ກອງທັບ ຊະນະ ມຊ 2-0 ເຕະບານ 4 ເສົ້າ

ທີມກອງທັບປະຊາຊົນລາວ ລົງສະໜາມຄັ້ງທີ 2 ສາມາດເອົາຊະນະທີມ ມຊ ເອັຟຊີ 2-0 ໃນວັນທີ 26 ມີນາ ທີ່ສະໜາມກິລາເຈົ້າອານຸວົງ ໃນລາຍການແຂ່ງຂັນເຕະບານ 4 ເສົ້າ ເພື່ອສະເຫລີມສະຫລອງວັນແມ່ຍິງສາກົນ.

ການແຂ່ງຂັນໄດ້ເລີ່ມຂຶ້ນແຕ່ວັນທີ 24 ມີນາເປັນຕົ້ນມາ ໂດຍມີ 4 ທີມເຂົ້າຮ່ວມ ເຊິ່ງປະກອບມີ ທີມກອງທັບປະຊາຊົນລາວ (LAO PEOPLE’S ARMY), ກະຊວງປ້ອງກັນຄວາມສະຫງົບ ປກສ,ມະຫາວິທະຍາໄລແຫ່ງຊາດ ມຊ ແລະ ນະຄອນຫລວງ ຢູໄນເຕັດ; ສໍາລັບການແຂ່ງຂັນປະກອບມີ 2 ຄູ່ຄື: ທີມວຽງຈັນ ຢູໄນເຕັດ ສາມາດເອົາຊະນະທີມ ປກສ 4-0; ສ່ວນທີມກອງທັບ ສາມາດເອົາຊະນະ ມຊ 2-0 ສົ່ງຜົນໃຫ້ທີມກອງທັບຂຶ້ນເປັນຜູ້ນໍາຕາຕະລາງຄະແນນຈາກການລົງສະໜາມ 2 ຄັ້ງ ຊະນະ 2 ຄັ້ງ ລວມມີ 6 ຄະແນນ, ອັນດັບທີ 2 ທີມວຽງຈັນ ຢູໄນເຕັດ ຈາກການລົງສະໜາມ 2 ຄັ້ງ ຊະນະ 1 ຄັ້ງ ເສຍ 1 ຄັ້ງ ລວມມີ 3 ຄະແນນ; ອັນດັບທີ 3 ຕົກເປັນຂອງທີມ ມຊ ມີຄະແນນເທົ່າທີມວຽງຈັນ ຢູໄນເຕັດ ແຕ່ມີປະຕູໄດ້ເສຍຫລາຍກວ່າຈຶ່ງຖືກຈັດຢູ່ອັນດັບທີ 3 ຈາກການລົງສະໜາມ 2 ຄັ້ງ ເສຍ 1 ຄັ້ງ ຊະນະ 1 ຄັ້ງ ລວມມີ 3 ຄະແນນ, ອັນດັບທີ 4 ທີມ ປກສ ເອັຟຊີ ຈາກການລົງສະໜາມ 2 ຄັ້ງ ເສຍ 2 ຄັ້ງ ບໍ່ມີຄະແນນລວມ.

ສໍາລັບຕາຕະລາງການແຂ່ງຂັນຄັ້ງສຸດທ້າຍຈະຈັດຂຶ້ນໃນວັນທີ 28 ມີນາ 2018 ທີ່ເດີ່ນກິລາເຈົ້າອານຸວົງ ທີມກອງທັບ ພົບ ປກສ ເວລາ 16:00 ໂມງ, ທີມ ມຊ ພົບ ທີມວຽງຈັນ ຢູໄນເຕັດ ເວລາ 18:00 ໂມງ.