ນາຍົກລັດຖະມົນຕີ ທອງລຸນ ສີສຸລິດ ໂອ້ລົມພີ່ນ້ອງຄົນເຊື້ອຊາດລາວທີ່ອົດສະຕຣາລີ

ໃນໂອກາດເຂົ້າຮ່ວມກອງປະຊຸມສຸດຍອດສະໄຫມພິເສດອາຊຽນ-ອົດສະຕຣາລີທີ່ຊິດນີ, ປະເທດອົດສະຕຣາລີ ລະຫວ່າງວັນທີ 15-19 ມີນານີ້,  ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍພັນລະຍາ ໄດ້ຕ້ອນຮັບການເຂົ້າຢ້ຽມຂ່ຳນັບຂອງພີ່ນ້ອງຄົນເຊື້ອຊາດລາວທີ່ດຳລົງຊີວິດຢູ່ອົດສະຕຣາລີ, ນໍາໂດຍທ່ານນາງ ໄພວັນພູມິນ ພົນເສນາ ກຳມະການສູນກາງແນວລາວສ້າງຊາດປະຈຳອົດສະຕຣາລີ ແລະ ພີ່ນ້ອງຄົນ ເຊື່ອຊາດລາວປະມານ 50 ທ່ານໃນຕອນແລງຂອງວັນທີ 16 ມີນາຜ່ານມາ.

ໃນໂອກາດນີ້, ທ່ານ ທອງລຸນ ສີສຸລິດ ໄດ້ຍົກໃຫ້ເຫັນວ່າ: ພັກ ແລະ ລັດຖະບານ, ຍາມໃດກໍຖືວ່າພີ່ນ້ອງຄົນເຊື້ອຊາດລາວຢູ່ຕ່າງປະເທດແມ່ນວົງຄະນະຍາດແຫ່ງຊາດທີ່ບໍ່ສາມາດຕັດແຍກອອກຈາກກັນໄດ້, ທັງເປັນກໍາລັງແຮງໜຶ່ງປະກອບສ່ວນເຂົ້າໃນການສ້າງສາພັດທະນາປະເທດຊາດ, ເປັນປັດໃຈ ແລະ ຂົວຕໍ່ທີ່ສໍາຄັນໃນການຊຸກຍູ້ການພົວພັນມິດຕະພາບ ແລະ ການຮ່ວມມືທີ່ດີລະຫວ່າງລາວ ແລະ ອົດສະຕຣາລີ ໃຫ້ແໜ້ນແຟ້ນຍິ່ງໆຂຶ້ນ. ພັກ-ລັດຖະບານ ມີນະໂຍບາຍສົ່ງເສີມ ແລະ ອຳນວຍຄວາມສະດວກໃຫ້ແກ່ພີ່ນ້ອງເຊື້ອຊາດລາວຢູ່ຕ່າງປະເທດໄດ້ກັບໄປຢ້ຽມຢາມບ້ານເກີດເມືອງນອນຂອງຕົນ, ພົບປະຍາດພີ່ນ້ອງ, ເຂົ້າຮ່ວມກິດຈະກໍາສະເຫລີມສະຫລອງວັນສໍາຄັນຕ່າງໆຂອງຊາດ ກໍຄືໂອກາດການມີສ່ວນຮ່ວມໃນການພັດທະນາສ້າງສາປະເທດຊາດ ແລະ ຊຸກຍູ້ໃຫ້ຊີວິດການເປັນຢູ່ຂອງປະຊາຊົນລາວນັບມື້ດີຂຶ້ນ.

ການພົບປະຄັ້ງນີ້, ເຕັມໄປດ້ວຍບັນຍາກາດໄມຕີຈິດມິດຕະພາບ, ຊຶ່ງພີ່ນ້ອງຄົນເຊື້ອຊາດລາວຢູ່ອົດສະຕຣາລີຕ່າງກໍໃຫ້ຄວາມສົນໃຈຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ລວມທັງປະກອບສ່ວນໃນການເຜີຍແຜ່ໂຄສະນາວັດທະນະທໍາ, ຮີດຄອງປະເພນີອັນດີງາມຂອງລາວ ແລະ ຍັງມີຄວາມສົນໃຈຢາກປະກອບສ່ວນເຂົ້າໃນການສ້າງສາພັດທະນາປະເທດຊາດ ບໍ່ວ່າຈະດ້ວຍຮູບການເຂົ້າມາລົງທຶນຢູ່ລາວ ແລະ ເປັນອາສາສະຫມັກເຂົ້າມາຊ່ວຍເຫລືອສັງຄົມລາວເຮົາ.

ປັດຈຸບັນ, ຄົນເຊື້ອຊາດລາວທີ່ດຳລົງຊີວິດຢູ່ອົດສະຕຣາລີມີຫລາຍກວ່າ 15 ພັນຄົນ, ຊຶ່ງປະກອບອາຊີບຢູ່ໃນຂະແຫນງການຕ່າງໆ. ນອກນັ້ນ, ຍັງມີຈຳນວນໜຶ່ງມີລະດັບການສຶກສາສູງ ແລະ ເຂົ້າເຮັດວຽກຢູ່ໃນກົງຈັກລັດຂອງອົດສະຕຣາລີ ແລະ ມີການຈັດຕັ້ງທັງຫມົດ 16 ສະມາຄົມ.