- ເຮັດຫຍັງຈັກຢ່າງທີ່ກຸ້ມຄ່າ : ເມື່ອທ່ານໄດ້ເຮັດຫຍັງຈັກຢ່າງທີ່ແຕກຕ່າງຈາກເກົ່າ ແລະ ມັນສ້າງຄວາມປ່ຽນແປງຫຍັງຈັກຢ່າງຂຶ້ນ ມັນຈະເປັນສິ່ງທີ່ທ່ານມັກຈະຮູ້ສຶກກຸ້ມຄ່າກັບທີ່ລົງມືເຮັດ ຫລື ເສຍເວລາໄປ. ສະນັ້ນແລ້ວ ທ່ານຄວນລອງພະຍາຍາມຫາເວລາຈາກມື້ຫຍຸ້ງໆຂອງທ່ານໃນການເຮັດອັນໃດບາງຢ່າງທີ່ຫລາຍກ່ວາການໃຊ້ຊີວິດແບບເກົ່າໆເບິ່ງ ເພາະມັນຈະກາຍເປັນສິ່ງທີ່ທ່ານຈະຈື່ຈຳໄດ້ເປັນພິເສດ.
- ຊ່ວຍເຫລືອຄົນອື່ນທີ່ດ້ອຍກ່ວາເຮົາ : ໜຶ່ງໃນວິທີທ່ີດີທີ່ເຮັດໃຫ້ທ່ານສາມາດຮູ້ສຶກດີໄດ້ກໍແມ່ນການຊ່ວຍເຫລືອຄົນອື່ນ ໂດຍສະເພາະກັບຄົນທີ່ຕ້ອງການຄວາມຊ່ວຍເຫລືອ ສິ່ງເຫລົ່ານີ້ຈະເປັນເລື່ອງທີ່ສາມາດຕື່ມຄວາມອີ່ມໃຈໃຫ້ກັບໂຕທ່ານໄດ້ຢ່າງດີ ແລະ ຈະດີຫລາຍຖ້າທ່ານເຮັດໂດຍບໍ່ຕ້ອງພະຍາຍາມເອົາໜ້າ.
- ໃຊ້ 20 ວິນາທີໃນການຮູ້ສຶກດີກັບສິ່ງທີ່ໂຕທ່ານມີ : ເຊື່ອໄດ້ເລີຍວ່າສິ່ງທີ່ທ່ານມີຢູ່ທຸກມື້ນີ້ມັນມີຄ່າໃນທາງໃດທາງໜຶ່ງ ເຖິງວ່າມັນອາດຈະບໍ່ດີເລີດສົມບູນ, ແຕ່ໂລກກໍຍັງບໍ່ແຕກ ແລະ ທ່ານກໍຍັງມີຊີວິດຢູ່ ໃຊ້ເວລາຈັກໜ້ອຍເບິ່ງ ແລະ ສຳຫລວດໂຕເອງວ່າຮອບໂຕທ່ານຍັງມີຫຍັງດີໆໃຫ້ທ່ານໄດ້ ເບິ່ງເຫັນຄຸນຄ່າ ແລະ ສຳຜັດໄດ້ຢູ່.
- ຈົດບັນທຶກເລື່ອງລາວດີໆຢ່າງໜ້ອຍໜຶ່ງເລື່ອງ : ໃນທຸກໆມື້ນັ້ນຄົງຈະດີບໍ່ໜ້ອຍຖ້າທ່ານສາມາດນຶກເຖິງເລື່ອງດີໆຢ່າງໜ້ອຍໜຶ່ງເລື່ອງໃນແຕ່ລະມື້ ແລະ ບັນທຶກມັນໄວ້ ເຖິງວ່າມັນຈະບໍ່ແມ່ນເລື່ອງດີໆແບບສຸດຍອດຫຍັງ ແຕ່ຢ່າງໜ້ອຍມັນກໍເປັນເລື່ອງດີ ຝຶກບັນທຶກມັນໃຫ້ເປັນນິໄສ (ຈະຖ່າຍຮູບ, ຂຽນໄວ້ໃນປື້ມບັນທຶກກໍໄດ້) ແລະ ເມື່ອເຮັດເຖິງຈຸດໃດຈຸດໜຶ່ງແລ້ວ ທ່ານກໍຈະຮູ້ສຶກໄດ້ວ່າມັນມີເລື່ອງດີໆເກີດຂຶ້ນທຸກມື້.
