ເປັນຊາວນາແຕ່ຄິດຫ່າງເຫີນຈາກອາຊີບ

 ໂດຍ: ທິດກ່ຳ

ຫວ່າງແລ້ວນີ້, ທິດກ່ຳ ໄດ້ໄປເລາະແຖວເມືອງຫີນບູນ, ຄູນຄຳ ນັບທັງແຖວຍົມມະລາດ ເຫັນເຂົ້ານາແຊງພວມຂຽວ ງາມອຸ່ມທຸ່ມເຕັມທົ່ງນາເບິ່ງ ແລ້ວເປັນຕາສະອອນໃຈນຳ ເຂົ້ານາແຊງຂອງພີ່ນ້ອງທີ່ເປັນຊາວນາພິເສດແມ່ນເຂົ້ານາ ແຊງຂອງພີ່ນ້ອງບ້ານໃໝ່ຜາ ຊ້າງເມືອງ ຄູນຄຳ ເຊິ່ງເປັນເນື້ອ ທີ່ນາໃໝ່ ໂດຍແມ່ນບໍລິສັດ ເຫີນ-ຫີນບູນ ເປັນຜູ້ບຸກເບີກ ເນື້ອ ທີ່ນາແຊງໃຫ້ໃໝ່ຍ້ອນຖືກ ຜົນກະທົບຈາກໂຄງການກໍ່ສ້າງເຂື່ອນໄຟຟ້າ.

ເມື່ອເຫັນເຂົ້າຂຽວງາມ ເຕັມທົ່ງ ທິດກ່ຳ ຕັ້ງໂຈດກັບ ຍາດຜູ້ນຳພາທາງວ່າ: ເຂົ້າ ຂຽວງາມ ຄືແນວນີ້ຄອບຄົວ ໜຶ່ງເຮັດຈັກເຮັກຕາ? ເຂົາເຈົ້າ ກໍຕອບຢ່າງທັນຄວັນວ່າ ຜູ້ລະ ສອງສາມໄລ່. ນາປີເດ? ນາປີ ກໍຄືກັນເຮັດພໍແຕ່ກຸ້ມກິນກໍ ຢ່າ ແລ້ວວ່າຊັ້ນ! ເປັນຫຍັງບໍ່ເຮັດ ຫລາຍໆ ຈົນເຫລືອຢູ່ເຫລືອກິນ ແລ້ວຂາຍເອົາເງິນ ຫລື ຜະລິດ ໃຫ້ມັນກາຍເປັນສິນຄ້າຈົນ ໄດ້ຂາຍຢູ່ ພາຍໃນ ແລະ ສົ່ງ ອອກຕ່າງປະເທດ ເຮົາຖາມຢ້ຳ. ເຂົາກໍພ້ອມກັນຕອບເປັນແລວ ດຽວກັນວ່າ: ມັນບໍ່ຄຸ້ມຄ່າຍ້ອນ ຕົ້ນທຶນສູງລາຄາຂາຍເຂົ້າກໍຖືກ ຄຳຕອບນີ້ມັກຈະໄດ້ຍິນທົ່ວໄປ ໃນຖັນແຖວຊາວນາປູກເຂົ້າເທົ່າ ທີ່ ທິດກ່ຳ ໄດ້ຍິນ ແລະ ໄດ້ຟັງ ມາດົນແລ້ວ.

ຈາກສາເຫດທີ່ເວົ້າມາ ຂ້າງເທິງນີ້, ຈຶ່ງເປັນເຫດໃຫ້ ຊາວນາມີແນວຄິດຫ່າງເຫີນ ຈາກອາຊີບ ດ້ວຍການຫັນໄປ ເຮັດວຽກອັນອື່ນທີ່ມີລາຍຮັບ ຂ້ອນຂ້າງດີ ແລະ ງ່າຍດາຍ ກວ່າ ເປັນຕົ້ນ: ຜູ້ມີເນື້ອທີ່ນາກໍ ຂາຍເອົາເງິນໄປຊື້ລົດຂີ່ແລ້ວ ກໍຫັນໄປ ເປັນກຳມະກອນຮັບ ຈ້າງ, ໃຊ້ຮູບການເອົາດິນນາ ໃຫ້ໝູ່ເຊົ່າ, ຫລື ຂາຍດິນນາ ແລ້ວເອົາເງິນໄປຝາກທະນາ ຄານກິນດອກເບ້ຍ ແລ້ວຕົນ ເອງກໍຫັນໄປເຮັດອາຊີບຄ້າ ຂາຍພໍໄດ້ກິນສືບມື້. ຈາກ ປັດໄຈ ດັ່ງກ່າວ, ຈຶ່ງເຮັດໃຫ້ເນື້ອທີ່ ການຜະລິດເຂົ້ານັບມື້ຫລຸດ ລົງ; ສົມທົບກັບບາງທ້ອງຖິ່ນ ມີການພັດທະນາຢ່າງຫລວງ ຫລາຍໄດ້ກວມເອົາເນື້ອທີ່ການຜະລິດເຂົ້າໃນແຕ່ລະປີໝົດໄປ ທີລະເລັກລະໜ້ອຍ.

