ລາວ-ຫວຽດນາມ ແລກປ່ຽນບົດຮຽນວຽກງານສະພາປະຊາຊົນຂັ້ນແຂວງ
ໃນວັນທີ 21 ມີນານີ້, ທີ່ນະຄອນຫລວງວຽງຈັນ, ສະພາປະຊາຊົນພາກກາງຂອງ ສປປ ລາວ ແລະ ສະພາປະຊາຊົນນະຄອນໂຮຈີ່ມິງ, ໄດ້ຈັດສໍາມະນາແລກປ່ຽນບົດຮຽນ ແລະ ປະສົບການນໍາກັນ, ໂດຍການເປັນປະທານຂອງທ່ານ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ, ທ່ານ ອານຸພາບ ຕຸລາລົມ ປະທານສະພາປະຊາຊົນນະຄອນຫລວງວຽງຈັນ, ທ່ານ ນາງ ຫງວຽນ ທິ ກວຽດ ເຕີມ ປະທານສະພາປະຊາຊົນນະຄອນໂຮຈີ່ມິງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົງສະເໜ່ ຍຸຕິທໍາ ກ່າວວ່າ: ການຈັດສໍາມະນານີ້, ເພື່ອເປັນການແລກປ່ຽນບົດຮຽນກັບສະພາປະຊາຊົນນະຄອນໂຮຈີ່ມິງ ໃນຫລາຍຫົວຂໍ້ທີ່ປິ່ນອ້ອມການປະຕິບັດພາລະບົດບາດ, ສິດໜ້າທີ່ຂອງສະພາປະຊາຊົນແຂວງ, ເພາະປັດຈຸບັນທັງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ກໍາລັງສຸມໃສ່ສ້າງ ແລະ ປັບປຸງບັນດານິຕິກໍາ, ກົນໄກ, ລະບອບ, ລະບຽບການ ກໍຄືແບບແຜນວິທີເຮັດວຽກຂອງກົງຈັກການຈັດຕັ້ງຕ່າງໆ, ທັງຂັ້ນສູນກາງ ແລະ ທ້ອງຖິ່ນ. ການສໍາມະນາຈະຊ່ວຍຍົກລະດັບຄວາມຮູ້, ຄວາມສາມາດແກ່ສະມາຊິກສະພາປະຊາຊົນຂັ້ນແຂວງ, ໂດຍສະເພາະແມ່ນສະພາປະຊາຊົນຂັ້ນແຂວງ ຂອງສປປ ລາວ ທີ່ຫາກໍ່ສ້າງຕັ້ງຂຶ້ນພຽງ 2 ປີສາມາດສຶກສາຄົ້ນຄວ້າ, ນໍາໃຊ້ບົດຮຽນຂອງສະພາປະຊາຊົນນະຄອນໂຮຈີ່ມິງເຂົ້າໃນເງື່ອນໄຂສະພາບຕົວຈິງ ຢູ່ໃນແຕ່ລະແຂວງຢ່າງມີປະສິດທິຜົນ.
