ມັນແນ່ນອນ ຫລວງພະບາງ ຮັບມື ປກສ ອາທິດນີ້ ຄາດມີແຟນບານເຂົ້າຮ່ວມເຄິ່ງເມືອງ

ຖືວ່າເປັນອີກນັດປະຫວັດສາດຂອງວົງການບານເຕະລາວລະຫວ່າງ ສະໂມສອນ ຫລວງພະບາງ ຢູໄນເຕັດ ຈະເປີດສະໜາມແຂວງຫລວງພະບາງ ທີ່ເມືອງຫລວງພະບາງ ແຂວງຫລວງພະບາງ ຕ້ອນຮັບການມາຢາມຂອງ ປກສ ເອັຟຊີ ໃນເປບຊີ ລາວພຣີເມຍລີກ 2018 ໃນວັນອາທິດທີ 11 ມີນານີ້ເວລາ 16:00 ໂມງ ຄາດວ່າ ຊາວຫລວງພະບາງ ຈະແຫ່ໄປຊົມຢ່າງຫລວງຫລາຍແນ່ນອນ ແລະ ອາດເປັນສະຖິຕິທີ່ມີແຟນບານເຂົ້າຊົມຫລາຍທີ່ສຸດກໍ່ເປັນໄດ້.

ທ່ານ ວາລະສິນ ດາລາພອນ ຄູຝຶກ ຫລວງພະບາງ ຢູໄນເຕັດ ໄດ້ເປີດເຜີຍວ່າ: ການແຂ່ງຂັນນັດນີ້ຖືວ່າເປັນນັດທີ່ມີຄວາມໝາຍ ແລະ ສໍາຄັນທີ່ສຸດ ເພາະວ່າເປັນນັດທໍາອິດທີ່ສະໂມສອນຂອງພວກເຮົາມາລົງສະໜາມໃນບ້ານຂອງຕົນເອງ ເພື່ອຫວັງເກັບຄະແນນຈາກສະໂມສອນ ປກສ ເອັຟຊີກໍວ່າໄດ້ ສ່ວນ  ສະໜາມແມ່ນສາມາດຮັບຮອງແຟນບານໄດ້ຢ່າງຫລວງຫລາຍ. ສໍາລັບກິດຈະກໍາພວກເຮົາຈະມີການຂາຍເສື້ອ ແລະ ຂອງທີ່ລະລຶກໃຫ້ກັບແຟນບານ ພ້ອມນັ້ນໃນເວລາພັກເຄິ່ງເວລາທໍາອິດພວກເຮົາຈະມີກິດຈະກໍາແຈກເສື້ອ ແລະ ຂອງທີ່ລະນຶກໃຫ້ແກ່ແຟນບານໄດ້ຮ່ວມນໍາກັນ, ເຊິ່ງຄາດຈະມີແຟນບານເຂົ້າຮ່ວມຢ່າງຫລວງຫລາຍ ໂດຍສະເພະຊາວເມືອງຫລວງພະບາງ ຄາດເກືອບເຄິ່ງຂອງເມືອງເຂົ້າຮ່ວມເປັນຢ່າງໜ້ອຍ ແລະ ສະໜາມນີ້ສາມາດບັນຈຸໄດ້ 10 ພັນກວ່າຄົນ.

ຂະນະທີ່ ທ່ານ ພຸດດາມອນ ຈັນທະລາສີ ໂຄສົກປະຈໍາສະໂມສອນ ຫລວງພະບາງ ຢູໄນເຕັດ ໃຫ້ຄໍາເຫັນກ່ອນນັດດັ່ງກ່າວຈະເລີ່ມຂຶ້ນວ່າ: ຫລວງພະບາງ ຢູໄນເຕັດ ໄດ້ຮັບຄວາມສົນໃຈຢ່າງຫລວງຫລາຍ ໂດຍສະເພາະ ໃນເພຈ໌ທາງການຂອງສະໂມສອນ ໄດ້ມີແຟນບານຕິດຕາມຫລາຍ ແລະ ເຂົ້າມາສະແດງຄໍາຄິດເຫັນຢ່າງຫລວງຫລາຍ ແນ່ນອນເຮັດໃຫ້ຫລາຍນັດທ້າຍອາທິດນີ້ທີ່ແຂວງຫລວງພະບາງ ຈະມີແຟນບານເຂົ້າມາຊົມຫລາຍແນ່ນອນ, ເນື່ອງຈາກທີມຫລວງພະບາງ ມາດີ ແລະ ສາມາດຊະນະໄດ້ ກ່ອນກັບໄປແຂ່ງຂັນທີ່ແຂວງ. ນອກນັ້ນ, ພາຍໃນມື້ແຂ່ງຂັນໜ້າສະໜາມຈະມີກິດຈະກໍາແຈກເສື້ອ-ຂາຍເສື້ອທີມ ເຮັດໃຫ້ເປັນອີກຊ່ອງທາງໃນການດຶງດູດແຟນບານອີກຊ່ອງທາງ.

ສໍາລັບ ຫລວງພະບາງ ຢູໄນເຕັດ ຢູ່ອັນດັບທີ 3 ຈາກການລົງສະໜາມ 2 ຄັ້ງມີຢູ່ 4 ຄະແນນ, ຊະນະ 1 ນັດ ແລະ ສະເໝີ 1 ນັດ ຕາມຫລັງ ລາວໂຕໂຍຕ້າ ເອັຟຊີ ທີມນໍາລົງ 2 ນັດ, ຊະນະ 2 ນັດ, ມີ 6 ຄະແນນ ແລະ ອັນດັບທີ 2 ຊ້າງນ້ອຍ ເອັຟຊີ ລົງສະໜາມ 2 ນັດ, ຊະນະ 2 ມີຢູ່ 6 ຄະແນນ.