ເກີດເຫດຍິງໂຈມຕີຢູ່ນະຄອນຫລວງປາຣີຂອງຝຣັ່ງເຮັດໃຫ້ຕຳຫລວດເສຍຊີວິດ 1 ຄົນ
ປາຣີ 21 ເມສາ: ເຈົ້າໜ້າທີ່ຕຳຫລວດຝຣັ່ງຖືກຍິງເສຍຊີວິດ 1 ຄົນ ແລະ ອີກ 2 ຄົນໄດ້ຮັບບາດເຈັບ ໃນເຫດຍິງໂຈມຕີຢູ່ນະຄອນຫລວງປາຣີຂອງຝຣັ່ງໃນຄືນວັນທີ 20 ເມສານີ້ຕາມເວລາທ້ອງຖິ່ນ, ໃນຂະນະທີ່ເຫລືອອີກບໍ່ເທົ່າໃດວັນຈະມີການເລືອກຕັ້ງປະທານາທິບໍດີຝຣັ່ງ ໂດຍກຸ່ມລັດອິສລາມ ຫລື IS ໄດ້ຟ້າວອອກມາອ້າງຕົວວ່າຢູ່ເບື້ອງຫລັງການກໍ່ເຫດເທື່ອນີ້.
ຄົນຮ້າຍເປີດສາກໃຊ້ປືນອັດຕະໂນມັດຍິງເຂົ້າໃສ່ລົດຕູ້ຂອງຕຳຫລວດຢູ່ຖະໜົນໝອງ ເຊລິເຊ ເຊິ່ງເປັນຖະໜົນທີ່ເປັນນິຍົມທົ່ວໂລກ ເມື່ອເວລາ 21:00 ໂມງ ຕາມເວລາທ້ອງຖິ່ນ ຫລື ກົງກັບ 02:00 ໂມງ ວັນທີ 21 ເມສາ ຕາມເວລາຢູ່ປະເທດລາວ ເຮັດໃຫ້ນັກທ່ອງທ່ຽວ ແລະ ປະຊາຊົນຢູ່ບໍລິເວນດັ່ງກ່າວແລ່ນໜີເອົາຊີວິດລອດ, ພາຍຫລັງຍິງຕຳຫລວດເສຍຊີວິດ 1 ຄົນ ແລະ ບາດເຈັບອີກ 2 ຄົນ ໃນຈຸດທີ່ຢູ່ຫ່າງຈາກປະຕູໄຊພຽງບໍ່ເທົ່າໃດແມັດ, ຄົນຮ້າຍກໍຖືກຕຳຫລວດຍິງເສຍຊີວິດໃນເວລາແລ່ນຫລົບໜີຈາກຈຸດເກີດເຫດ. ປະທານາທິບໍດີ ຟຣັງຊົວ ໂອນລອງ ຂອງຝຣັ່ງ ກ່າວວ່າ: ທ່ານເຊື່ອວ່າເຫດການຍິງໂຈມຕີທີ່ເກີດຂຶ້ນຢູ່ຖະໜົນໝອງ ເຊລິເຊ ຖະໜົນສາຍສຳຄັນຂອງນະຄອນຫລວງປາຣີທີ່ເຕັມແຕ່ນັກທ່ອງທ່ຽວ ແລະ ມີການຈະລາຈອນໜາແໜ້ນ ເປັນການກະທຳຂອງພວກກໍ່ການຮ້າຍ ເຊິ່ງຜູ້ກໍ່ເຫດໃນເທື່ອນີ້ ຖືກຕຳຫລວດຍິງເສຍຊີວິດໃນລະຫວ່າງຍິງປະທະກັນ ແລະ ຕຳຫລວດຍັງໄດ້ເຂົ້າກວດຄົ້ນເຮືອນຂອງຄົນຮ້າຍທີ່ຢູ່ບໍລິເວນຕາເວັນອອກຂອງນະຄອນຫລວງປາຣີນຳອີກ. ເຈົ້າໜ້າທີ່ຕຳຫລວດຢູ່ບໍລິເວນຈຸດເກີດເຫດກ່າວວ່າ: ພວມຄົ້ນຫາຜູ້ຮ່ວມກໍ່ເຫດໃນເທື່ອນີ້ ເຊິ່ງອາດຈະມີຫລາຍກວ່າ 1 ຄົນ, ສ່ວນກຸ່ມ IS ໄດ້ກ່າວອ້າງຜ່ານທາງສຳນັກຂ່າວອາມັດຂອງກ່ມ IS ວ່າ: ເປັນຜູ້ຢູ່ເບື້ອງຫລັງໃນການກໍ່ເຫດເທື່ອນີ້ ພ້ອມກັບລະບຸຊື່ຜູ້ລົງມືວ່າ: ຄືທ້າວ ອາບູ ຢູຊິບ ເປັນນັກຮົບຂອງ IS ຊາວຝຣັ່ງ ອາຍຸ 39 ປີ ແລະ ຕຳຫລວດຕໍ່ຕ້ານການກໍ່ການຮ້າຍຮູ້ຈັກລາວມາກ່ອນໜ້ານີ້ແລ້ວ, ລາວເຄີຍຖືກລົງໂທດຈຳຄຸກ 15 ປີ ໃນເດືອນກຸມພາ 2005 ໃນຄວາມຜິດທີ່ກ່ຽວກັບການພະຍາຍາມຂ້າ ທີ່ມີຕຳຫລວດລວມຢູ່ນຳ.
