ດຶງເຊືອກອາຊີວະເກມຄັ້ງທີ 1 ຈະຈັດຂຶ້ນຕົ້ນເດືອນພຶດສະພານີ້
ສະຫະພັນດຶງເຊືອກແຫ່ງຊາດລາວຮ່ວມກັບກົມອາຊີວະສຶກສາ ກະຊວງສຶກສາທິການ ແລະ ກິລາ ກຽມຈັດການແຂ່ງຂັນດຶງເຊືອກອາຊີວະເກມຄັ້ງທີ 1 ຂຶ້ນໃນຕົ້ນເດືອນພຶດສະພາ ທີ່ນະຄອນຫລວງວຽງຈັນ ເພື່ອສົ່ງເສີມນັກຮຽນ-ນັກສຶກສາພາກລັດ ແລະ ເອກະຊົນຫັນມາຫລິ້ນກິລາດຶງເຊືອກໃຫ້ນັບມື້ຫລາຍຂຶ້ນ.
ທ່ານ ບຸນພົມ ແກ້ວໄມພິດ ຮອງປະທານສະຫະພັນດຶງເຊືອກແຫ່ງຊາດ ໃຫ້ສໍາພາດວ່າ: ການແຂ່ງຂັນດຶງເຊືອກອາຊີວະຄັ້ງທີ 1 ເຊິ່ງຈະເລີ່ມຂຶ້ນລະຫວ່າງວັນທີ 4-6 ພຶດສະພາ 2018 ໂດຍຄາດວ່າຈະມີນັກກິລາຫລາຍພາກສ່ວນເຂົ້າຮ່ວມ ໃນເບື້ອງຕົ້ນພວກເຮົາໄດ້ແຈ້ງໃຫ້ບັນດາໂຮງຮຽນ, ວິທະຍາໄລຕ່າງໆເພື່ອເຂົ້າຮ່ວມການແຂ່ງຂັນດັ່ງກ່າວ. ການແຂ່ງຂັນຄັ້ງນີ້ເປັນອີກ 1 ແຜນຂອງການເຄື່ອນໄຫວຂອງສະຫະພັນຂອງພວກເຮົາ ທັງນີ້ເພື່ອເປັນການສະເຫລີມສະຫລອງປີທ່ອງທ່ຽວລາວໃຫ້ມີຂະບວນຟົດຟື້ນ ພ້ອມທັງຝຶກຊ້ອມຄັດເລືອກນັກກິລາເຂົ້າຮ່ວມການແຂ່ງຂັນໃນລະດັບພາກພື້ນ ແລະ ສາກົນ.
ພິເສດການແຂ່ງຂັນຄັ້ງນີ້ ວິທະຍະໄລເຕັກນິກຂອງໄທຈະເຂົ້າຮ່ວມການແຂ່ງຂັນດັ່ງກ່າວ ເຊິ່ງປະກອບມີ 2 ລຸ້ນຄື: 500 ກິໂລ ແລະ 250 ກິໂລ. ສໍາລັບທີມໜຶ່ງປະກອບມີ ຊາຍ 8 ຄົນ, ຍິງ 4 ຄົນ.
