ຊາວໜຸ່ມເປັນແຂນຂວາຂອງພັກ
ໂດຍ: ກ້ອງສ່ອງ ອິດສະຫລະ
ດັ່ງພວກເຮົາຮັບຮູ້ນໍາກັນແລ້ວວ່າ: ວັນທີ 14 ເມສາ ເປັນວັນສ້າງຕັ້ງສູນກາງຊາວໜຸ່ມປະຊາຊົນປະຕິວັດລາວ. ເມື່ອເອີ່ຍເຖິງວັນດັ່ງກ່າວເຮົາຍັງຄິດເຫັນແຕ່ມື້ທີ່ໄດ້ພົບກັບທ່ານປະທານ ໄກສອນ ພົມວິຫານ, ມື້ນັ້ນເປັນວັນອາທິດປະມານ 5-6 ໂມງແລງ ເຮົາໄດ້ເອົາເອກະສານດ່ວນໄປເຊັນນໍາທ່ານນາງ ທອງວິນ ພົມວິຫານ ຕອນເພິ່ນເປັນເລຂາທີໜຶ່ງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ແລະ ເພິ່ນກໍເປັນພັນລະຍາຂອງປະທານ ໄກສອນ ພົມວິຫານ. ມື້ນັ້ນ, ພາຍຫລັງເຂົ້າໄປໃນເຮືອນ ແລະ ນັ່ງປະມານ 15 ນາທີ ກໍເຫັນປະທານ ໄກສອນ ພົມວິຫານ ເຂົ້າປະຕູເຮືອນມາໂດຍມີມ້າຂາວອອກໜ້າໜຶ່ງຄັນ. ພາຍຫລັງເພິ່ນກ້າວຂາເຂົ້າປະຕູເຮືອນ ທັງພັນລະຍາຂອງເພິ່ນ ແລະ ເຮົາເອງກໍໄດ້ຕ້ອນຮັບທັກທາຍໃນຖານະຄືຄົນໃນຄອບຄົວ. ທາງພັນລະຍາຂອງປະທານໄກສອນ ພົມວິຫານ ໄດ້ແນະນໍາຕໍ່ເພິ່ນວ່ານີ້ແມ່ນອາວຄໍາເຜີຍເປັນຮອງຫົວໜ້າຫ້ອງວ່າການ, ລາວຫາກໍຮຽນຈົບທິດສະດີມາແຕ່ຫວຽດນາມ. ຈາກນັ້ນເຮົາເອງກໍຍໍມືກົ້ມຫົວເຄົາລົບດ້ວຍຄວາມນອບນ້ອມ. ມື້ນັ້ນເຮົາດີໃຈຈົນເຫລືອຈະພັນລະນານັບທີ່ໄດ້ພົບກັບປະທານ ໄກສອນ ພົມວິຫານ ຜູ້ນໍາສູງສຸດຂອງປະເທດຊາດ.
ປະທານ ໄກສອນ ພົມວິຫານ ໄດ້ເວົ້າວ່າທັກທາຍກັບເຮົາເໝືອນຄົນຢູ່ໃນຄອບຄົວ, ເພິ່ນເປັນເຈົ້າການຖາມເຮົາໃນຫລາຍບັນຫາແລ້ວກໍໂງມາໃສ່ເວົ້າເລື່ອງລາວຂອງຊາວໜຸ່ມ, ມີບາງຕອນເຮົາຍັງຈື່ໄດ້ເທົ່າທຸກວັນນີ້ວ່າ: ຜູ້ໃດໄດ້ເຂົ້າຊາວໜຸ່ມ, ເຮັດວຽກຊາວໜຸ່ມແມ່ນດີຫລາຍ ຍ້ອນວ່າຊາວໜຸ່ມເປັນແຂນຂວາຂອງພັກ, ເປັນຜູ້ທີ່ໄວ້ເນື້ອເຊື່ອໃຈທີ່ສຸດຂອງພັກ. ພະລັງແຮງຂອງຊາວໜຸ່ມປຽບເໝືອນສິນໄຊແຫ່ງຍຸກສະໄໝ, ປຽບດັ່ງນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງ. ຄໍາວ່າເປັນແຂນຂວາຂອງພັກນັ້ນກໍປຽບເໝືອນແຂນຂອງຄົນເຮົາສ່ວນຫລາຍແມ່ນເບື້ອງຂວາຈະແຮງກວ່າເບື້ອງຊ້າຍ. ຄໍາວ່າຊາວໜຸ່ມປຽບເໝືອນສິນໄຊແຫ່ງຍຸກສະໄໝນັ້ນກໍແມ່ນເປັນກ້ອນກໍາລັງອັນມະຫາສານ ເພື່ອເຮັດໜ້າທີ່ປົກປັກຮັກສາ ແລະ ສ້າງສາປະເທດຊາດ ເພາະຄົນທີ່ມີອາຍຸສັງຂານຍັງໜຸ່ມແໜ້ນລ້ວນແລ້ວແຕ່ເປັນຜູ້ເຂັ້ມແຂງເປັນພະລັງແຮງຂອງຊາດ. ສ່ວນວ່າເປັນນົກອິນຊີທີ່ບໍ່ຢ້ານກົວຕໍ່ພາຍຸລົມແດງນັ້ນກໍແມ່ນມີຄວາມໝາຍຢູ່ວ່ານົກອິນຊີເປັນນົກທີ່ແຂງແຮງບິນເຈີ້ຍເຈີດເວຫາ ເຖິງຈະມີອຸປະສັກມາກີດກັ້ນ, ມີພາຍຸລົມແດງອັນຮ້າຍແຮງມາພັດຜ່ານ ແຕ່ນົກອິນຊີກໍບໍ່ຫວັ່ນກົວ ແລະ ເປັນອຸປະສັກຂອງມັນແຕ່ປະການໃດ.