ແນວໃດກໍດີ, ຕາມເຮົາຄິດ ເພື່ອຫລີກເວັ້ນຜົນກະທົບທາງ ລົບທີ່ຈະຕາມມາກວ່ານີ້ ແລະ ເພື່ອສົ່ງເສີມໃຫ້ຊາວນາເຮົາ ຫັນໄປເຮັດການຜະລິດເຂົ້າໃຫ້ຫລາຍທັງໄດ້ກິນ ແລະ ຂາຍຫລື ສົ່ງອອກຕ່າງປະເທດຕາມແນວທາງຂອງພັກ ແລະ ລັດຖະບານ ວາງອອກໂດຍສະເພາະແມ່ນ ມະຕິ 10 ຂອງພັກກໍໄດ້ເວົ້າວ່າ ຫັນສູ່ການຜະລິດເປັນອັນທັນ ສະໄໝແບບຍືນຍົງທັງເປັນ ມິດກັບທຳມະຊາດມີທາງອອກຄືພວກເຮົາຕ້ອງໄດ້ຈັດຕັ້ງກຸ່ມ ການຜະລິດຄັກແນ່, ຫັນອາຊີບ ຊາວນາເປັນອາຊີບທີ່ໝັ້ນຄົງ ແລະ ຍືນຍົງ. ຢາກໄດ້ຕາມຄາດ ໝາຍທີ່ວ່ານີ້ອຳນາດການປົກ ຄອງທ້ອງຖິ່ນ ແລະ ອົງການທີ່ ກ່ຽວຂ້ອງຕ້ອງໄດ້ນຳພາເຮັດ, ພາໄປ, ສ້າງເງື່ອນໄຂໃຫ້ຜູ້ມີ ອາຊີບເຮັດນາໃຫ້ເຂົ້າແຫລ່ງ ທຶນ. ຄະນະພັກທ້ອງຖິ່ນ ແລະ ພະນັກງານທີ່ລົງກໍ່ສ້າງຮາກ ຖານຕ້ອງມີຫົວຄິດປະດິດສ້າງ ໃນການກຳນົດແຜນຍຸດທະ ສາດ ໃນການພັດທະນາທ້ອງ ຖິ່ນໃຫ້ຈະແຈ້ງ, ໂດຍສະເພາະ ເຂດການຜະລິດ, ປູກຝັງ ແລະ ລ້ຽງສັດ ຫລື ອຸດສະຫະກຳ, ກະສິ ກຳ ດັ່ງມະຕິ 10 ຂອງພັກ ໄດ້ກຳນົດເອົາບັນດາ ແຂວງ ພາກກາງ ແລະ ພາກໃຕ້ເປັນ ເຂດ ຜະລິດສະບຽງອາຫານ ໂດຍສະເພາະແມ່ນຜະລິດເຂົ້າ ໃຫ້ເຫລືອກິນ ແລະ ສົ່ງອອກໃນ ແຕ່ລະ ປີໃຫ້ມີການເພີ່ມຂຶ້ນ, ໃນນີ້ແຂວງຄຳມ່ວນ ກໍແມ່ນ ແຂວງໜຶ່ງທີ່ນອນຢູ່ໃນເປົ້າ ໝາຍຂອງລັດຖະບານ.

ສະນັ້ນ, ຕາມເຮົາວ່າ ເພື່ອ ເຮັດໃຫ້ແຜນຜະລິດສະບຽງ ອາຫານເປັນໄປຕາມຄາດ ໝາຍທີ່ລັດຖະບານວາງອອກ ມີແຕ່ພວກເຮົາຈະຕ້ອງນຳພາ ປະຊາຊົນເຮັດ, ທັງນຳພາ, ທັງ ແນະນຳ ແລະ ທັງໃຊ້ມາດຕະ ການທີ່ສອດຄ່ອງ ຈຶ່ງຈະເຮັດ ໃຫ້ຊາວນາຮັກຫອມອາຊີບບໍ່ ມີແນວຄິດ ເບື່ອໜ່າຍ ແລະ ຢາກ ໜີຈາກອາຊີບຂອງຕົນໄປເຮັດວຽກອື່ນ./.

+ ລ້ຽງສັດຊ່ວຍຄອບຄົວມີລາຍຮັບເພີ່ມຂຶ້ນ

+ ວິຖີຊີວິດຂອງຊາວບ້ານທ່ານາຂາມ