ໄຂງານວາງສະແດງສິນຄ້າເຟີນີເຈີວຽງຈັນ 2018
ງານວາງສະແດງສິນຄ້າເຟີນີເຈີວຽງຈັນປະຈຳປີ 2018 ໄດ້ໄຂຂຶ້ນຢ່າງເປັນທາງການໃນວັນທີ 26 ມີນານີ້ ຢູ່ສູນການຄ້າລາວ-ໄອເຕັກ ແລະ ຈະດຳເນີນໄປຮອດວັນທີ 1 ເມສາ 2018 ໂດຍການເຂົ້າຮ່ວມຂອງທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ນາງ ເຂັມມະນີ ພົນເສນາ, ມີຜູ້ຕາງໜ້າຈາກພະແນກອຸດສາຫະກຳ ແລະ ການຄ້ານະຄອນຫລວງ, ພະແນກກະສິກຳ-ປ່າໄມ້, ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ສະມາຄົມເຟີນີເຈີ, ສະພາການຄ້າ ແລະ ອຸດສາຫະກຳແຫ່ງຊາດ ພ້ອມດ້ວຍຜູ້ປະກອບການເຂົ້າຮ່ວມເປັນຈຳນວນຫລາຍ.
ທ່ານຮອງປະທານສະມາຄົມເຟີນີເຈີລາວ ລາຍງານວ່າ: ງານວາງສະແດງຄັ້ງນີ້ຈັດຂຶ້ນເພື່ອຜັນຂະຫຍາຍມະຕິ ແລະ ຄຳສັ່ງຕ່າງໆຂອງພັກ-ລັດຖະບານ ໂດຍສະເພາະຄຳສັ່ງເລກທີ 15/ນຍ ໃຫ້ປາກົດຜົນເປັນຈິງ, ພ້ອມທັງເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະ ມີໄວ້ໃຊ້ຢ່າງຍືນຍົງ ໂດຍສະເພາະການປຸງແຕ່ງໃຫ້ເປັນຜະລິດຕະພັນສຳເລັດຮູບຈາກໄມ້, ຫວາຍ ແລະ ໄມ້ປ່ອງໃຫ້ມີຫລາກຫລາຍຜະລິດຕະພັນຕາມຄວາມຕ້ອງການຂອງຕະຫລາດ, ມີຄຸນນະພາບ ແລະ ສ້າງມູນຄ່າເພີ່ມ, ພ້ອມທັງເປັນການປະກອບສ່ວນສ້າງວຽກເຮັດງານທຳໃຫ້ປະຊາຊົນບັນດາເຜົ່ານຳອີກ.
ງານວາງສະແດງຄັ້ງນີ້ມີຜູ້ຜະລິດ, ຜູ້ປະກອບການໃນນະຄອນຫລວງວຽງຈັນ ແລະ ທ້ອງຖິ່ນ 10 ແຂວງເຂົ້າຮ່ວມຫລາຍກວ່າ 120 ຫົວໜ່ວຍ ແລະ ຄາດວ່າຈະມີເງິນໝູນວຽນພາຍໃນງານບໍ່ຕໍ່າກວ່າ 10 ຕື້ກີບ ແລະ ຄາດຄະເນຈະມີຜູ້ເຂົ້າຮ່ວມຊົມກວ່າ 3 ແສນຄົນໃນຕະຫລອດການຈັດງານ. ນອກນີ້ ຍັງມີການສາທິດແກະສະຫລັກໄມ້, ການສະແດງສິລະປະວັນນະຄະດີ ແລະ ກິດຈະກຳມອບໂຊກອື່ນໆ.
ທ່ານປະທານສະມາຄົມເຟີນີເຈີລາວ ຄຳໄຜ່ ສົມຊະນະ ໄດ້ກ່າວເປີດງານວ່າ: ງານວາງສະແດງເຟີນີເຈີຄັ້ງນີ້ແມ່ນການຢັ້ງຢືນໃຫ້ເຫັນເຖິງການເຕີບໃຫຍ່ຂອງຂະແໜງເຟີນີເຈີລາວທີ່ເກີດຈາກຫົວຄິດປະດິດສ້າງ ແລະ ສີໄມ້ລາຍມືຂອງຊ່າງຫັດຖະກຳລາວໃນທົ່ວປະເທດ ໄດ້ໂຄສະນາ ແລະ ເຜີຍແຜ່ໃຫ້ຊາວລາວ ແລະ ຕ່າງປະເທດໄດ້ຮັບຮູ້ຜະລິດຕະພັນໄມ້ລາວຫລາຍຂຶ້ນ, ທັງເປັນການດຶງດູດເອົາການລົງທຶນຈາກພາຍໃນ ແລະ ຕ່າງປະເທດເຂົ້າມາລົງທຶນໃນຂະແໜງເຟີນີເຈີໃຫ້ນັບມື້ຫລາຍຂຶ້ນ ແລະ ສາມາດແຂ່ງຂັນກັບຕະຫລາດພາກພື້ນ ແລະ ສາກົນໄດ້ເປັນຢ່າງດີ.
