ທ່ານຮອງນາຍົກ ສົມດີ ດວງດີ ຢ້ຽມຢາມໂຄງການທາງລົດໄຟ ແລະ ເຂື່ອນໄຟໄຟ້ນ້ຳອູ 2

ໃນໂອກາດທີ່ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ພ້ອມດ້ວຍຄະນະໄປເຄື່ອນໄຫວຢ້ຽມຢ້າມ ແລະ ເຮັດວຽກຊຸກຍູ້ວຽກງານຈັດເກັບລາຍຮັບເຂົ້າງົບປະມານຢູ່ແຂວງຫລວງພະບາງ, ໃນວັນທີ 27 ມີນາຜ່ານມາ, ທ່ານໄດ້ຢ້ຽມຢາມໂຄງການກໍ່ສ້າງທາງລົດໄຟມິດຕະພາບລາວ-ຈີນ ແລະ ໂຄງການກໍ່ສ້າງເຂື່ອນໄຟຟ້ານ້ຳອູ 2, ໂດຍການຕ້ອນຮັບຂອງທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ, ມີຄະນະນຳຂອງແຂວງ, ຜູ້ຕາງໜ້າໂຄງການກໍ່ສ້າງທາງລົດ ແລະ ເຂື່ອນໄຟຟ້າດັ່ງກ່າວໃຫ້ການຕ້ອນຮັບຢ່າງອົບອຸ່ນ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງລາຍງານວ່າ: ໂຄງການກໍ່ສ້າງທາງລົດມິດຕະພາບລາວ-ຈີນ ຜ່ານແຂວງຫລວງພະບາງມີຄວາມຍາວທັງໝົດ 80 ກວ່າກິໂລແມັດ ໃນນັ້ນ, ເຂດທີ່ເຈາະພູເປັນອຸໂມງມີໄລຍະຍາວ 3.800 ແມັດໂດຍໄດ້ເລີ່ມການກໍ່ສ້າງມາແຕ່ຕົ້ນປີ 2016 ແລະ ຄາດວ່າຮອດປີ 2020 ຈະສຳເລັດ 100%. ສ່ວນໂຄງການກໍ່ສ້າງເຂື່ອນໄຟຟ້ານ້ຳອູ 2 ໂດຍໄດ້ນຳໃຊ້ທຶນການກໍ່ສ້າງທັງຫມົດ 2.800 ລ້ານໂດລາສະຫະລັດ.