ອາເມລິກາເລັ່ງຍົກເລີກສາຍການບິນ ສປປ ເກົາຫລີ ກົດດັນໂຄງການນິວເຄຼຍ
ພຽງຢາງ 21 ເມສາ: ອາເມລິກາພວມພິຈາລະນາມາດຕະການຂວ້ຳບາດແອໂຄຣຍໍ ສາຍການບິນແຫ່ງຊາດຂອງ ສປປ ເກົາຫລີ ຫວັງເພີ່ມແຮງກົດດັນທາງເສດຖະກິດໃຫ້ຢຸດການທົດລອງອາວຸດນິວເຄຼຍ ແລະ ລູກສອນໄຟ, ແຕ່ຜູ້ຊ່ຽວຊານຊີ້ວ່າ: ມາດຕະການດັ່ງກ່າວອາດສົ່ງຜົນກະທົບດ້ານການເມືອງຫລາຍກວ່າ.
ຜູ້ຊ່ຽວຊານຊາວ ສປປ ເກົາຫລີ ກ່າວວ່າ: ມາດຕະການຂວ້ຳບາດແອໂຄຣຍໍຈະບໍ່ສ້າງຄວາມເສຍຫາຍມະຫາສານໃຫ້ແກ່ເສດຖະກິດຂອງ ສປປ ເກົາຫລີ, ແຕ່ຈະສົ່ງຜົນກະທົບດ້ານລົບຕໍ່ພາບລວມຂອງປະເທດໃນປະຊາຄົມໂລກແທນ ແລະ ເປັນສິ່ງທີ່ອາເມລິກາຕ້ອງການ. ເຈົ້າໜ້າທີ່ເປີດເຜີຍວ່າ: ອາເມລິກາພວມພິຈາລະນາຍົກລະດັບມາດຕະການຂວ້ຳບາດ ສປປ ເກົາຫລີ ເພື່ອລົງໂທດກໍລະນີທົດລອງອາວຸດນິວເຄຼຍ ແລະ ລູກສອນໄຟຢ່າງຕໍ່ເນື່ອງ.
ທັງນີ້, ແອໂຄຣຍໍ ບໍ່ໄດ້ເຮັດທຸລະກິດດ້ານສາຍການບິນພຽງຢ່າງດຽວເທົ່ານັ້ນ, ແຕ່ຍັງມີການຂະຫຍາຍທຸລະກິດໄປຕະຫລາດສິນຄ້າອຸປະໂພກ-ບໍລິໂພກນຳອີກ ມີທັງຜະລິດຢາສູບ ແລະ ເຄື່ອງດື່ມອັດລົມ ລວມທັງເຮັດທຸລະກິດດ້ານອູ່ລົດຕັກຊີ ແລະ ສະຖານີບໍລິການນ້ຳມັນໃນປະເທດ. ອີກທັງຜູ້ຈັດການທົ່ວໄປຂອງໂຄຣຍໍທົວ ບໍລິສັດນຳທ່ຽວ ສປປ ເກົາຫລີ ສະແດງຄວາມຄິດເຫັນວ່າ: ສິນຄ້າຂອງແອໂຄຣຍໍໄດ້ຮັບການສະໜັບສະໜູນຢ່າງຫລວງຫລາຍຢູ່ ສປປ ເກົາຫລີ.
