ແມ່ຍິງເຂດຊົນນະບົດມີສິ່ງທ້າທາຍໃນການເຂົ້າເຖິງຂໍ້ມູນຂ່າວສານ
ທ່ານນາງ ສຸພາລັກ ທິລາວົງ ປະທານສະຫະພັນແມ່ຍິງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໄດ້ກ່າວໃນພິທີສະເຫລີມສະຫລອງວັນແມ່ຍິງສາກົນຄົບຮອບ 108 ປີ (8 ມີນາ 1910-8 ມີນາ 2018) ໃນວັນທີ 16 ມີນານີ້, ທີ່ຫໍວັດທະນະທຳແຫ່ງຊາດວ່າ: ປັດຈຸບັນ ບັນຫາທີ່ເປັນອຸປະສັກຕໍ່ຄວາມກ້າວໜ້າຂອງແມ່ຍິງ, ໂດຍສະເພາະແມ່ນແມ່ຍິງກັບວຽກງານສື່ມວນຊົນແມ່ນຍັງມີສິ່ງທ້າທາຍຫລາຍ, ຊຶ່ງແມ່ຍິງຍັງບໍ່ທັນໄດ້ຮັບຂໍ້ມູນຂ່າວສານຢ່າງກວ້າງຂວາງ ເປັນຕົ້ນ: ບັນຫາຄວາມບໍ່ສະເໝີພາບລະຫວ່າງຍິງ-ຊາຍ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ໂດຍສະເພາະແມ່ຍິງຢູ່ເຂດຊົນນະບົດຫ່າງໄກສອກຫລີກ, ຖ້າສົມທຽບກັບເພດຊາຍແມ່ນໄດ້ຮັບຂໍ້ມູນຂ່າວສານໜ້ອຍກວ່າ, ເນື່ອງຈາກເອື້ອຍນ້ອງແມ່ຍິງໄດ້ເຮັດໜ້າທີ່ສຶກສາອົບຮົມລູກເຕົ້າ, ແຕ່ງຢູ່ຄົວກິນ ແລະ ການສ້າງເສດຖະກິດຄອບຄົວອື່ນໆ, ຍິ່ງໄປກວ່ານັ້ນແມ່ຍິງໃນເຂດຊົນນະບົດຍັງບໍ່ມີໂອກາດໄດ້ເຂົ້າຮ່ວມໃນຂະບວນການໂຮມຊຸມນຸມ ແລະ ກອງປະຊຸມຕ່າງໆ.
ການສະເຫລີມສະຫລອງວັນແມ່ຍິງສາກົນປີນີ້, ມີຄຳຂວັນວ່າ: “ເຖິງເວລາແລ້ວທີ່ທຸກຄົນຮ່ວມມືກັນປັບປຸງຊີວິດການເປັນຢູ່ຂອງແມ່ຍິງໃນຕົວເມືອງ ແລະ ຊົນນະບົດໃຫ້ດີຂຶ້ນ”.
