ຜົນກອງປະຊຸມລັດຖະບານປະຈໍາເດືອນເມສາ
ກອງປະຊຸມລັດຖະບານສະໄໝສາມັນປະຈໍາເດືອນເມສາ ໃນວັນທີ 21 ໄດ້ມີຂຶ້ນໃນວັນທີ 20-21 ນີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ. ກອງປະຊຸມໄດ້ປຶກສາຫາລືປະກອບຄໍາເຫັນໃສ່ບັນດາເອກະສານສໍາຄັນທີ່ຈະນຳສະເໜີຜ່ານກອງປະຊຸມສະພາແຫ່ງຊາດສະໄໝສາມັນເທື່ອທີ 3 ສະໄໝທີ VIII ເປັນຕົ້ນ: ບົດລາຍງານຂອງທ່ານນາຍົກລັດຖະມົນຕີ ກ່ຽວກັບສະພາບພົ້ນເດັ່ນໃນການບໍລິຫານປະເທດໃນໄລຍະ 6 ເດືອນຜ່ານມາ ແລະ ວຽກງານຈຸດສຸມ 6 ເດືອນທ້າຍປີ 2017 ຂອງລັດຖະບານ, ບົດລາຍງານການສະຫລຸບຂາດຕົວການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2016, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມງວດ 1 ປີ 2017 ແລະ ທິດທາງໜ້າທີ່ 6 ເດືອນທ້າຍປີ 2017, ບົດສະຫລຸບການຈັດຕັ້ງປະຕິບັດແຜນງົບປະມານແຫ່ງລັດ 3 ເດືອນຂ້າມຜ່ານທ້າຍປີ 2016(ເດືອນຕຸລາ-ທັນວາ 2016), ສະພາບການຈັດຕັ້ງປະຕິບັດແຜນງົບປະມານແຫ່ງລັດງວດ 1 ແລະ ຄາດຄະເນທິດທາງແຜນການໃນ 6 ເດືອນທ້າຍປີ 2017 ແລະ ບົດລາຍງານວຽກງານຄຸ້ມຄອງ, ຕິດຕາມລາຄາສິນຄ້າ ແລະ ມາດຕະການແກ້ໄຂຈໍານວນໜຶ່ງຕໍ່ບັນຫາລາຄາສິນຄ້າແພງສົ່ງຜົນກະທົບຕໍ່ການຜະລິດ ແລະ ການດໍາລົງຊີວິດຂອງປະຊາຊົນ. ນອກຈາກນີ້ຍັງໄດ້ຄົ້ນຄວ້າຮ່າງວິໄສທັດຮອດປີ 2030 ແລະ ຍຸດທະສາດພັດທະນາຂະແໜງການເງິນຮອດປີ 2025, ບົດລາຍງານໂຄງການພັດທະນາທ່າເຮືອຫວຸງອາງຢູ່ ສສ ຫວຽດນາມ ແລະ ບົດລາຍງານກ່ຽວກັບການຈັດສັນຄວາມເປັນລະບຽບຮຽບຮ້ອຍຂອງສັງຄົມ.
ສໍາລັບເດືອນໃນພຶດສະພານີ້, ລັດຖະບານຈະສືບຕໍ່ສຸມໃສ່ຈັດຕັ້ງປະຕິບັດຫລາຍວຽກງານສໍາຄັນ ຄື:
(1) ສືບຕໍ່ເອົາໃຈໃສ່ວຽກງານຮັກສາຄວາມສະຫງົບ, ສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ, ພ້ອມທັງກະກຽມຄວາມພ້ອມເພື່ອປ້ອງກັນ, ແກ້ໄຂ ແລະ ສ້າງຄວາມຮັບປະກັນໃຫ້ແກ່ການຈັດຕັ້ງປະຕິບັດບັນດາແຜນການ ແລະ ໂຄງການພັດທະນາທີ່ສໍາຄັນ ເປັນຕົ້ນ: ໂຄງການກໍ່ສ້າງເສັ້ນທາງລົດໄຟລາວ-ຈີນ ແລະະ ໂຄງການລົງທຶນພັດທະນາຕ່າງໆໃຫ້ສໍາເລັດຕາມແຜນການວາງໄວ້.
