ລົດແກ້ວ ຊະນະ 21 ກິໂລແມັດຍິງ ແລ່ນວຽງຈັນ ຮາຟມາຣາທອນ ນາໆຊາດ 2018
ການແຂ່ງຂັນແລ່ນວຽງຈັນ ຮາຟມາຣາທອນ ນາໆຊາດ ປີທີ 3 ຈັດຂຶ້ນໃນວັນທີ 4 ມີນານີ້ ມີ 3 ລາຍການຄື: ຮາຟມາຣາທອນ 21 ກິໂລແມັດ, ມິນິມາຣາທອນ 10,5 ກິໂລແມັດ ແລະ ແລ່ນ-ຍ່າງເພື່ອສຸຂະພາບ 5 ກິໂລແມັດ ເປັນປະເພດຍິງ-ຊາຍທົ່ວໄປບໍ່ຈຳກັດອາຍຸ. ຂະນະທີ່ນາງ ລົດແກ້ວ ອິນທະກຸມມານ ສາມາດຍາດໄດ້ອັນດັບທີ 1 ໄລຍະ 21 ກິໂລແມັດຍິງ.
ການແຂ່ງຂັນມີນັກກິລາເຂົ້າຮ່ວມຫລາຍກວ່າ 3 ພັນຄົນ ຜ່ານການແຂ່ງຂັນຜົນປາກົດວ່າ: ໃນປະເພດຍິງແລ່ນ 21 ກິໂລແມັດ ອັນດັບທີ 1 ແມ່ນນາງ ລົດແກ້ວ ອິນທະກຸມມານ ເຂົ້າເສັ້ນໄຊເວລາ 1 ຊົວໂມງ 21 ນາທີ 11 ວິນາທີ. ສ່ວນອັນດັບ 2 ເປັນຂອງ Aregay ຈາກອິທິໂອເປຍ (Ethiopia) ເຂົ້າເສັ້ນໄຊດ້ວຍເວລາ 1 ຊົ່ວໂມງ 29 ວິນາທີ ແລະ 32 ວິນາທີ ແລະ ອັນດັບ 3 ເປັນຂອງ Nathalie Cochet ຈາກຝຣັ່ງ ເຂົ້າເສັ້ນໄຊດ້ວຍເວລາ 1 ຊົ່ວໂມງ 38 ນາທີ 42 ວິນາທີ.
ສໍາລັບເງິນລາງວັນທີ 1 ປະເພດແລ່ນຮາຟມາຣາທອນ 21 ກິໂລແມັດ ຍິງ-ຊາຍຈະໄດ້ຮັບເງິນລາງວັນ 5 ລ້ານກີບ, ທີສອງ 2,5 ລ້ານກີບ, ທີສາມ 1 ລ້ານກີບ, ທີສີ່ 7 ແສນກີບ ແລະ ທີຫ້າ 5 ແສນກີບ, ສ່ວນລາງວັນທີ 1 ປະເພດແລ່ນມິນິມາຣາທອນ 10,5 ກິໂລແມັດ ຍິງ-ຊາຍ ຈະໄດ້ຮັບເງິນລາງວັນ 2 ລ້ານກີບ, ທີສອງ 1 ລ້ານກີບ, ທີສາມ 8 ແສນກີບ, ທີສີ່ 6 ແສນກີບ ແລະ ທີຫ້າ 4 ແສນກີບ.
