ລາວ-ໄທ ຈະເລີ່ມການຊໍາລະສະສາງດ້ວຍ QR CODE ໃນໄຕມາດສອງຂອງປີນີ້
ທະນາຄານການຄ້າຕ່າງປະເທດ ມະຫາຊົນລາວ (BCEL) ຮ່ວມກັບທະນາຄານທະນາຊາດ ໄດ້ແຈ້ງໃຫ້ຮູ້ກ່ຽວກັບການຮ່ວມມືພັດທະນາລະບົບການຊໍາລະສະສາງ ລະຫວ່າງ ສປປ ລາວ ແລະ ປະເທດໄທ ຜ່ານລະບົບ QR ຢ່າງເປັນທາງການໃນວັນທີ 20 ມີນານີ້ ທີ່ງານ FinTech Fair 2018 ຢູ່ບາງກອກ ປະເທດໄທ ໂດຍການເຂົ້າຮ່ວມຂອງທ່ານ ສອນໄຊ ສິດພະໄຊ ຮອງຜູ້ວ່າການທະນາຄານແຫ່ງ ສປປ ລາວ, ທ່ານ ນາງ ຣຸຊຸກອນ ສິຣິໂຢທິນ ຮອງຜູ້ວ່າການທະນາຄານແຫ່ງ ປະເທດໄທ.
ການພັດທະນາຜະລິດຕະພັນທາງດ້ານບໍລິການທະນາຄານແບບ ດີຈີຕອລ ລະຫວ່າງ ທະນາຄານການຄ້າຕ່າງປະເທດ ມະຫາຊົນລາວ ແລະ ທະນາຄານທະນາຊາດ ໃນການສ້າງນະວັດຕະກໍາໃໝ່ ດ້ານບໍລິການທະນາຄານແບບດີຈີຕອລ ແມ່ນຜົນສູງຂອງການຮ່ວມມືລະຫວ່າງ 2 ທະນາຄານ ດັ່ງກ່າວແຕ່ປີ 2009 ເປັນຕົ້ນມາ ແລະ ການຮ່ວມມືໃນການພັດທະນາລະບົບການຊໍາລະສະສາງລະຫວ່າງປະເທດຜ່ານລະບົບ QR ຈະເປັນການຫຼຸດຜ່ອນການ ນໍາໃຊ້ເງິນສົດ ແລະ ການຄ້າຂາຍລະຫວ່າງສອງປະເທດ ເຊິ່ງຈະເປີດໃຫ້ນໍາໃຊ້ໄດ້ໃນໄຕມາດ II ຂອງປີນີ້; ໃນໄລຍະທໍາອິດນັ້ນ ລູກຄ້າຂອງ BCEL ຈະສາມາດຈ່າຍຄ່າສິນຄ້າ ແລະ ບໍລິການຜ່ານ QR ຂອງລະບົບ Promptpay ທຸກຮ້ານຄ້າຂອງໄທໄດ້ ຫຼັງຈາກນັ້ນ; ທັງສອງຝ່າຍຈະສືບຕໍ່ຮ່ວມມືກັນພັດທະນາໃຫ້ລູກຄ້າທີ່ໃຊ້ Promptpay ສາມາດຊໍາລະຄ່າສິນຄ້າ ແລະ ບໍລິການໃນ ສປປ ລາວ ຜ່ານຮ້ານຄ້າທີ່ໃຊ້ BCEL OnePay.
ຜະລິດຕະພັນ BCEL ONE ຈະຊ່ວຍໃຫ້ການເຄື່ອນໄຫວໃນຊີວິດໃນປະຈຸບັນງ່າຍຂຶ້ນ ເພາະສາມາດຄວບຄຸມທຸລະກໍາດ້ານການເງິນດ້ວຍຕົນເອງ ເຊິ່ງໄດ້ຮັບການຍອມຮັບຈາກສັງຄົມເປັນຢ່າງດີ ແລະ ເມື່ອຕົ້ນປີຜ່ານມານີ້ BCEL ໄດ້ສ້າງຈຸດປ່ຽນຂອງການຊໍາລະເງິນຮູບແບບໃໝ່ທີ່ຖືກໃຈຜູ້ຊົມໃຊ້ ນັ້ນຄືການຊໍາລະດ້ວຍ QR Code ຜ່ານ BCEL OnePay ທີ່ຊ່ວຍຫຼຸດຜ່ອນການນໍາໃຊ້ເງິນສົດໃນການຊໍາລະຄ່າສິນຄ້າ ແລະ ບໍລິການ, ສະດວກວ່ອງໄວ, ປະຢັດເວລາ, ຕົ້ນທຶນຕໍ່າ; ຜູ້ຊື້ສະບາຍ-ຜູ້ຂາຍມີຄວາມສະດວກ, ມີຄວາມປອດໄພ ສາມາດກວດສອບໄດ້, ໄດ້ມາດຕະຖານສາກົນ ຈຶ່ງເປັນທີ່ນິຍົມ ແລະ ມີຜູ້ຊົມໃຊ້ຢ່າງແຜ່ຫຼາຍ.