(2) ສືບຕໍ່ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນ, ໂດຍສະເພາະບັນຫາແຫລມເກົາຫລີ, ຄວາມຂັດແຍງຢູ່ຊີລີ, ຕາເວັນອອກກາງ, ເອີລົບ ແລະ ອື່ນໆ ໂດຍມີການວິເຄາະວິໃຈຢ່າງລະອຽດເລີກເຊິ່ງຕໍ່ຄວາມສ່ຽງ ແລະ ທ່າອ່ຽງຜົນກະທົບ ແລະ ມີມາດຕະການຮັບມືທີ່ເໝາະສົມ.
(3) ຈະຮີບຮ້ອນປັບປຸງບັນດາເອກະສານ ແລະ ຮ່າງກົດໝາຍຕ່າງໆທີ່ຈະນໍາສະເໜີຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ໃຫ້ດີ ທັງກະກຽມຕອບຄໍາຊັກຖາມ ແລະ ຂ້ອງຂອງໃຈຂອງປະຊາຊົນ ກໍຄືຂອງບັນດາສະມາຊິກສະພາໃຫ້ສົມເຫດຜົນ ແລະ ຖືກຕ້ອງກັບຄວາມຈິງ.
(4) ສືບຕໍ່ສົມທົບກັບພາກສ່ວນກ່ຽວຂ້ອງໃນການປັບປຸງກົນໄກ, ການເກັບກໍາຂໍ້ມູນຖານລາຍຮັບໃຫ້ສໍາເລັດໂດຍໄວ ແລະ ລາຍງານໃຫ້ລັດຖະບານຮັບຊາບເປັນໄລຍະ ແລະ ມີທິດຊີ້ນໍາເພື່ອໃຫ້ສາມາດແກ້ໄຂບັນຫາທີ່ເກີດຂຶ້ນໄດ້ທັນເວລາ, ພ້ອມທັງເອົາໃຈໃສ່ການເບີກຈ່າຍເງິນເດືອນ, ໂດຍສະເພາະແມ່ນບັນດາເມືອງທີ່ຢູ່ເຂດຫ່າງໄກສອກຫລີກໃຫ້ເປັນປົກກະຕິ.
(5) ສືບຕໍ່ແກ້ໄຂບັນດາປະກົດການຫຍໍ້ທໍ້ຕ່າງໆໃນສັງຄົມ, ໂດຍສະເພາະແກ້ໄຂບັນຫາການດຳເນີນທຸລະກິດດ້ານການເງິນທີ່ບໍ່ສອດຄ່ອງຕາມລະບຽບກົດໝາຍຂອງບໍລິສັດຈໍານວນໜຶ່ງ ເພື່ອປົກປ້ອງຜົນປະໂຫຍດຂອງປະຊາຊົນ ແລະ ບໍ່ໃຫ້ປະຊາຊົນຖືກຫລອກລວງ
(6) ສືບຕໍ່ປັບປຸງກົນໄກປະຕູດຽວໃຫ້ໂລ່ງລຽນ, ໂປງໃສ ແລະ ສາມາດຊຸກຍູ້ການລົງທຶນ ແລະ ການດໍາເນີນທຸລະກິດໃຫ້ຄ່ອງຕົວ ເພື່ອດຶງແຫລ່ງລາຍຮັບເຂົ້າສູ່ລະບົບ ແລະ ກະຕຸກຊຸກຍູ້ເສດຖະກິດໃຫ້ຂະຫຍາຍຕົວ.