ນີ້ຄືຄໍາເວົ້າແນະນໍາຂອງປະທານ ໄກສອນ ພົມວິຫານ ທີ່ເຮົາໄດ້ພົບກັບເພິ່ນໃນມື້ນັ້ນ. ແລ້ວນັບແຕ່ນັ້ນມາຮອດປັດຈຸບັນເຮົາເອງກໍຍັງຈົດຈໍາ ແລະ ຊາບຊຶ້ງຕໍ່ຄໍາເວົ້າແນະນໍາຂອງເພິ່ນມາຮອດທຸກວັນນີ້. ຕາມເຮົາວ່າໃນຄວາມເປັນຈິງຂອງສັງຄົມແລ້ວ ໃຜຈະເຮັດຫຍັງລົງໄປບໍ່ວ່າດ້ານໃດດ້ານໜຶ່ງ ຫລື ໃນພາລະກິດໃດໜຶ່ງກໍລ້ວນແລ້ວແຕ່ອາໄສກໍາລັງແຮງຂອງຊາວໜຸ່ມເປັນຕົວຊີ້ວັດ. ສະນັ້ນ ອີງໃສ່ທີ່ຕັ້ງພາລະບົດບາດຂອງຊາວໜຸ່ມທີ່ກາຍເປັນພະລັງແຮງຂອງຊາດ ພັກ ແລະ ລັດຖະບານ ຈຶ່ງໄດ້ເອົາໃຈໃສ່ສຶກສາອົບຮົມບົ່ມເພາະໃຫ້ກາຍເປັນບໍ່ບໍາເພັນອັນແທ້ຈິງຂອງພັກ. ໃນພາລະກິດສ້າງສາພັດທະນາປະເທດຊາດ ຊາວໜຸ່ມລາວໄດ້ມີຜົນງານອັນຍິ່ງໃຫຍ່ມາໃຫ້ປະເທດຊາດ. ໃນທຸກທີ່ທຸກບ່ອນບໍ່ວ່າຢູ່ຕົວເມືອງກໍຄືຊົນນະບົດ, ຊາວໜຸ່ມໄດ້ເປັນກໍາລັງແຮງອັນມະຫາສານອອກໜ້າອອກຕາບຸກທະລຸຕະລຸມບອນຢ່າງໃຫຍ່ຫລວງ ແລະ ມີຜົນສໍາເລັດ. ດ້ວຍບົດບາດທີ່ມີຕໍ່ຊາດ ແລະ ປະຊາຊົນດັ່ງທີ່ວ່າມານີ້ ພັກ ແລະ ລັດຖະບານ ຈຶ່ງໄດ້ຈັດຕັ້ງໃຫ້ມີອົງການສະເພາະຂອງຊາວໜຸ່ມເອີ້ນວ່າຄະນະບໍລິຫານງານຊາວໜຸ່ມປະຊາຊົນປະຕິວັດລາວ ໂດຍຂຶ້ນກັບພັກໂດຍກົງ ແລະ ໃຫ້ຢູ່ພາຍໃຕ້ການຊີ້ນໍາ-ນໍາຈາກພັກ.
ໃນອະດີດຕະການຜ່ານມາ, ໄດ້ມີຊາວໜຸ່ມຫລາຍສະຫາຍກາຍເປັນວິລະຊົນແຫ່ງຊາດ, ເປັນນັກຮົບແຂ່ງຂັນ, ເປັນນັກວິຊາການ, ເປັນວິສະວະກອນ, ເປັນນັກບໍລິຫານ ແລະ ເປັນພະນັກງານທີ່ດີເດັ່ນ ກາຍເປັນກໍາລັງແຮງ ແລະ ເປັນຜູ້ໄວ້ເນື້ອເຊື່ອໃຈຈາກພັກປະຊາຊົນປະຕິວັດລາວຢ່າງແທ້ຈິງ.
