ຄັງເຊັນ ສະເຫລີມສະຫລອງຄົບຣອບ 12 ປີຢູ່ລາວ
ໃນວັນທີ 11 ມີນານີ້, ບໍລິສັດ ຄັງເຊັນ-ເຄນໂກ ເນັດເວີກລາວ ຈໍາກັດ, ໄດ້ຈັດພິທີສະເຫລີມສະຫລອງຄົບຮອບ 12 ປີທີ່ດໍາເນີນທຸລະກິດຢູ່ ສປປ ລາວ ຂຶ້ນທີ່ຫໍປະຊຸມແຫ່ງຊາດນະຄອນຫລວງວຽງຈັນ ດ້ວຍບັນຍາກາດຄືກຄື້ນ ແລະ ຍິ່ງໃຫຍ່, ໂດຍການເຂົ້າຮ່ວມຂອງທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ສົມຈິດ ອິນທະມິດ, ມີທ່ານ ດຣ ອິນ ທິສັກ ອໍາພັນຍຸດ ປະທານກໍາມະການບໍລິຫານ ບໍລິສັດ ຄັງເຊັນ-ເຄນໂກ ອິນເຕີເນຊັນແນວ ປະເທດໄທ ຈໍາກັດ, ທ່ານ ໄຊຊະນະ ໄຊສຸລິວົງ ຮອງປະທານກໍາມະການບໍລິຫານຄັງເຊັນ- ເຄນໂກ ເນັດເວິກລາວ, ມີບັນດາປະທານກໍາມະການບໍລິຫານຄັງເຊັນ-ເຄນໂກຈາກປະເທດໄທ, ຫວຽດນາມ, ກໍາປູເຈຍ, ມາເລເຊຍ ແລະ ມຽນມາ, ພ້ອມດ້ວຍສະມາຊິກໃນ ສປປ ລາວ ເຂົ້າຮ່ວມຫລາຍກວ່າ 2 ພັນຄົນ.
ທ່ານ ດຣ ອິນທິສັກ ອໍາພັນຍຸດ ໄດ້ກ່າວຕໍ່ພິທີວ່າ: ຄັງເຊັນ-ເຄນໂກ ແມ່ນທຸລະກິດຂາຍຕົງຜະລິດຕະພັນສີນຄ້າອຸປະໂພກ-ບໍລິໂພກ, ເຊິ່ງຖືເປັນອັນດັບໜຶ່ງໃນລາວ ແລະ ມີສະມາຊິກນັກຂາຍອິດສະຫລະຫລາຍທີ່ສຸດໃນປະເທດ, ອັນໄດ້ຊ່ວຍໃຫ້ເຂົາເຈົ້າສາມາດສ້າງລາຍຮັບທີ່ດີເພື່ອປັບປຸງຊີວິດການເປັນຢູ່ໃຫ້ດີຂຶ້ນ, ສະມາຊິກຫລາຍຄົນທີ່ປະສົບຜົນສໍາເລັດໃນທຸລະກິດນີ້, ໄດ້ມີລາຍຮັບທີ່ໝັ້ນຄົງ ແລະ ສາມາດຊື້ເຮືອນ, ລົດຍົນ ແລະ ມີທຶນເພື່ອສົ່ງເສີມການສຶກສາທີ່ດີຂອງລູກ, ພ້ອມທັງໄດ້ຖ່າຍທອດປະສົບການອັນດີຂອງທຸລະກິດນີ້ໃຫ້ແກ່ສະມາຊິກຄົນອື່ນເພື່ອກ້າວໄປສູ່ຄວາມສໍາເລັດພ້ອມໆກັນ ແລະ ປັດຈຸບັນ, ຄັງເຊນ ມີສີນຄ້າຫລາກຫລາຍປະເພດເຊັ່ນ: ຜະລິດຕະພັນເພື່ອຄວາມງາມ, ສຸຂະພາບ, ເຄື່ອງໃຊ້ໃນຄົວເຮືອນ ແລະ ເຄື່ອງໃຊ້ສອຍອື່ນໆ ລວມມີຫລາຍກວ່າ 50 ພັນຊະນິດ ແລະ ສະເພາະຢູ່ລາວແມ່ນມີຈໍາໜ່າຍແລ້ວໃນ 13 ແຂວງ ແລະ ຈະກວມເອົາໃນ ທົ່ວປະເທດໃນອະນາຄົດອັນໃກ້ນີ້.
ໃນໂອກາດນີ້, ທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ມີຄໍາເຫັນວ່າ: ຄັງເຊນ ແມ່ນທຸລະກິດຂາຍຕົງທີ່ມີຄວາມໜ້າເຊື່ອຖື ແລະ ມີການເຕີບໃຫຍ່ຂະ ຫຍາຍຕົວຢູ່ຫລາຍປະເທດ ກໍຄືໃນ ສປປ ລາວ, ອັນໄດ້ສ້າງວຽກເຮັດງານທໍາ ແລະ ສ້າງລາຍຮັບໃຫ້ປະຊາຊົນລາວ ໄດ້ເປັນຢ່າງດີ, ພ້ອມທັງໄດ້ເສຍພັນທະຕ່າງໆໃຫ້ລັດເປັນຈໍານວນຫລາຍໃນແຕ່ລະປີ. ແຕ່ແນວໃດກໍຕາມ, ປັດຈຸບັນລັດຖະບານພວມປັບປຸງດໍາລັດ ເພື່ອຄຸ້ມຄອງທຸລະກິດຂາຍຕົງ, ສະນັ້ນຂໍໃຫ້ບັນດາບໍລິສັດຂາຍຕົງຕ່າງໆທີ່ຢູ່ໃນ ສປປ ລາວ ຈົ່ງໄດ້ປະສານສົມທົບກັບພາກລັດທີ່ກ່ຽວຂ້ອງໃຫ້ດີເພື່ອພ້ອມກັນແກ້ໄຂຂອດຕ່າງໆທີ່ຍັງບໍ່ທັນສອດຄ່ອງຕາມລະບຽບກົດໝາຍ, ເພື່ອຮັບປະກັນໃຫ້ການດໍາເນີນທຸລະກິດມີຄວາມຖືກຕ້ອງໂປ່ງໃສ, ສ້າງຄວາມເຊື່ອ ໝັ້ນໃຫ້ສະມາຊິກ, ລູກຄ້າ ແລະ ຜູ້ປະກອບຕ່າງໆ, ທັງເປັນການສ້າງວຽກເຮັດງານທໍາ ແລະ ມີລາຍຮັບທີ່ໝັ້ນຄົງ.
ພາຍໃນງານສະຫລອງຄັ້ງນີ້, ແມ່ນໄດ້ມີການປະດັບກຽດຕິຍົດໃຫ້ກັບນັກຂາຍດີເດັ່ນ, ພ້ອມການກິດຈະກໍາມ່ວນຊື່ນຕ່າງໆ ເຊັ່ນ: ຫ້ອງວາງສະແດງ ແລະ ຈໍາໜ່າຍສິນຄ້າຄັງເຊັນ, ການສະແດງສີລະປະ ແລະ ຫລິ້ນເກມຕ່າງໆດ້ວຍບັນຍາກາດຄືກຄື້ນ.