(7) ສືບຕໍ່ຄຸ້ມຄອງ ແລະ ຮັກສາສະຖຽນລະພາບເງິນຕາຕ່າງປະເທດໃຫ້ມີຄວາມໝັ້ນທ່ຽງ, ເໜັງຕີງຢູ່ລະດັບທີ່ກໍານົດໄວ້, ຄຸ້ມຄອງການເຄື່ອນໄຫວຂອງທະນາຄານທຸລະກິດ ແລະ ເພີ່ມທະວີການຕິດຕາມ-ກວດກາສິນເຊື່ອຂອງບັນ
ດາສະຖາບັນການເງິນທີ່ດໍາເນີນທຸລະກິດບໍ່ສອດຄ່ອງກັບລະບຽບກົດໝາຍ, ຕັ້ງໜ້າຄົ້ນຄວ້າອັດຕາດອກເບ້ຍເງິນກູ້ເພື່ອສົ່ງເສີມຊຸກຍູ້ການຜະລິດ, ການລົງທຶນ ແລະ ກະຕຸ້ນເສດຖະກິດໃຫ້ຂະຫຍາຍຕົວ.
(8) ສືບຕໍ່ຕິດຕາມການຄຸ້ມຄອງລາຄາສິນຄ້າໃນທ້ອງຕະຫລາດ, ລົງກວດກາຢ່າງໃກ້ຊິດຕິດແທດຕົວຈິງ, ແຈ້ງລາຄາສິນຄ້າໃຫ້ປະຊາຊົນຮັບຊາບ ເພື່ອບໍ່ໃຫ້ຊາວຄ້າຂາຍສວຍໂອກາດຂຶ້ນລາຄາສິນຄ້າຕາມລຳພັງ, ຖ້າພົບກໍລະນີລະເມີດແມ່ນໃຫ້ມີວິທີການແກ້ໄຂຢ່າງເໝາະສົມ, ຊຸກຍູ້ໃຫ້ມີການຈັດຕະຫລາດນັດສົ່ງເສີມສິນຄ້າໂອດ໋ອບໃຫ້ມີຄວາມຫລາກຫລາຍ ແລະ ເຮັດເປັນປົກກະຕິຕໍ່ເນື່ອງ ລວມທັງການສົ່ງເສີມການຜະລິດເປັນສິນຄ້າ ແລະ ຄໍ້າປະກັນສະບຽງອາຫານແຫ່ງຊາດເພື່ອກ້າວໄປສູ່ການກຸ້ມຕົນເອງເທື່ອລະກ້າວ.
(9) ສືບຕໍ່ປະຕິບັດຄໍາສັ່ງເລກທີ 15/ນຍ ແລະ ການປະມູນຂາຍຂາຍໄມ້ໃຫ້ສໍາເລັດໂດຍໄວ ເພື່ອບໍ່ໃຫ້ມີການສູນເສຍຊັບພະຍາກອນໂດຍບໍ່ມີປະໂຫຍດ, ພ້ອມທັງສືບຕໍ່ກວດກາການນຳເຂົ້ານ້ຳມັນເຊື້ອໄຟ, ສິນຄ້າອື່ນໆ ແລະ ແກ້ໄຂກິດຈະການການພະນັນ ຫລື ຕູ້ເກມທຸກຮູບແບບທີ່ຜິດລະບຽບກົດໝາຍ.
(10) ສືບຕໍ່ຕິດຕາມສະພາບດິນຟ້າອາກາດ ເພື່ອແຈ້ງເຕືອນປະຊາຊົນຮັບຊາບຢ່າງກວ້າງຂວາງທົ່ວເຖິງ ເພື່ອໃຫ້ມີສະຕິລະມັດລະວັງຕົວ ແລະ ປ້ອງກັນ, ພ້ອມທັງກຽມຄວາມພ້ອມຮັບມືກັບເຫດການທີ່ອາດຈະເກີດຂຶ້ນ ເປັນຕົ້ນ: ອັກຄີໄພ ແລະ ການຊ່ວຍເຫລືອຕໍ່ຜູ້ທີ່ຖືກເຄາະຮ້າຍຢ່າງທັນການ.