ການຮ່ວມມືລະຫວ່າງ ທະນາຄານການຄ້າຕ່າງປະເທດລາວ ມະຫາຊົນລາວ ແລະ ທະນາຄານທະນະຊາດ ນັບວ່າເປັນຄັ້ງທໍາອິດ ທີ່ສອງທະນາຄານໃຫຍ່ແຖວໜ້າຂອງສອງປະເທດ ລາວ-ໄທ ຮ່ວມກັນ ພັດທະນາລະບົບການຊໍາລະສະສາງ ລະຫວ່າງປະເທດ ດ້ວຍ QR ເປັນການຮ່ວມກັນຊຸກຍູ້ສ້າງ STANDDARD QR CODE ໃຫ້ເປັນມາດຕະຖານດຽວກັນ ທີ່ມີຄວາມປອດໄພ ແລະ ໄດ້ມາດຕະຖານສາກົນ ເຊິ່ງຈະເພີ່ມຄວາມຄ່ອງຕົວ ແລະ ເປັນປະໂຫຍດຕໍ່ລະບົບຮັບຊໍາລະເງິນລະຫວ່າງປະເທດ ທີ່ມີຄວາມສະດວກວ່ອງໄວປອດໄພ, ພ້ອມທັງ ໄດ້ເປັນການປ່ຽນແປງ ທີ່ຊຸກຍູ້ທັງສອງປະເທດ ກ້າວໄປສູ່ສັງຄົມໄຮ້ເງິນສົດ “Cashless Society”.
ທະນາຄານການຄ້າຕ່າງປະເທດລາວ ມະຫາຊົນ ໄດ້ຫັນເປັນທະນາຄານທຸລະກິດ ກໍມີການພັດທະນາຢ່າງຕໍ່ເນື່ອງ ທີ່ມຸ່ງໝັ້ນໃນການສ້າງນະວັດຕະກໍາໃໝ່ດ້ານບໍລິການທະນາຄານ ອອກຮັບໃຊ້ສັງຄົມຕະຫຼອດມາ ເຊິ່ງທຸກຜະລິດຕະພັນ ໄດ້ຄໍານຶງເຖິງຄວາມຕ້ອງການຂອງລູກຄ້າ ແລະ ສ້າງໄດ້ຂຶ້ນມາ ເພື່ອຕອບໂຈດໃນການດໍາເນີນຊີວິດຊີວິດປະຈໍາວັນໃຫ້ງ່າຍຂື້ນໃນສັງຄົມເທັກໂນໂລຢີທີ່ທັນສະໄໝ ແລະ ການດໍາເນີນທຸລະກິດໃນຍຸກໃໝ່ ໂດຍສະເພາະໃນການຊໍາລະສະສາງ ຜ່ານອີເລັກໂທຣນິກທີ່ສ້າງຄວາມສະດວກສະບາຍ ແລະ ສາມາດກວດສອບໄດ້ ບົນພື້ນຖານຄວາມປອດໄພ ແລະ ໄດ້ມາດຕະຖານສາກົນ.
ໃນຕໍ່ໜ້າ BCEL ຈະສືບຕໍ່ຮ່ວມມືກັບສາກົນໃນການນຳໃຊ້ເທັກໂນໂລຢີ ແລະ ຂະຫຍາຍຂອບເຂດການບໍລິການໃນຮູບແບບ ດີຈີຕອລ ໃຫ້ສາມາດຊຳລະສະສາງຂ້າມແດນ ດ້ວຍ QR CODE ໃຫ້ຫຼາຍຂຶ້ນ ເພື່ອອຳນວຍຄວາມສະດວກໃຫ້ການຄ້າຊາຍແດນ ແລະ ເຮັດໃຫ້ການເຊື່ອມໂຍງລະຫວ່າງພາກພື້ນໂດຍສະເພາະຂົງເຂດການເງິນການທະນາຄານຂອງບັນດາປະເທດລຸ່ມແມ່ນ້ຳຂອງ (GMS) ໃຫ້ມີໃບໜ້າອັນໃໝ່ດີຂຶ້ນເລື້ອຍໆ.
# ຂ່າວ: ຣັດສະໝີ ດວງສັດຈະ
