ຄູຝຶກທີມຊາດລາວຫວັງເກັບ ຄະແນນຈາກກໍາປູເຈຍມື້ນີ້

ນັກກິລາທີມຊາດລາວ ລົງສະໜາມພົບກັບທີມຊາດກໍາປູເຈຍ ໃນວັນທີ 21 ມີນາ 2018 ເວລາ 18:00 ໂມງ ທີ່ສະໜາມກິລາແຫ່ງຊາດລາວຫລັກ 16 ໃນການແຂ່ງຂັນນັດພິເສດ ຟີຟາເດ. ຂະນະທີ່ ຄູຝຶກຫວັງເກັບຄະແນນຈາກການລົງສະໜາມຄັ້ງດັ່ງກ່າວ.

ທ່ານ ໄມວອງ ຫົວໜ້າຄູຝຶກທີມຊາດລາວ ໄດ້ກ່າວໃນພິທີຖະແຫລງການກຽມຄວາມພ້ອມເຂົ້າຮ່ວມການແຂ່ງຂັນນັດພິເສດວ່າ: ການລົງສະໜາມຄັ້ງນີ້ຖືວ່າເປັນປະສົບການອັນໜຶ່ງຂອງນັກກິລາທີມຊາດຂອງພວກເຮົາ ເພາະນັກກິລາຂອງພວກເຮົາສ່ວນຫລາຍເປັນນັກກິລາທີ່ມາຈາກຫລາຍສະໂມສອນ. ສ່ວນເວລາການຝຶກຊ້ອມກໍບໍ່ໄດ້ຫລາຍພຽງແຕ່ 2 ອາທິດກວ່າເທົ່ານັ້ນ. ແນວໃດກໍຕາມ ພວກເຮົາກໍຫວັງຈະເກັບຄະແນນໃນນັດນີ້ໃຫ້ໄດ້ ເພາະວ່າພວກເຮົາມີຄວາມໝັ້ນໃຈຕົວນັກກິລາຂອງພວກເຮົາຫລາຍ. ສໍາລັບການລົງສະໜາມຄັ້ງນີ້ພວກເຮົາໃຊ້ນັກກິລາທີ່ເຄີຍຜ່ານປະສົບການມາຫລາຍ ເປັນຕົ້ນທ້າວ ພັດທະນາ ພົມເທບ, ທ້າວ ທົດນີລາດ ສີບຸນເຮືອງ,  ທ້າວ ພິທັກ ກອງມາທິລາດ ເຊິ່ງທັງ 3 ຄົນນີ້ລ້ວນແຕ່ມີປະສົບການຫລາຍ ແລະ ເຄີຍເຂົ້າຮ່ວມແຂ່ງຂັນພາຍໃນ ແລະ ຕ່າງປະເທດ.

ຂະນະທີ່ທ້າວ ພັດທະນາ ພົມເທບ ນັກກິລາທີມຊາດ ໃຫ້ສໍາພາດຫລັງຈາກຖະແຫລງຂ່າວວ່າ: ຕົນເອງຮູ້ສຶກພາກພູມໃຈທີ່ເປັນຕົວແທນໃຫ້ກັບນັກກິລາລາວລົງສະໜາມໃນຄັ້ງນີ້, ຫວັງວ່າການລົງສະໜາມໃນຄັ້ງດັ່ງກ່າວຕົນເອງຈະນໍາປະສົບການທີ່ໄດ້ເຂົ້າຮ່ວມການແຂ່ງຂັນທັງພາຍໃນ ແລະ ຕ່າງປະເທດມານໍາໃຊ້ໃນຄັ້ງນີ້.

ສໍາລັບການລົງສະໜາມຄັ້ງທີ 2 ທີມຊາດລົງສະໜາມພົບກັບບັງກາລະເທດ ໃນວັນທີ 27 ມີນາ ນີ້ ເວລາ 18:00 ໂມງ ທີ່ສະໜາມກິລາແຫ່ງຊາດຫລັກ 16.