(11) ສືບຕໍ່ສົ່ງເສີມ ແລະ ຊຸກຍູ້ການປູກຝັງ-ລ້ຽງສັດຂອງປະຊາຊົນໃຫ້ເປັນຂະບວນຟົດຟື້ນ, ໂດຍສະເພາະການປູກເຂົ້ານາແຊງ, ການປູກພືດເປັນສິນຄ້າ, ການລ້ຽງສັດແບບເປັນຟາມໃຫ້ກວ້າງຂວາງ, ອັນສໍາຄັນແມ່ນໃຫ້ສືບຕໍ່ສົ່ງພະນັກງານເຕັກນິກວິຊາການລົງໄປແນະນໍາຊາວກະສິກອນຢູ່ທ້ອງຖິ່ນໃຫ້ຮູ້ປູກຮູ້ລ້ຽງຢ່າງຖືກວິທີ ເພື່ອໃຫ້ຮັບປະກັນຜົນຜະລິດ ແລະ ອາຫານສະໜອງໃຫ້ສັງຄົມຢ່າງເປັນປົກກະຕິ, ໃຫ້ມີສ່ວນເຫລືອແຮໄວ້ ແລະ ສົ່ງອອກ.
(12) ສືບຕໍ່ກະກຽມຮອບດ້ານໃຫ້ແກ່ການເຄື່ອນໄຫວວຽກງານການຕ່າງປະເທດຂອງການນຳພັກ-ລັດ ເປັນຕົ້ນ: ການຕ້ອນຮັບນາຍົກລັດຖະມົນຕີ ຫວຽດນາມທີ່ຈະມາຢ້ຽມຢາມ ສປປ ລາວ, ການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 30 ທີ່ປະເທດຟີລິບປິນ, ກະກຽມການຢ້ຽມຢາມຢ່າງເປັນທາງການປະເທດສິງກະໂປ, ມາເລເຊຍຂອງທ່ານນາຍົກລັດຖະມົນຕີ, ການເຂົ້າຮ່ວມກອງປະຊຸມປຶກສາຫາລືເສດຖະກິດໂລກທີ່ກໍາປູເຈຍ, ການເຂົ້າຮ່ວມກອງປະຊຸມສາກົນ 1 ເສັ້ນທາງ 1 ແລວທາງທີ່ ສປຈີນ ຂອງປະທານປະເທດໃນເດືອນພຶດສະພານີ້ ແລະ ກອງປະຊຸມສໍາຄັນອື່ນໆ
(13) ສືບຕໍ່ເອົາໃຈໃສ່ວຽກງານປ້ອງກັນພະຍາດລະບາດຕາມລະດູການ, ສານປົນເປື້ອນໃນອາຫານ, ວຽກງານບໍລິການປິ່ນປົວຄົນເຈັບທີ່ໄປໃຊ້ບໍລິການໃຫ້ດີ ແລະ ຖືສໍາຄັນວຽກງານແມ່ ແລະ ເດັກ.
(14) ເອົາໃຈໃສ່ວຽກງານການຮຽນ-ການສອນ ແລະ ການສຶກສາອົບຮົມລູກຫລານ, ຊຶ່ງຈະເປັນຜູ້ສືບທອດພາລະກິດຂອງຊາດໃຫ້ເປັນຄົນດີ, ມີວິໄນ ແລະ ບໍ່ໄປພົວພັນກັບສິ່ງເສບຕິດຕ່າງໆ, ໂດຍໃຫ້ຈັດກິດຈະກໍາການຮຽນ-ການສອນ ໃຫ້ເປັນໜ້າສົນໃຈຂອງເຂົາເຈົ້າ.
(15) ໃຫ້ບັນດາກະຊວງ, ອົງການທຽບເທົ່າ ແລະ ບັນດາແຂວງສືບຕໍ່ປະຕິບັດວຽກງານຈຸດສຸມຂອງຕົນໃຫ້ມີປະສິດທິຜົນ ເພື່ອຊຸກຍູ້ການຈັດຕັ້ງປະຕິບັດທິດທາງແຜນການທີ່ລັດຖະບານໄດ້ກໍານົດຢ່າງມີປະສິດທິຜົນ.
