ລາວ-ໄທຮ່ວມສະຫລອງສົງການ ພສ 2560 ທີ່ດອນປຸງແຂວງບໍ່ແກ້ວ
ເພື່ອຮັກສາຮີດຄອງອັນດີງາມຂອງລາວ-ໄທໃນການສະຫລອງສົງການ ພສ 2560 ໃນວັນທີ 14 ເມສານີ້ ເມືອງຫ້ວຍ ຊາຍ ແຂວງບໍ່ແກ້ວຮ່ວມກັບອຳ ເພີຊຽງຂອງຈັງວັດຊຽງຣາຍລາຊາອານາຈັກໄທໄດ້ຈັດງານ ເທດສະການປີໃໝ່ ພສ 2560 ຂຶ້ນທີ່ດອນປຸງແຂວງບໍ່ແກ້ວດ້ວຍບັນຍາກາດອັນຟົດຟື້ນ. ໂດຍການ ເຂົ້າຮ່ວມຂອງທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ, ທ່ານ ນະລົງສັກໂອສົດທະນາກອນຜູ້ວ່າການ ຊຽງຣາຍ, ມີທ່ານ ຈາເວີຍ ປະທານບໍລິຫານເຂດເສດຖະກິດພິເສດ 3 ຫລຽມຄຳ ແລະ ມວນຊົນທັງສອງ ຝ່າຍລາວ-ໄທ, ເຂົ້າຮ່ວມຢ່າງເບີກບານມ່ວນຊື່ນເພື່ອເປັນການສົ່ງເສີມ ແລະ ອະນຸລັກຮັກສາ, ຮີດຄອງ ປະເພນີອັນ ດີງາມຂອງສອງຊາດທີ່ໄດ້ສືບ ທອດກັນມາໃຫ້ມີສີສັນບັນຍາ ກາດເບີກບານມ່ວນຊື່ນ, ເຕັມໄປ ດ້ວຍຄວາມຮັກແພງ, ຜູກແໜ້ນ ຄວາມສາມັກຄີມິດຕະພາບທີດີ ລະຫວ່າງເມືອງຫ້ວຍຊາຍ ແລະ ອຳເພີ ຊຽງຂອງໃຫ້ກວ້າງຂວາງຂຶ້ນກວ່າເກົ່າທັງເປັນໂອກາດໄດ້ພົບປະແລກປ່ຽນວັດທະນະທຳອັນດີງາມຂອງສອງຝັ່ງລາວ-ໄທ ພ້ອມກັນສົ່ງເສີມການທ່ອງທ່ຽວລະຫວ່າງສອງທ້ອງຖິ່ນໃຫ້ນັບມື້ກວ້າງຂວາງ.
ທ່ານເຈົ້າເມືອງໆຫ້ວຍຊາຍ ປະທານຈັດງານບຸນມີຄຳເຫັນ ວ່າ: ນີ້ແມ່ນຄັ້ງທຳອິດທີ່ເມືອງຫ້ວຍຊາຍ ແລະ ອຳເພີຊຽງຂອງໄດ້ຮ່ວມກັນຈັດງານດັ່ງກ່າວຂຶ້ນເພື່ອເປັນການເພີ່ມທະວີຮັດແໜ້ນສາຍພົວພັນອັນດີງາມຂອງປະຊາຊົນສອງຝ່າຍສົ່ງເສີມຮີດຄອງປະເພນີ, ຊຸກຍູ້ສົ່ງເສີມວຽກງານການຄ້າ, ການທ່ອງທ່ຽວຂອງສອງເມືອງ, ສອງແຂວງ, ໃຫ້ມີບັນຍາກາດຄຶກຄື້ນ ແລະ ຂະຫຍາຍຕົວຍິ່ງຂຶ້ນ.
ໃນໂອກາດດັ່ງກ່າວຍັງມີງານວາງສະແດງ ແລະ ຈຳ ໜ່າຍສິນຄ້າໂອດ໋ອບ, ຜະລິດຕະພັນຕ່າງໆຂອງລາວ ແລະ ໄທ ແລະ ມີກິດຈະກຳປະກວດຕົບທາດຊາຍຂອງປະຊາຊົນ 18 ບ້ານໃນເມືອງຫ້ວຍຊາຍ ເຊິ່ງອັນດັບໜຶ່ງໄດ້ແກ່ບ້ານ ພິບຸນທອງ, ເປັນສະໄໝທີ່ສອງ, ອັນດັບສອງໄດ້ແກ່ບ້ານໃຫຍ່ຫ້ວຍຊາຍເໜືອ ແລະ ອັນດັບ 3 ແມ່ນບ້ານຂອນແກ້ວ.
