ຕໍາຫລວດອຸດົມໄຊຈັບຜູ້ຄ້າຢາເສບຕິດລາຍໃຫຍ່ພ້ອມຂອງກາງຢາບ້າ 72 ພັນເມັດມາດໍາເນີນຄະດີ
March 15, 2018 - 7:07 PM
ກອງບັນຊາການ ປກສ ແຂວງອຸດົມໄຊ ໃຫ້ຮູ້ວ່າ: ເມື່ອບໍ່ດົນມານີ້, ກໍາລັງປ້ອງກັນເຄື່ອນທີ່ຂອງຕົນສາມາດຈັບຜູ້ຄ້າຢາເສບຕິດລາຍໃຫຍ່ຊື່ທ້າວຟາຍດາຊົງ ອາຍຸ 44 ປີຢູ່ບ້ານນ້ຳປຸຍເມືອງພຽງແຂວງໄຊຍະບູລີ ແລະ ທ້າວ ຕົງລູ ຊົງ ອາຍຸ 45 ປີຢູ່ບ້ານດອນໄຊເມືອງໄຊແຂວງອຸດົມໄຊ, ພ້ອມຂອງກາງຢາບ້າ 72 ພັນເມັດມາດໍາເນີນຄະດີຕາມລະບຽບກົດໝາຍ.
ເຈົ້າໜ້າທີ່ ໃຫ້ຮູ້ວ່າ: ຜ່ານການສືບສວນ-ສອບສວນຂອງເຈົ້າໜ້າທີ່ພວກເຂົາຮັບສາລະພາບວ່າ: ຢາບ້າດັ່ງກ່າວແມ່ນຂອງພວກຕົນແທ້, ເຊິ່ງໄດ້ຊື້ມາຈາກຂະບວນການດຽວກັນ ເພື່ອຈະໄປສົ່ງໃຫ້ຜູ້ສັ່ງຊື້ຢູ່ເທດສະບານແຂວງອຸດົມໄຊ ແລະ ຜ່ານມາແມ່ນເຄີຍຮ່ວມກັນຄ້າຂາຍຢາເສບຕິດມາແລ້ວຫລາຍຄັ້ງ.
ປັດຈຸບັນ, ຄະດີຢາເສບຕິດລາຍນີ້, ເຈົ້າໜ້າທີ່ພວມຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດໍາເນີນຄະດີຕາມລະບຽບກົດໝາຍໂດຍໄວ.
