ກິດຈະກໍາຂີ່ລົດຖີບເພື່ອການກຸສົນ ບັນລຸຍອດບໍລິຈາກຫຼາຍກວ່າ 72 ລ້ານກີບ

ວາລະສານຂວັນໃຈ ຮ່ວມກັບ ສູນກາງສະຫະພັນແມ່ຍິງ ແລະ ສະມາຄົມນັກທຸລະກິດແມ່ຍິງລາວ, ໄດ້ຈັດງານຂີ່ລົດຖີບເພື່ອການກຸສົນພາຍໃຕ້ໂຄງການ “Bike for her 2018” ເພື່ອຮ່ວມປະກາດຈຸດຢືນ ແລະ ລົນນະລົງ ຢຸດການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ພ້ອມທັງລະດົມທຶນບໍລິຈາກໃຫ້ສູນໃຫ້ຄຳປຶກສາປົກປ້ອງແມ່ຍິງ ແລະ ເດັກນ້ອຍ, ຊຶ່ງເປັນສູນແຫ່ງທໍາອິດໃນລາວ, ເພື່ອເຮັດໜ້າທີ່ປົກປ້ອງ ແລະ ສະໜອງການຊ່ວຍເຫຼືອແກ່ແມ່ຍິງ ແລະ ເດັກນ້ອຍທີ່ມີບັນຫາໃນສັງຄົມ ລວມທັງຜູ້ຖືກເຄາະຮ້າຍຈາກການໃຊ້ຄວາມຮຸນແຮງໃນຄອບຄົວ, ຈາກການຄ້າມະນຸດ ແລະ ຈາກການກົດຂີ່ຂູດຮີດທາງເພດ.

ງານ “Bike for her 2018” ໄດ້ຈັດຂຶ້ນໃນວັນທີ 3 ມີນານີ້, ທີ່ສວນເຈົ້າອານຸວົງ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງແມ່ຍິງລາວ, ມີເອກອັກຄະລັດຖະທູດອົດສະຕາລີ ປະຈໍາລາວ, ປະທານສະມາຄົມນັກທຸລະກິດແມ່ຍິງລາວ, ມີນັກກິລາແຂ່ງລົດຖີບທັງພາຍໃນ ແລະ ຕ່າງປະເທດ ແລະ ມວນຊົນເກືອບ 1 ພັນກວ່າຄົນເຂົ້າຮ່ວມ.

ບັນນາທິການວາລະສານຂວັນໃຈກ່າວວ່າ: ງານດັ່ງກ່າວຈັດຂຶ້ນ ເພື່ອຮ່ວມກັນປະກາດຈຸດຢືນເພື່ອຢຸດເຊົາການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ທັງເປັນການລະດົມທຶນ ບໍລິຈາກໃຫ້ກັບສູນໃຫ້ຄໍາປຶກສາ ແລະ ປົກປ້ອງແມ່ຍິງ ແລະ ເດັກນ້ອຍ ທີ່ຖືກເຄາະຮ້າຍຈາກຄວາມຮຸນແຮງ ແລະ ການຄ້າມະນຸດ ແລະ ເປັນການສ້າງຂະບວນການສະເຫຼີມສະຫລອງວັນແມ່ຍິງສາກົນ ຄົບຮອບ 108 ປີ (8/3/1910-8/3/2018). ເງິນບໍລິຈາກໃນງານ “Bike for her 2018” ທີ່ໄດ້ຈາກນໍ້າໃຈຂອງຫຼາຍໆພາກສ່ວນ ລວມທັງໝົດໄດ້ 72 ລ້ານກວ່າກີບ.