ອຸດສະເບກິດສະຖານເປັນເຈົ້າພາບ ຈັດກອງປະຊຸມລະດັບສູງກ່ຽວກັບ ອັບການິດສະຖານ
ອຸດສະເບກິດສະຖານເປັນເຈົ້າພາບຈັດກອງປະຊຸມພະຫຸພາຄີວ່າດ້ວຍອັບການິດສະຖານ ໃນວັນທີ 27 ມີນານີ້ ໂດຍມີເປົ້າໝາຍເພື່ອປູທາງໄປສູ່ການເຈລະຈາໂດຍກົງລະຫວ່າງລັດຖະບານອັບການິດສະຖານ ແລະ ກຸ່ມຕາລີບັນ.
ລາຍງານລະບຸວ່າ: ກອງປະຊຸມໃນຄັ້ງນີ້ມີທັງປະທານາທິບໍດີ ອັບຣາຟ ການີ ແຫ່ງອັບການິດສະຖານ, ປະທານາທິບໍດີ ຊັຟຄັດ ມີຊີໂຢເຢຟ ແຫ່ງອຸດເບກິດສະຖານ, ທ່ານນາງ ເຟເດຣິກາ ໂມເກຣິນີ ຫົວໜ້ານະໂຍບາຍຕ່າງປະເທດຂອງສະຫະພາບເອີຣົບ ຫລື EU. ນອກຈາກນີ້ ຍັງມີບັນດາລັດຖະມົນຕີຕ່າງປະເທດຈາກກາຊັກສະຖານ, ປາກິດສະຖານ, ຣັດເຊຍ ແລະ ຕວກກີ, ສ່ວນອາເມລິກາ ສົ່ງທ່ານ ໂທມັດ ເຊນນອນ ຫົວໜ້າຫ້ອງການກະຊວງການຕ່າງປະເທດຝ່າຍກິດຈະການການເມືອງເປັນຜູ້ແທນເຂົ້າຮ່ວມປະຊຸມ ເຊິ່ງຄາດວ່າກອງປະຊຸມຈະມີການລົງນາມໃນຄຳປະກາດວ່າດ້ວຍອັບການິດສະຖານກ່ອນສຳເລັດກອງປະຊຸມ.
ຜູ້ແທນຈາກອາເມລິກາ ແລະ ອົງການສົນທິສັນຍາປ້ອງກັນອັດລັງຕິກເໜືອ ຫລື ນາໂຕ ເຄີຍສະແດງຄວາມກັງວົນວ່າ: ຣັດເຊຍກຳລັງໃຫ້ການຊ່ວຍເຫລືອດ້ານການທະຫານແກ່ກຸ່ມຕິດອາວຸດຕາລີບັນ ເຊິ່ງເຂົ້າຍຶດຄອງພື້ນທີ່ໃນອັບການິດສະຖານນັບຈາກປີ 1996 ຈົນຖືກໂຄ່ນອຳນາດໂດຍກອງກຳລັງນຳໂດຍອາເມລິກາໃນປີ 2001 ແຕ່ຣັດເຊຍປະຕິເສດລາຍງານດັ່ງກ່າວ.
