ຜູ້ນຳອິນໂດເນເຊຍສະໜັບສະໜູນ ຮັບອົດສະຕຣາລີເປັນສະມາຊິກອາຊຽນ
ປະທານາທິບໍດີ ໂຈໂກ ວິໂດໂດ ສະໜັບສະໜູນການຮັບອົດສະຕຣາລີເຂົ້າເປັນສະມາຊິກໃໝ່ຂອງປະຊາຄົມປະຊາຊາດແຫ່ງອາຊີຕາເວັນອອກສຽງໃຕ້ ເພື່ອຍົກລະດັບສະຖຽນລະພາບໃນທຸກດ້ານ.
Labor and Coalition welcome Joko Widodo's invitation for Australia to join ASEAN https://t.co/znrMsZWoep #auspol
— The Sydney Morning Herald (@smh) March 16, 2018
ສຳນັກຂ່າວຕ່າງປະເທດລາຍງານຈາກເມືອງຊິດນີ ປະເທດອົດສະຕຣາລີ ໃນວັນທີ 16 ມີນາວ່າ: ໜັງສືພິມ ເດິ ຊິດນີ ມໍນິງ ເຮຣັລ ສະບັບວັນທີ 16 ມີນາ ຕີພິມບົດສຳພາດຂອງປະທານາທິບໍດີ ໂຈໂກ ວິໂດໂດ ຜູ້ນຳອິນໂດເນເຊຍວ່າ: ໂດຍສ່ວນຕົວທ່ານຄິດວ່າການທີ່ອົດສະຕຣາລີຈະເຂົ້າເປັນສະມາຊິກຖາວອນຂອງປະຊາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) “ເປັນເລື່ອງທີ່ດີ” ເນື່ອງຈາກຈະເປັນການສົ່ງເສີມສະຖຽນລະພາບທັງໃນດ້ານເສດຖະກິດ, ການເມືອງ ແລະ ຄວາມໝັ້ນຄົງໃຫ້ແກ່ພາກພື້ນອາຊີຕາເວັນອອກສຽງໃຕ້.
ຄຳຖະແຫລງດັ່ງກ່າວຖືເປັນຄັ້ງທຳອິດທີ່ຜູ້ນຳອິນໂດເນເຊຍສະແດງຄວາມຄິດເຫັນຢ່າງກົງໄປກົງມາ ແລະ ເປີດເຜີຍ ໃນບັນຫາການເພີ່ມຈຳນວນສະມາຊິກອາຊຽນ ຈາກປັດຈຸບັນທີ່ມີຢູ່ 10 ປະເທດ ໄດ້ແກ່ບຣູໄນ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ມຽນມາ, ໄທ, ສິງກະໂປ, ຫວຽດນາມ ແລະ ຟີລິບປິນ ໂດຍອິນໂດເນເຊຍ, ຟີລິບປິນ, ມາເລເຊຍ, ສິງກະໂປ ແລະ ໄທ ເປັນປະເທດຮ່ວມສ້າງຕັ້ງອາຊຽນຈາກການລົງນາມຮ່ວມກັນໃນປະລິນຍາບາງກອກ ໃນປີ 1967. ຂະນະທີ່ອົດສະຕຣາລີມີການພົວພັນກັບອາຊຽນໃນຖານະປະເທດຄູ່ເຈລະຈານັບແຕ່ປີ 1974.
