ການໂຄສະນາເຜີຍແຜ່ບັນດານິຕິກຳຊາຍແດນລະຫວ່າງ ສປປ ລາວ ກັບປະເທດໃກ້ຄຽງ

ໃນວັນທີ 15-16 ມີນານີ້, ທ່ານ ແພງສະຫວັນ ແກ້ວປະເສີດ ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ ພ້ອມດ້ວຍບັນດາຜູ້ຕາງໜ້າຈາກພາກສ່ວນກ່ຽວຂ້ອງຈາກກົມຄຸ້ມຄອງພົນລະເມືອງ, ກະຊວງພາຍໃນ, ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ແລະ ກົມຕຳຫຼວດກວດຄົນເຂົ້າ-ອອກເມືອງ, ກະຊວງປ້ອງກັນຄວາມສະຫງົບ, ສູນກາງແນວລາວສ້າງຊາດ, ກົມກົງສຸນ, ກະຊວງການຕ່າງປະເທດ, ຄະນະໂຄສະນາອົບຮົມສູນກາງພັກ ໄດ້ເຄື່ອນໄຫວວຽກງານໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດທີ່ກ່ຽວຂ້ອງກັບວຽກງານຊາຍແດນ ລະຫວ່າງ ສປປ ລາວ ກັບບັນດາປະເທດໃກ້ຄຽງໃຫ້ແກ່ຜູ້ຕາງໜ້າຈາກທຸກຂະແໜງການຂອງແຂວງອຸດົມໄຊ ແລະ ບັນດາເມືອງອ້ອມຂ້າງຂອງແຂວງ; ຊຶ່ງການໂຄສະນະເຜີຍແຜ່ໃນຄັ້ງນີ້ ໄດ້ຈັດຂຶ້ນຢູ່ທີ່ຫ້ອງວ່າການປົກຄອງແຂວງອຸດົມໄຊ ແລະ ຫ້ອງວ່າການປົກຄອງເມືອງນາຫມໍ້.

ກອງປະຊຸມນີ້ຈັດຂຶ້ນພາຍໃຕ້ການຮ່ວມມືກັນລະຫວ່າງຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດກັບພະແນກການຕ່າງປະເທດແຂວງອຸດົມໄຊ. ໃນວາລະດຳເນີນກອງປະຊຸມ, ພາຍຫຼັງທ່ານ ພົນຈັດຕະວາ ຈັນທະວອນ ໄຊຍະຜົງ, ຄະນະປະຈຳພັກແຂວງ, ຫົວໜ້າກອງບັນຊາການທະຫານແຂວງ, ຮອງປະທານປ້ອງກັນຊາດ-ປ້ອງກັນຄວາມສະຫງົບ ທັງເປັນຫົວໜ້າຄະນະກຳມະການຊາຍແດນ ລາວ-ຈີນ ຂັ້ນແຂວງ ໄດ້ກ່າວເປີດກອງປະຊຸມຢ່າງເປັນທາງການແລ້ວ, ບັນດາຜູ້ຕາງໜ້າຈາກສູນກາງ ກໍໄດ້ຂຶ້ນຜັດປ່ຽນກັນບັນຍາຍເອກະສານທີ່ຕົນໄດ້ກະ ກຽມມາ ໂດຍເລີ່ມຈາກຫົວຂໍ້: ປະຫວັດຄວາມເປັນມາຂອງການກຳນົດເຂດແດນ ແລະ ປັກຫຼັກໝາຍຊາຍແດນຂອງລາວກັບບັນດາປະເທດໃກ້ຄຽງໃນໄລຍະຜ່ານມາ, ຊຶ່ງໄດ້ຊີ້ໃຫ້ເຫັນຜົນສໍາເລັດ, ຂໍ້ສະດວກ, ຂໍ້ຫຍຸ້ງຍາກ, ຂໍ້ຄົງຄ້າງ ແລະ ທິດທາງແກ້ໄຂໃນຕໍ່ໜ້າ, ໃນນີ້ໄດ້ເນັ້ນກ່ຽວກັບສະພາບທີ່ເກີດຂຶ້ນຕາມບໍລິເວນຊາຍແດນ ລາວ-ກໍາປູເຈຍ ໂດຍສະເພາະບໍລິເວນແກ້ງຕໍມໍຄອຍ-ຫ້ວຍຕະເງົາ ໃຫ້ທີ່ປະຊຸມຮັບຊາບໂດຍຫຍໍ້ຕື່ມອີກ; ສັນຍາວ່າດ້ວຍລະບຽບການຄຸ້ມຄອງຊາຍແດນ ລະຫວ່າງ ສປປ ລາວ ກັບ ສປ  ຈີນ, ສັນຍາວ່າດ້ວຍດ່ານ ແລະ ລະບຽບການຄຸ້ມຄອງດ່ານ ລະ ຫວ່າງ ສປປ ລາວ ກັບ ສປ ຈີນ, ອະນຸສັນຍາວ່າດ້ວຍການກວດກາຊາຍແດນຮ່ວມຄັ້ງທີ I ລະຫວ່າງ ສປປ ລາວ ກັບ ສປ ຈີນ; ວຽກງານກົງສູນ-ການແຕ່ງດອງລະຫວ່າງພົນລະເມືອງລາວກັບຄົນຕ່າງປະເທດ; ວຽກງານກວດກາຄົນ ເຂົ້າ-ອອກ ເມືອງ; ວຽກງານຄຸ້ມຄອງພົນລະເມືອງ ກ່ຽວກັບ ການຈົດທະບຽນຄອບຄົວ ແລະ ການຍົກຍ້າຍ; ວຽກງານຄຸ້ມຄອງສຳມະໂນຄົວ; ວຽກງານການທູດປະຊາຊົນຂອງແນວລາວສ້າງຊາດ ແລະ ຄວາມໝາຍຄວາມສໍາຄັນຂອງວຽກງານໂຄສະນາ, ຊຶ່ງໃນເວລາບັນຍາຍ, ຜູ້ບັນຍາຍ ກໍໄດ້ເປິດໂອກາດໃຫ້ແກ່ຜູ້ເຂົ້າຮ່ວມກອງປະຊຸມຈໍານວນ 180 ຄົນ ຍົກເອົາບັນຫາທີ່ມີຄວາມສົນໃຈຂຶ້ນມາແລກ ປ່ຽນຄຳຄິດຄຳເຫັນ ຫຼື ຖາມ-ຕອບ ນຳກັນ ເພື່ອເຮັດໃຫ້ມີຄວາມເປັນເອກະພາບກັນ ລະຫວ່າງ ສູນກາງ ແລະ ທ້ອງຖິ່ນ ໃນເວລາການຈັດຕັ້ງປະຕິບັດວຽກງານ ແລະ ແກ້ໄຂບັນຫາຕົວຈິງ ຖ້າມີກໍລະນີເກີດຂຶ້ນ ພ້ອມນີ້ກໍເພື່ອແນໃສ່ປົກປັກຮັກສາອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໃຫ້ໝັ້ນຄົງ ລວມທັງການສ້າງເສັ້ນຊາຍແດນລະຫວ່າງ ສປປ ລາວ ກັບປະເທດໃກ້ຄຽງໃຫ້ກາຍເປັນຊາຍແດນ ແຫ່ງ ສັນຕິພາບ, ມິດຕະພາບ ແລະ ການຮ່ວມມືຢ່າງຍືນຍົງ.