ສສຊ ເຂດ1 ນະຄອນຫລວງວຽງຈັນ ພົບປະໂອ້ລົມພະນັກງານກະຊວງ ຖວທ
ຂປລ. ໃນວັນທີ 14 ມີນານີ້, ສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ ນຳໂດຍທ່ານນາງ ພອນເພັດ ບຸບຜາ ຮອງປະທານກຳມາທິການວັດທະນະທຳ-ສັງຄົມ ໄດ້ລົງພົບປະໂອ້ລົມພະນັກງານກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຢູ່ທີ່ຫໍວັດທະນະທຳແຫ່ງຊາດ ໂດຍໃຫ້ກຽດຕ້ອນຮັບຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ.
ການພົບປະຄັ້ງນີ້ຕົ້ນຕໍແມ່ນເພື່ອເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ຶຶອທີ 4 ຂອງສະພາແຫ່ງຊາດຊຸດທີ VIII ແລະ ຮັບຟັງຄຳຄິດເຫັນ, ຄຳສະເໜີຂອງບັນດາສະມາຊິກສະພາແຫ່ງຊາດຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ບັນຫາສັງຄົມຕ່າງໆ ເພື່ອເປັນຂໍ້ມູນໃຫ້ແກ່ ສສຊ ໄດ້ນຳໄປຄົ້ນຄວ້າພິຈາລະນາ.
ໃນພິທີດັ່ງກ່າວ, ທ່ານ ບົວເງິນ ຊາພູວົງ ໄດ້ຂຶ້ນລາຍງານໂດຍຫຍໍ້ກ່ຽວກັບສະພາບການ ເຄື່ອນໄຫວວຽກງານ ຖວທ ໂດຍທ່ານໄດ້ຍົກໃຫ້ເຫັນວຽກງານຖະແຫລງຂ່າວ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານປະຈຳປີ 2018 ໃຫ້ປາກົດຜົນເປັນຈິງ ໄດ້ມີການປັບປຸຸງຍົກຄຸນນະພາບທາງດ້ານເຕັກນິກຕາມທິດຫັນເປັນດີຈີີຕອນທົ່ວປະເທດ ໂດຍສະເພາະໃນປີ 2018 ໃຫ້ໄດ້ 1 ແຂວງ, ຂະຫຍາຍໂທລະໂຄ່ງໃຫ້ໄດ້ 250 ບ້ານ, ບັນ ດາສື່ຕ່າງໆກໍເອົາໃຈໃສ່ໃນການຫັນຈາກລະບົບອານາລ໋ອກໄປສູ່ລະບົບດີຈີຕອນທີ່ທັນສະໄໝເທື່ອລະກ້າວ ດ້ວຍການນຳໃຊ້ງົບປະມານ, ເງິນວິຊາການ ແລະ ຍາດແຍ່ງການຮ່ວມມືຊ່ວຍເຫລືອຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆ ເຮັດໃຫ້ອຸປະກອນເຕັກນິກຈຳນວນໜຶ່ງໄດ້ຮັບການປ່ຽນຖ່າຍຈາກອານາລ໋ອກໄປສູ່ລະບົບດີຈີຕອນທີ່ທັນສະໄໝເທື່ອລະກ້າວ, ຄຽງຄູ່ກັນນັ້ນ ກໍໄດ້ເອົາໃຈໃສ່ໃນການຍົກລະດັບຄວາມຮູ້ທາງດ້ານວິຊາການສະເພາະໃຫ້ແກ່ພະນັກງານໃຫ້້ນັບມື້ນັບສູງຂຶ້ນ, ຮູ້ຈັກນຳໃຊ້ຮູບການ, ວິທີການໃນຫລາຍຮູບແບບຜ່ານທາງສື່ແບບເກົ່າ ແລະ ແບບໃໝ່ ຜ່ານລະ ບົບອອນລາຍ, ເຟດບຸກ, ຢູທູບຕ່າງໆ ອັນໄດ້ເຮັດໃຫ້ການໂຄສະນາແນວທາງນະໂຍບາຍຂອງພັກ-ລະ ບຽບຂອງລັດ ແລະ ການເຄື່ອນໄຫວຂອງຂະບວນການວຽກງານຕ່າງໆ ທັງພາຍໃນ ແລະ ຕ່າງປະ ເທດ, ໄດ້ຕັ້ງໜ້າໂຄສະນາ ແລະ ຊຸກຍູ້ການປະຕິບັດມະຕິ x ຂອງພັກໃຫ້ເປັນຮູບປະທຳ ໃນການສ້າງສະຖຽນລະພາບທາງດ້ານການເມືອງ ກໍຄືວຽກງານ ປກສ-ປກຊ ແລະ ຄວາມສະຫງົບສຸກເປັນລະບຽບຮຽບຮ້ອຍໃນສັງຄົມ, ໂຄສະນາຜົນສຳເລັດໃນການພັດທະນາເສດຖະກິດ-ສັງຄົມທີ່ຍາດມາໄດ້ໃນແຕ່ລະໄລຍະ, ເປັນສື່ສຳພັນທີ່ດີໃນການພົວພັນລະຫວ່າງປະເທດເຮົາກັບບັນດາປະເທດໃນໂລກໄດ້ເປັນຢ່າງດີ, ມີເນື້ອໃນອຸດົມສົມບູນຂຶ້ນ ແລະ ໄປຮອດໄປເຖິງປະຊາຊົນໄດ້ຢ່າງກວ້າງຂວາງ, ວ່ອງ ໄວຂຶ້ນກວ່າເກົ່າ. ປັດຈຸບັນ, ພາຫະນະສື່ມວນຊົນໃນທົ່ວປະເທດມີ 29 ສະບັບ (ລາຍວັນ 11 ສະບັບ), ໃນນັ້ນລັດ 28 ສະບັບ, ເອກະຊົນ 1 ສະບັບ, ໃບຂ່າວຂອງລັດ 4 ສະບັບ; ວາລະສານມີທັງໝົດ 113 ສະບັບ, ໃນນັ້ນຂອງລັດ 64 ສະບັບ ແລະ ເອກະຊົນ 49 ສະບັບ; ສະຖານີວິທະຍຸກະຈາຍສຽງມີ 76 ແຫ່ງ, ສູນກາງ 11 ແຫ່ງ, ທ້ອງຖິ່ນ 65 ແຫ່ງ, ສະຖານີໂທລະພາບ 42 ສະຖານີ, ຢູ່ຂັ້ນສູນກາງ 10 ສະຖານີ ແລະ ຢູ່ທ້ອງຖິ່ນ 32 ສະຖານີ.
